দিবেলপমেন্ত ওফ নোর্থ ইস্তর্ন রিজন(দোনর)গী রাজ্য মন্ত্রী(মনিংতম্বা), প্রধান মন্ত্রী ওফিস, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহনা ঙসি হায়খি হৌখিবা চহি ৬ অসিদা মোদী সরকারনা পাংথোকখিবা মরুওইবা থবকশিংগী মনুংদা , ইন্দিয়ান স্পেস রিছর্স ওর্গনাইজেসন(ইসরো)না মখা তানা সেতেলাইতশিং থাগৎপা খক নত্তনা, মসিনা লেপ্তনা চাউখৎ-থৌরাংগী থবকশিং পায়খৎতুনা প্রধান মন্ত্রী নরেন্দ্র মোদীগী “অওনবা ভারত”কী পান্দমদা মতেং পাংবা অসিনি।

২০১৯গী জুলাই থা অমসুং ২০২০গী জুলাই থা চাংদম্নবদা লৌউ-শিংউগী লমদা মহৈ-মরোংগী পোৎথোক-চাথোক হেনগৎলকপা খঙবা ঙম্লিবা অসি রিমোত সেন্সিং সেতিলাইতশিংগী দেতা নিংথিনা শীজিন্নবদগীনি। মনা-মশিং অমসুং মহৈ-মরোংগী হকশেলগী ফিবম উৎলিবা নোর্মেলাইজ দিফেরেন্স ভেজিতেসন ইন্দেক্স(এন দি ভি আই)না হৌখিবা চহিগী চপ মান্নবা থা মনুংদা ওইখিবা ফিবম অদুদগী হেল্লিবা চহি অসিগী জুলাই থাগী মহৈ-মরোংগী ফিবমশিং নাখৈ শেংনা উৎখি হায়না দোক্তর জিতেন্দ্রনা হায়খি।

দোক্তর জিতেন্দ্রনা হায়খি, প্রধান মন্ত্রী নরেন্দ্র মোদীনা পাউতাক পীবদগী, হৌখিবা চহি মরি অসিদা তোঙান-তোঙানবা চাউখৎ-থৌরাংগী স্কিমশিং পায়খৎপদা মতৌ করম্না খ্বাইদগী ফবা স্পেস তেক্নোলোজি শীজিন্নগদগে হায়বগী মতাংদা লৈবাক্কী কোনুংদা তোঙান-তোঙানবা মিনিস্ত্রিশিং অমসুং দিপার্তমেন্তশিংগী মীহুৎশিংগা ইসরো অমসুং স্পেস দিপার্তমেন্তগী সাইন্তিস্তশিংগা কোক চুংশিন্নদুনা লাক্লি। মসিগী মতুং তারকপদা, লৌউ-শিংউ, রেলৱেজ, লম্বী অমসুং থোঙ, মেদিকেল/তেলিমেদিসিন, মতম চানা য়ুতিলাইজেসন সর্তিফিকেত পীখৎলকপা, মাংজৌননা নোং-চিং/ঈশিং ইচাউ লাউথোকপগী থবকশিংদা হৌজিক স্পেস তেক্নোলোজি শীজিন্নরে।

মহাক্না হায়খি, গেহু, কালেন অমসুং নিংথম লৌরোক্কী ফৌ, হঙ্গাম,লিমোন,লশিং,চু, রবি  সোরগুম অমসুং নিংথম থাগী হৱায়শিংগী চাথোক মাংজৌননা লাউথোকপদা হৌজিক ইসরোগী তেক্নোলোজি শীজিন্নরে। মী লৈতবা রেলৱেজ ক্রোসিংশিং ঙাকপা, ত্রেন গুরুং চৎপা ঙাকথোক্নবা রেল তালিদা লৈবা পোৎশকশিং মশক খঙদোক্নবা অমসুং অতৈ থবকশিংদা হৌজিক স্পেস তেক্নোলোজি শীজিন্নরে। ভারতকী ঙমখৈশিং য়েংশিন্নবা অমসুং মপানগী মীওইশিং নারোন্দা চঙলকপা থিংনবা হৌজিক সেতিলাইতকী মমি শীজিন্নরে।

মখোয়গী স্পেস মিসনশিংদা ইসরো অমসুং স্পেস দিপার্তমেন্তনা হৌজিক অতোপ্পা লৈবাক কয়াদগী মাংজিল থারে অমসুং মার্স ওর্বিতর মিসনগুম্বা মিসনশিংদগী পীরকপা ফোতোশিং হৌজিক মমিং লৈরবা স্পেস সেন্তরশিংদা শীজিন্নরে। চাউখৎ-থৌরাংগী থবকশিং অমসুং মীয়ামগী য়াইফনবা প্রোজেকশিংদা স্পেস তেক্নোলোজি শীজিন্নবদা হৌজিক ভারত মাংজিল থারে অমসুং লৈবাক অসিগী মতৌ মালেমগী অতোপ্পা লৈবাকশিংনা তম্লে হায়না মহাক্না ফোঙদোকখি।

দোক্তর জিতেন্দ্র সিংহনা হায়খি, প্রধান মন্ত্রী নরেন্দ্র মোদীগী মখাদা ভারত মালেমদা মাংজিল থাবা লৈবাক ওইরক্লি অমসুং মসিগী খোঙচৎ অসি ভারতকী স্পেস তেক্নোলোজিনা লমজিংলি অমসুং মসি সাইন্তিস্তশিংদা কৎথোক্লি।

<><><><><>