সাউথ-ৱেস্ত মোন্সুন অমসুং লৈবাক অসিগী হৌজিক ওইরিবা ইচাউগী ফিবম থেংননবা মখোয়না থৌরাং তৌরবশিং হন্না য়েংশিন্নবা ভিদিও কনফরেন্সকী খুৎথাংদা ঙসি প্রধান মন্ত্রী নরেন্দ্র মোদীনা অসাম, বিহার, উত্তর প্রদেস, মহারাস্ত্রা, কর্নাতাকা অমসুং কেরলাগী চীফ মিনিস্তরশিংগা উনখ্রে। মীফম অদুদা দিফেন্স মিনিস্তর, হেল্থ মিনিস্তর, হোম এফেয়ার্সকী রাজ্য মন্ত্রী অনিমক অমসুং মরী লৈনবা মিনিস্ত্রিশিং অমসুং লুপশিংগী সেনিয়র ওফিসারশিং শরুক য়াখি।

তুংকোইনা চৎনগদবা ইচাউ মাংজৌননা লাউথোক্নবা থবক পায়খৎনবা অমসুং মাংজৌননা চেকশিনৱারোল লাউথোকপগী থবকশিং ফগৎহন্নবা অনৌবা তেক্নোলোজীশিং মপুংফানা শীজিন্ননবা কেন্দ্র অমসুং রাজ্যশিংগী লুপশিংগী মরক্ত হেন্না মতেং পাংন্নবা প্রধান মন্ত্রীনা তকশিনখি।

প্রধান মন্ত্রীনা হায়খি, হৌখিবা চহি খর অসিদা, মাংজৌননা লাউথোক্নবা লৈরিবা লুপশিং হায়বদি ইন্দিয়া মেতিওরোলোজিকেল দিপার্তমেন্ত অমসুং সেন্ত্রেল ৱাতর কমিসন্না হেন্না ফবা অমসুং কান্নবা মওংদা ইচাউ মাংজৌননা লাউথোক্নবা থবকশিং পায়খৎলে। মখোয়না নোংজুগী চাং
অমসুং তুরেলগী ঈশিং ইমাইগী মতাংদা মাংজৌননা পাউ পীবা খক নত্তনা অকক্নবা মফম অমদা ঈশিং থুমজিল্লকপগী মতাংদা মাংজৌননা পাউ পীনবা হোৎনরি। অকক্নবা মফম অমগী মাংজৌননা পাউ পীনবা থবক ফগৎহন্নবা অনৌবা তেক্নোলোজীশিং হায়বদি আর্তিফিসিএল ইন্তিলিজেন্স শীজিন্ননবা চাংয়েং ওইনা থবক পায়খৎলে। মসিদা রাজ্যশিংদা লুপশিংনা মতম চানা দরকার ওইবা ই-পাউশিং খঙহনগনি অমসুং মীয়ামদা মতম চানা চেকশিনৱারোলশিং লাউথোক্কনি।

মহাক্না হায়খি খুদোংথিনিংঙাই ওইবা ফিবমশিং হায়বদি তুরেল মপান নিংখাইরকপা, ঈশিং ইমাই হেনগৎলকপা, ব্রাজ তাবা অসিনচিংবা থৌদোকশিং মতম চানা চেকশিনৱারোল পীনবা  মফম অমদা মাংজৌননা চেকশিনৱারোল লাউথোক্নবা থবকশিংগী শেন থাদবা হেনগৎহনগদবনি।

প্রধান মন্ত্রীনা হায়খি কোবিদ-১৯গী হৌজিক ওইরিবা ফিবম অসি য়েংলগা মী কনবগী থবকশিং পাংথোকপা মতমদা মীয়াম্না হকশেলগী চেকশিন-থৌরাংশিং হায়বদি মাক্স উপ্পা, খুৎ তোইনা হাম্বা অমসুং থাপ্না লৈবা অসি ঙাক্কদবনি অমসুং তেংবাং পোৎলমশিং অদুগী মনুংদা সেনিতাইজর অমসুং মাক্স য়াওহনগদবনি। অহলশিং,মীরোনবীশিং অমসুং অতোপ্পা লায়না লৈবা মীওইশিংগী অখন্নবা পোৎলমশিং ফংহনগদবনি।

চাউখৎ-থৌরাংগী থবকশিং অমসুং ইনফ্রাস্ত্রকচর প্রোজেকশিং পায়খৎপা মতমদা অমাং-অতা ঙাকথোকপা ঙম্নবা শানবা অমসুং তুংদা থোরক্কদবা অমাং-অতাদগী কন্নবা থবক পায়খৎনবা মহাক্না রাজ্যশিংদা খঙহনখি।

অসাম,বিহার,উত্তর প্রদেস, মহারাস্ত্রা,কেরলাগী চীফ মিনিস্তরশিং অমসুং কর্নাতাকাগী হোম মিনিস্তরনা মখোয়গী রাজ্যশিংগী ইচাউগী ফিবমশিং অমসুং মী কনবগী পায়খৎলিবা থবকশিংগী মতাংদা পাউদমখি। মতম চানা থারকপা অমসুং মী কনবগী থবক পায়খৎপগীদমক এন.দি.আর.এফ য়াওনা সেন্ত্রেল এজেন্সিশিং মখোয়না থাগৎখি। ইচাউ লাকশিন্নবা পায়খৎকদবা অতেনবা অমসুং অশাংবা মতমগী থবকশিংগী মতাংদা মখোয় ৱাফম কয়া ফোঙদোকখি।

রাজ্যশিংনা পীরিবা পাউতাকশিং অসি থবক ওইনা পায়খৎনবা মরী লৈনবা মিনিস্ত্রিশিং অমসুং লুপশিংগী ওফিসারশিংদা প্রধান মন্ত্রীনা খঙহনখি অমসুং তোঙান-তোঙানবা খুদোংথিবশিং থেংননবা মখোয়গী তৌবা ঙম্বা হেনগৎহন্নবা রাজ্য অমসুং য়ুনিয়ন তেরিতোরিশিংদা কেন্দ্রনা মখা তানা মতেং পীগনি হায়না থাজবা পীখি।

***