কেন্দ্রগী কম্মর্স অমসুং ইনদস্ত্রী মন্ত্রী শ্রী পিয়ুশ গোয়লনা নুমিৎ ৫নি চত্থগদবা বর্চুএল এফ.এম.সি.জি. সপ্লাই চেন এক্সপো, ২০২০গী অহানবা ইদিসন ঙসি শঙ্গাখ্রে।

থৌরম অসিদা শ্রী গোয়লনা কোবিদ-১৯গী লায়চৎকী মতুংদা ওইরক্কদবা মতম অসিগা চাননা চৎপা তাবনি হায়খি। মালেম অসি হোংলে। মালেমদা কোবিদনা পুরক্লিবা অহোংবশিং অসিদগী ঐখোয়না খরসু তমগদবনি অমসুং খরসু তম্লোইদবনি। “ঐখোয়না হাইজিনিক ওইবা মওংদা হিংবা তম্লগনি অমসুং তেক্নোলোজী শিজিন্নদুনা হেন্না নীংথিবা ওইহনগদবনি। ঐখোয়না কারবার তৌবগী হীরমদা লমচৎ-শাজৎ ফজবগী থৌওং, চেকশিন্না লৈবা অমসুং ৱাখল খনথবগী থৌওংশিং তমগদবনি”, হায়না মহাক্না হায়খি। শ্রী গোয়লনা অনৌবা মালেম অসিদা ওইরক্লিবা অনৌবা মওং কয়া অসিনা ভারতপু নৌহৌননা শক তাকপদা তেংবাংগনি অমসুং অতোপ্পগী ফনবগীদমক খন্দুনা খুন্নাইগী শোত্থরবা মীওইশিংদা নীংথিনা লোয়নবীদুনা চৎকদবনি হায়না মখা তানা হায়খি।

লৈবাক্কী ইন্দস্ত্রীশিং অসিবু খুমাং চাউশিলহন্নবগীদমক্তা মীরমদগী পোত্থোক পুশিল্লকপা য়েংশিনবা অসিদা কনাগুম্বা মীওই খরনা য়েৎলক্লিবা অসিগী মতাংদা পল্লদুনা শ্রী গোয়লনা ঐখোয়গী ইন্দস্ত্রীশিং অসি ঙাক-শেন্দুনা মখোয়বু মান্নবা মিৎয়েং পীদুনা পুম্নমক্না য়াগদবা মওংদা থম্নিংই হায়খি। ঐখোয়না লৈবাক কয়া অমগা খল-মান্নবা ললোন ইতিক্কী পথাপ অমা পুরক্নবা মাংলোমদা চৎলি। মসিগী মরম অসিনা ঐখোয়না আর.সি.ই.পি.দা য়াওদ্রিবনি মরমদি হায়রিবা অসি অচান মীরায় নাইবা পথাপ্তা য়ুম্ফম ওইদুনা ভারতকী মহৈ শিজিন্নবা, মখোয়গী পোত্থোকশিং ভারত্তা শাহনবা অমসুং অচৌবা কারবারশিংদা শেল থাদদুনা য়াম্লবা ভারতকী মীওই বিলিয়ন ১.৩গী থবকশিং অসিদগী শেল তানবনি। মহাক্না হায়খিবদা ভারত্তা শেল থাদরক্লিবা মীওইশিং অসিনা ভারত্তা মখোয়গী মওং খরদা শেম-শাবা লোইরবা পোত্থোকশিংবু নৌনা পানখৎহনবা নত্ত্রগা ইম্পোর্ত দ্যুতীগী কনসেসন ফংবা খক্তা নত্তনা মখোয়গী তেক্নোলোজী, নীংথিবা অমসুং ফজবা থবক তৌবগী মওং-মতৌশিং পুশিল্লকপা, পোত্থোকশিংবু অহেনবা মগুন হাপচিনবগী থৌওংশিংদা তেংবাংগদবনি হায়না মহাক্না হায়খি।

শ্রী গোয়লনা ঐখোয়গী সরকারনা ইন্দস্ত্রীশিংগা লেং-মান্নদুনা চৎমিন্নদুনা মখোয়না অতোপ্পশিংগা চাংদম্নবা ঙম্নবা হোৎনরিবশিংদা তেংবাংদুনা মালেমদা মান্নবা থাক্তা খোংদানবা হোৎনরিবা অসিদা পুক্নিং থৌগৎকদবনি হায়খি। মহাত্মা গান্ধীনা হায়খিবা “ঐখোয়না মালেমদগী মান্নবা ললোন ইতিক্কী থৌওং ফংফম থোকই হায়না হায়বা মতমদা ঐখোয়গী খ্বাইদগী শোত্থরবা মীওইশিংবু নিংশিংদুনা পাঙথোক্কদৌরিবা থবকশিং অসিনা মখোয়দা হীরম অমত্তদা কান্নবা পীবা ঙমগদরা হায়না মুন্না খন্থগদবনি” হায়বা ৱাফম অদু মীয়ামদা পাউদমখি। পি.এম. মোদীনা হৌখিবা চহি ৬ অসিদা খুন্নাইগী শোত্থরবা কাংলুপশিংদা মিৎয়েং চংদুনা লাক্লি। মহাক্না চত্থরক্লিবা য়াইফ য়ুম্বালগী প্রোজেক্ত খুদিংমক ভারতকী খ্বাইদগী শোনবা অমসুং লায়রবশিংগীদমক্তনি।

শ্রী গোয়লনা মখা তানা হায়খিবদা হৌখিবা চহি ৬ অসিদা প্রধান মন্ত্রী শ্রী নরেন্দ্র মোদীনা পাঙথোকখিবা থবক খুদিংমক অসি অয়াম্বনা খুন্নাইগী তোখায় তারবা মীওইশিংগী পুন্সি মহিং ফগৎহন্নবা ওইখি হায়খি। অমাংশঙ কোতি ১১ শাখিবা অমসুং খ্বাইদগী মনুং হঞ্জিনবা মফমশিংদা ব্রোদবেন্দ কন্নেক্সন ফংহনখিবা অমসুং অতোপ্পা য়াইফ য়ুম্বালগী মতাংদা শেমদোকখিবশিং অসি হান্না তৌখিদ্রিবা থৌওংশিং ওইখি অমসুং মসিনা মমাংদা লৈরম্বা মীয়ামগী ফিভমশিংবু শেমদোক্তুনা মালেম অসিনা হৌজিক ফাওবদা উরকখিবা খ্বাইদগী ফত্ত্রবা লায়চৎ অসিবু থেংননবা শেম শাবদা তেংবাংবা থৌওং ওইখি। প্রধান মন্ত্রীগী ইথিল পীনিংঙাই ওইরবা লুচিং মখাদা পাঙথোকপা ইন্দস্ত্রীগী লুপশিংনা অচৌবা থাক্তা তেংবাংবগী চাউরবা থৌওং কয়া অসিনা ভারতনা লায়চৎ অসি থেংনবা ঙমহনলিবনি। লৈবাক অসিনা মীয়ামগী নোঙমগী তঙাই ফদনা চংদ্রবা য়াদ্রবা পোৎ-চৈশিংবু মীওই খুদিংমক্তা ফংহন্দুনা মালেমগী খ্বাইদগী চেকশিনবা লোকদাউন মনুংদা মীওইশিংবু ময়ুমদা লৈহন্দুনা তেক্ত কায়দনা থম্বা ঙম্বা অসি হন্দক্কী অসিনা অহানবনি। রেলৱে অমসুং ফুদ অমসুং দিস্ত্রিব্যুসন বিভাগনা খুৎশম্নদুনা লোকদাউন মনুং অসিদা মীওই খুদিংদা চানবা চিঞ্জাক, হার, শঙ্গোম অমসুং অতোপ্পা তঙাই ফদবা পোৎ-চৈশিং ৱাত্তনা ফংহন্নবা হোৎনখি।

শ্রী গোয়লনা এফ.আই.সি.সি.আই. ইন্দিয়ানা পায়খৎলিবা খোঙথাংশিং অসি আত্মানির্ভর ভারতকী অশেংবা ৱাখল্লোনগা লোয়ননা লৈবাক অসিদা শেম-শাজবা প্লেৎফোর্ম শিজিন্নদুনা পাঙথোকখিবনি হায়খি। লায়চৎ অসিনা পুরক্লিবা অহোংবশিং অসিনা পুক্নিং থৌগৎনিংঙাই ওইবা থৌওং কয়া অমা পুরক্তুনা খ্বাইদগী মনুং হঞ্জিন্না লৈবা মফমশিং চাউখৎহনবদা তেংবাংগনি অমসুং ঐখোয়না তেক্নোলোজী শিজিন্নবা হৌরকপা অসিনা লৈবাক শিনবা থুংবদা লৈবা মীয়ামসু শরুক য়াহন্দুনা মালেমগী সপ্লাই চেনগী থাজবা য়াবা শরুক অমসু ওইহল্লে হায়না মহাক্না মখা তানা হায়খি। “ঐখোয়না অহোংবা অসিগা চান্ননা চৎপা ঙম্লকপগা লোয়ননা মীওইবা খুন্নাইবু চাউখৎপা অমসুং নুংঙাই য়াইফবরোমদা পুদুনা চৎপা ঙম্লগনি। ঐখোয়না হৌজিক চত্থরিবা থবকশিং অসিনা ভারতকী শাহৌ লৌববু লোকেল অমসুং মালেমগী সপ্লাই চেনশিংদা অনৌবা মফম অমদা লৈহনবা ঙম্লগনি” হায়না মহাক্না হায়খি। শ্রী গোয়লনা ভারত অসি মালেমগী সপ্লাই চেনগী শরুক অমা ওইবা য়াগনি অমসুং মসিনা মীওই মিলিয়ন কয়াদা থবক্কী খুদোংচাবা পীদুনা ভারতকী মীয়াম অসিবু মালেমগা খুৎশম্ননা চৎমিন্নরিবা অসিগী শরুক অমা ওইহন্নবা মতিক চাহল্লগনি হায়না অমুক্কা হন্না হায়খি।

শ্রী গোয়লনা হায়খিবদা তোঙান তোঙানবা ইন্দিকেতরশিংদগী উবা ফংবগী মতুং ইন্না ভারতকী শেন্মিৎলোন অসি খোঙজেল য়াঙনা হিংগৎলকপগী লম্বীদা চৎলি হায়খি। রেল ফ্রাইৎ অমসুং ইলেক্ত্রিসিতী শিজিন্নবগী চাং অসি মমাং চহিদা ওইখিবা থাক অদু য়ৌবা ঙম্লে, মীরমদা পোত্থোক থাদোকপসু মমাংগী চহিগী চাংগী ৯১% অমসুং মীরমদগী পোত্থোকপা পুশিল্লকপনা চাউরাক্না ৭৯% য়ৌরে।

শ্রী গোয়লনা ভারতকী ইন্দস্ত্রীশিংদা পুন্না চৎমিন্নসি, অমনা অমবু শৌগৎনসি অমসুং লাক্কদৌরিবা চারোন শুরোন কয়াগী ওইনা তুং কোইনা চৎকদবা চাউখৎপা ভারত অমা ওইহন্নবা থবক তৌমিন্নরসি হায়বগী ৱাফম হৌদোকখি।

***