ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଏକ ଭିଡିଓ କନ୍‌ଫରେନ୍ସିଂ ବ୍ୟବସ୍ଥାରେ ଆସାମ, ବିହାର, ଉତ୍ତର ପ୍ରଦେଶ, ମହାରାଷ୍ଟ୍ର, କର୍ଣ୍ଣାଟକ ଏବଂ କେରଳ ଆଦି 6ଟି ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ସେସବୁ ରାଜ୍ୟର ବନ୍ୟା ପରିସ୍ଥିତି ଏବଂ ସାହାଯ୍ୟ ଓ ଉଦ୍ଧାର କାର୍ଯ୍ୟର ସମୀକ୍ଷା କରିଛନ୍ତି  । ଏହି ଅବସରରେ ସେ ମଧ୍ୟ ମୌସୁମି ପ୍ରବାହ ଜନିତ ବର୍ଷା ଓ ବନ୍ୟା ବିତ୍ପାତର ମୁକାବିଲା ପାଇଁ ସଂପୃକ୍ତ ରାଜ୍ୟମାନେ କି ପ୍ରକାର ପ୍ରସ୍ତୁତି କାର୍ଯ୍ୟ କରିଛନ୍ତି ତାହା ମଧ୍ୟ ପଚାରି ବୁଝିଛନ୍ତି । ଏହି ବୈଠକରେ ପ୍ରତିରକ୍ଷା ମନ୍ତ୍ରୀ, ସ୍ୱାସ୍ଥ୍ୟମନ୍ତ୍ରୀ, ସ୍ୱରାଷ୍ଟ୍ର ମନ୍ତ୍ରଣାଳୟର ଦୁଇ ରାଷ୍ଟ୍ରମନ୍ତ୍ରୀ ଏବଂ ବିଭିନ୍ନ କେନ୍ଦ୍ରୀୟ ମନ୍ତ୍ରଣାଳୟ ତଥା ପ୍ରତିଷ୍ଠାନର ବରିଷ୍ଠ ଅଧିକାରୀମାନେ ଯୋଗଦେଇଥିଲେ ।

ବୈଠକ ଅବସରରେ ପ୍ରଧାନମନ୍ତ୍ରୀ ଏକ ସ୍ଥାୟୀ ବନ୍ୟା ପୂର୍ବାଭାସ ବ୍ୟବସ୍ଥା ସୃଷ୍ଟି ଏବଂ ଲୋକଙ୍କୁ ଆଗୁଆ ସତର୍କ କରାଇବା ପାଇଁ ଅଭିନବ ଟେକ୍‌ନୋଲଜି ବ୍ୟବହାର କରିବାକୁ ଗୁରୁତ୍ୱ ଦେଇଥିଲେ । ଏ କ୍ଷେତ୍ରରେ ରାଜ୍ୟ ଓ କେନ୍ଦ୍ରୀୟ ସଂସ୍ଥାଗୁଡିକ ମଧ୍ୟରେ ଅଧିକ ସହଯୋଗ ରକ୍ଷା କରିବାକୁ ସେ ପରାମର୍ଶ ଦେଇଥିଲେ । ପ୍ରଧାନମନ୍ତ୍ରୀ  କହିଥିଲେ ଯେ ଗତ କେତେବର୍ଷ ହେଲା ଭାରତୀୟ ପାଣିପାଗ ବିଭାଗ ଓ କେନ୍ଦ୍ରୀୟ ଜଳ ଆୟୋଗ ଏ କ୍ଷେତ୍ରରେ ସମନ୍ୱିତ ଉଦ୍ୟମ ଜାରି ରଖିଛନ୍ତି । ଏହି ଦୁଇ ସଂସ୍ଥା ବର୍ଷା ଓ ସମ୍ଭାବ୍ୟ ବନ୍ୟା ସଂପର୍କରେ ରାଜ୍ୟମାନଙ୍କୁ ଅଧିକ ବିଶ୍ୱାସଯୋଗ୍ୟ ଆଗୁଆ ତଥ୍ୟ ପ୍ରଦାନ କରୁଛନ୍ତି । ସେମାନଙ୍କ କାର୍ଯ୍ୟ ଆଉ ବର୍ଷା ଏବଂ ନଦୀର ଜଳପତ୍ତନ ସଂକ୍ରାନ୍ତ ତଥ୍ୟରେ ସୀମିତ ନାହିଁ । ନିର୍ଦ୍ଦିଷ୍ଟ କେଉଁ ଅଞ୍ଚଳରେ ଅତି ଅଧିକ ବର୍ଷାହେବ ଏବଂ କେଉଁଠି ବନ୍ୟା ବିତ୍ପାତ ଦେଖାଦେବ ସେ ବିଷୟରେ ମଧ୍ୟ ଏହି ଦୁଇ ସଂସ୍ଥା ଆଗୁଆ ତଥ୍ୟ ପ୍ରଦାନ କରୁଛନ୍ତି । ବର୍ଷା ଓ ବନ୍ୟା ସଂପର୍କରେ ନିର୍ଦ୍ଦିଷ୍ଟ ସ୍ଥାନଭିତ୍ତିକ ପୂର୍ବାନୁମାନ କରିବା ପାଇଁ ଏବେ ପାଇଲଟ ଭିତ୍ତିରେ ଆର୍ଟିଫିସିଆଲ ଇଣ୍ଟିଲିଜେନ୍ସି ଭଳି ଅଭିନବ ଟେକ୍‌ନୋଲଜି ବ୍ୟବହାର କରାଯାଉଛି । ଏ କ୍ଷେତ୍ରରେ ସଂପୃକ୍ତ ରାଜ୍ୟମାନେ ସହଯୋଗ କରି ସ୍ଥାନୀୟ ଲୋକଙ୍କୁ ଯଥେଷ୍ଟ ଆଗରୁ ସତର୍କ ସୂଚନା ପ୍ରଦାନ କରିବାକୁ ସେ ପରାମର୍ଶ ଦେଇଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି ଯେ ସ୍ଥାନୀୟଭାବେ ସତର୍କ  ସୂଚନା ପ୍ରଦାନ କରିବା ବ୍ୟବସ୍ଥା ଉପରେ ଅଧିକରୁ ଅଧିକ ଅର୍ଥ ବିନିଯୋଗର ଆବଶ୍ୟକତା ରହିଛି । ଏହାଫଳରେ ଆଗୁଆ ଠିକ୍‌  ସୂଚନା ମିଳିଲେ ସ୍ଥାନୀୟ ଅଞ୍ଚଳର ଲୋକେ ବଡ଼ ବନ୍ୟା ବା ବର୍ଷା ବିତ୍ପାତ, ବନ୍ଧ ଭାଙ୍ଗିବା, ବଜ୍ରପାତ ଏବଂ ପ୍ଳାବନଜନିତ କ୍ଷତିରୁ ନିଜକୁ ସୁରକ୍ଷିତ ରଖିପାରିବେ । କୋଭିଡ୍‌ ମହାମାରୀ ଭଳି ପରିସ୍ଥିତିରେ ଯେତେବେଳେ ବନ୍ୟାଞ୍ଚଳରେ ସାହାଯ୍ୟ ଓ ଉଦ୍ଧାର କାର୍ଯ୍ୟ ଚାଲୁଛି ସେତେବେଳେ ସମସ୍ତେ ଯେପରି ସ୍ୱାସ୍ଥ୍ୟରକ୍ଷା ନିୟମ ପାଳନ କରନ୍ତି ତାହା ନିଶ୍ଚିତ କରିବାକୁ ସେ ପରାମର୍ଶ ଦେଇଛନ୍ତି । ମାସ୍କ ପିନ୍ଧିବା, ହ୍ୟାଣ୍ଡ ସାନିଟାଇଜେସନ ଏବଂ ସାମାଜିକ ଦୂରତ୍ୱ ରକ୍ଷା କରିବାକୁ ସେ କହିଛନ୍ତି । ରିଲିଫ ସାମଗ୍ରୀ ମଧ୍ୟରେ ହାତଧୁଆ ସାମଗ୍ରୀ ଯଥା ସାନିଟାଇଜର ଏବଂ ଫେସ୍‌ ମାସ୍କ ଆଦି ବିପନ୍ନ ଲୋକଙ୍କୁ ଯୋଗାଇ ଦେବାକୁ ସେ ଗୁରୁତ୍ୱାରୋପ କରିଛନ୍ତି । ଏ କ୍ଷେତ୍ରରେ ବୟସ୍କ ବ୍ୟକ୍ତି, ଗର୍ଭବତୀ ମହିଳା ଏବଂ ପୁରୁଣା ବ୍ୟାଧି ଥିବା ଲୋକଙ୍କ ସ୍ୱାସ୍ଥ୍ୟ ପ୍ରତି ସ୍ୱତନ୍ତ୍ର ଦୃଷ୍ଟି ଦେବାକୁ ସେ କହିଛନ୍ତି । ଆବଶ୍ୟକ ପଡିଲେ ସେମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରିବାକୁ ସେ ନିର୍ଦେଶ ଦେଇଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ ସ୍ଥାନୀୟ ବିତ୍ପାତର ମୁକାବିଲା ପାଇଁ ସମସ୍ତ ପ୍ରକାର ବିକାଶମୂଳକ କାର୍ଯ୍ୟ ଓ ଭିତ୍ତିଭୂମି ପ୍ରକଳ୍ପକୁ ସ୍ୱଚ୍ଛତା ଓ ନିଷ୍ଠାର ସହିତ କାର୍ଯ୍ୟକାରୀ କରିବାକୁ ରାଜ୍ୟମାନେ ଗୁରୁତ୍ୱ ଦେବା ଆବଶ୍ୟକ । ଏହା ଫଳରେ କ୍ଷୟକ୍ଷତିର ପରିମାଣ ଯଥେଷ୍ଟ ହ୍ରାସ ପାଇବ ।

ଆସାମ, ବିହାର, ଉତ୍ତରପ୍ରଦେଶ, ମହାରାଷ୍ଟ୍ର, କେରଳର ମୁଖ୍ୟମନ୍ତ୍ରୀ, କର୍ଣ୍ଣାଟକର ଘରୋଇ ବିଭାଗ ମନ୍ତ୍ରୀ ନିଜ ନିଜର ରାଜ୍ୟର ବନ୍ୟା ପରିସ୍ଥିତିର ସର୍ବଶେଷ ତଥ୍ୟ ଏବଂ ସାହାଯ୍ୟ ଓ ଉଦ୍ଧାର କାର୍ଯ୍ୟ ସଂପର୍କରେ ପ୍ରଧାନମନ୍ତ୍ରୀଙ୍କ ଅବଗତ କରାଇଥିଲେ । ସାହାଯ୍ୟ ଓ ଉଦ୍ଧାର କାର୍ଯ୍ୟରେ ଉପଯୁକ୍ତ ସମୟରେ ଏନ୍‌ଡିଆରଏଫ ଦଳ ଓ ଅନ୍ୟାନ୍ୟ କେନ୍ଦ୍ରୀୟ ସଂସ୍ଥା ସହଯୋଗ କରୁଥିବାରୁ ସେମାନେ ସନ୍ତୋଷ ପ୍ରକାଶ କରିବା ସହ ସେମାନଙ୍କ କାର୍ଯ୍ୟର ପ୍ରଶଂସା କରିଥିଲେ । ବନ୍ୟାର ସ୍ଥାୟୀ ପ୍ରତିକାର ଏବଂ ଲୋକଙ୍କ ଦୁର୍ଦ୍ଦଶା ହ୍ରାସ ପାଇଁ କେତେକ ସ୍ୱଳ୍ପ ଓ ଦୀର୍ଘମିଆଦୀ ପଦକ୍ଷେପ ସଂପର୍କରେ ସେମାନେ ପ୍ରଧାନମନ୍ତ୍ରୀଙ୍କୁ ପ୍ରସ୍ତାବ ଦେଇଥିଲେ । ରାଜ୍ୟଗୁଡିକ ଦେଇଥିବା ପ୍ରସ୍ତାବ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରଧାନମନ୍ତ୍ରୀ ସଂପୃକ୍ତ ମନ୍ତ୍ରଣାଳୟ ଏବଂ ସଂସ୍ଥାଗୁଡିକର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ । ବନ୍ୟା ସମେତ ବିଭିନ୍ନ ବିପତ୍ତିର ମୁକାବିଲା ପାଇଁ ରାଜ୍ୟଗୁଡିକୁ ସବୁମନ୍ତେ ସାହାଯ୍ୟ ସହଯୋଗ କରାଯିବ ବୋଲି ପ୍ରଧାନମନ୍ତ୍ରୀ  ପ୍ରତିଶ୍ରୁତି ଦେଇଥିଲେ ।

**********