ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜକୁ ଭାରତୀୟ ମୂଳଭୂଖଣ୍ଡରେ ଯୋଡିବା ପାଇଁ ଉଦ୍ଦିଷ୍ଟ ସମୁଦ୍ରତଳ କେବୁଲ ସଂଯୋଗ ବ୍ୟବସ୍ଥାର ଆଜି ଶୁଭାରମ୍ଭ କରିଛନ୍ତି । ଏକ ଭିଡିଓ କନ୍‌ଫରେନ୍ସିଂ ବ୍ୟବସ୍ଥାରେ ପ୍ରଧାନମନ୍ତ୍ରୀଙ୍କ ଦ୍ୱାରା ଏହି ପ୍ରକଳ୍ପ ଜାତି ଉଦ୍ଦେଶ୍ୟରେ ଉତ୍ସର୍ଗୀକୃତ ହୋଇଛି । 2018 ଡିସେମ୍ବରେ 30ରେ ପୋର୍ଟବ୍ଲେୟାରଠାରେ ଅନୁଷ୍ଠିତ ଏକ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଏହି ପ୍ରକଳ୍ପର ଶିଳାନ୍ୟାସ କରିଥିଲେ ।

ଏହି ଅବସରରେ ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଛନ୍ତି ଯେ, ଉକ୍ତ ସଂଯୋଗ ଫଳରେ ଏବେ ସଂପୃକ୍ତ ଦ୍ୱୀପଗୁଡିକରେ ଅସୀମ ସୁଯୋଗ ସୃଷ୍ଟି ହେବ । ସେ କହିଛନ୍ତି ଯେ 2300 କିମି ଲମ୍ବର ସମୁଦ୍ର ତଳେ ଏହି କେବୁଲ ବିଛାଇବା କାମ ନିର୍ଦ୍ଧାରିତ ସମୟ ପୂର୍ବରୁ ଶେଷ ହେବା ପ୍ରଶଂସାଯୋଗ୍ୟ । ଆଜିଠାରୁ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜ ଭାରତୀୟ ମୁଖ୍ୟ ଭୂଖଣ୍ଡ ଚେନ୍ନଇ ସହିତ ଟେଲି ଯୋଗାଯୋଗ କ୍ଷେତ୍ରରେ ସିଧାସଳଖ ସଂଯୁକ୍ତ ହୋଇପାରିଛି । ଆଜିଠାରୁ ଏହି ଦୁଇ ଦ୍ୱୀପର ଅଧିକାଂଶ ଅଞ୍ଚଳରେ ଏହାର ସେବା ଉପଲବ୍ଧ ହୋଇଛି । ଚେନ୍ନଇରୁ ପୋର୍ଟବ୍ଲେୟାର, ପୋର୍ଟବ୍ଲେୟାରରୁ ଲିଟିଲ ଆଣ୍ଡାମାନ ଏବଂ ପୋର୍ଟବ୍ଲେୟାରରୁ ସ୍ୱରାଜ ଆଇଲାଣ୍ଡ ମଧ୍ୟରେ କେବୁଲ ସେବା କାର୍ଯ୍ୟକ୍ଷମ ହୋଇଛି ।

ପ୍ରଧାନମନ୍ତ୍ରୀ ସମୁଦ୍ର ତଳେ 2300 କିମି ଲମ୍ବ କେବୁଲ ବିଛା କାମକୁ ଉଚ୍ଚ ପ୍ରଶଂସା କରିଛନ୍ତି । ସେ କହିଛନ୍ତି ଯେ ଗଭୀର ସମୁଦ୍ର ତଳେ ଏଥିପାଇଁ ସର୍ଭେ କରିବା, କେବୁଲର ମାନ ବଜାୟ ରଖିବା ଏବଂ ସ୍ୱତନ୍ତ୍ର ପୋତଦ୍ୱାରା କେବୁଲ ବିଛାଇବା କାମ ସଂପୂର୍ଣ୍ଣ କରିବା ସହଜ ନୁହେଁ । ଉଚ୍ଚ ଲହଡି, ଝଡବାତ୍ୟା ଏବଂ ମୌସୁମି ତଥା କରୋନା ମହାମାରୀ ଜନିତ ପ୍ରତିକୂଳ ପରିବେଶ ମଧ୍ୟରେ ଏହି କାର୍ଯ୍ୟ ଧାର୍ଯ୍ୟ ସମୟ ପୂର୍ବରୁ ଶେଷ ହେବା ଏକ ପ୍ରଶଂସାଯୋଗ୍ୟ ଘଟଣା । ସେ କହିଛନ୍ତି ଯେ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜର ଲୋକମାନେ ଦୀର୍ଘଦିନ ଧରି ଏହି ସେବା ଲୋଡୁଥିଲେ; କିନ୍ତୁ ତାହାକୁ ପୂରଣ କରିବା ପାଇଁ କୌଣସି ପଦକ୍ଷେପ ନିଆଯାଉନଥିଲା । ବିଭିନ୍ନ ଗୁରୁତର ଆହ୍ୱାନ ସତ୍ତ୍ୱେ ଏହି ପ୍ରକଳ୍ପର କାର୍ଯ୍ୟ ଶେଷ ହୋଇ ଏହା ଜନତାଙ୍କ କାର୍ଯ୍ୟରେ ଲାଗିଥିବାରୁ ସେ ସନ୍ତୋଷ ପ୍ରକାଶ କରିଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି ଯେ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜକୁ ଉତ୍ତମ ତଥା ଶସ୍ତା ସଂଯୋଗ ବ୍ୟବସ୍ଥା ଯୋଗାଇ ଦେବା ଦେଶର ଦାୟିତ୍ୱ । ଏହି ପ୍ରକଳ୍ପ ସହିତ ଯେଉଁମାନେ ସଂପୃକ୍ତ ସେମାନେ ଅଭିନନ୍ଦନୀୟ । ଏବେ ସମୁଦ୍ର ତଳ କେବୁଲ ସଂଯୋଗ ବ୍ୟବସ୍ଥାରେ ଆଣ୍ଡାମାନ ଓ ନିକୋବର ସଂଯୁକ୍ତ ହେବା ଫଳରେ ଏହା ଏବେ ଭାରତର ମୁଖ୍ୟ ଭୂଖଣ୍ଡ ଏବଂ ରାଜଧାନୀ ଦିଲ୍ଲୀଠାରୁ ଦୂରରେ ରହିବ ନାହିଁ ।

ସବୁ ନାଗରିକଙ୍କ ଜୀବନ ସହଜ କରିବାରେ ସୁଯୋଗ

ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଛନ୍ତି ଯେ ଦେଶର ପ୍ରତ୍ୟେକ ନାଗରିକ ଏବଂ ପ୍ରତ୍ୟେକ କ୍ଷେତ୍ରକୁ ଅତ୍ୟାଧୁନିକ ସୁବିଧା ସୁଯୋଗ ଯୋଗାଇଦେବା ନିମନ୍ତେ ସରକାର ଅଙ୍ଗୀକାରବଦ୍ଧ । ଏହାଫଳରେ ସଂପୃକ୍ତ ଅଞ୍ଚଳର ବିକାଶ ଓ ନାଗରିକଙ୍କ ଜୀବନଧାରଣର ମାନରେ ଉନ୍ନତି ଘଟିବ । ସେମାନେ ସୁବିଧାରେ ଏବଂ ସହଜରେ ବଞ୍ଚିପାରିବେ । ସେ କହିଛନ୍ତି ଯେ ଏହି ଅପ୍‌ଟିକାଲ ଫାଇବର ପ୍ରକଳ୍ପ ଯାହା ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜକୁ ଅବଶିଷ୍ଟ ଭାରତ ସହ ଯୋଡିଛି ତାହା ଲୋକଙ୍କ ଜୀବନଯାପନକୁ ସହଜ କରିବା ପାଇଁ ସରକାରଙ୍କ ଅଙ୍ଗୀକାରବଦ୍ଧତାର ଏକ ବଳିଷ୍ଠ ଉଦାହରଣ । ଦ୍ୱୀପରାଜ୍ୟ ଏବଂ ସୀମାନ୍ତ ଅଞ୍ଚଳଗୁଡିକର ନିରାପତ୍ତା ରକ୍ଷା ସହିତ ସେସବୁ ଅଞ୍ଚଳର ବିକାଶ କାର୍ଯ୍ୟକୁ ତ୍ୱରାନ୍ୱିତ କରିବାକୁ ସରକାର ଅଙ୍ଗୀକୃତ ।

ଡିଜିଟାଲ ଇଣ୍ଡିଆ ମାଧ୍ୟମରେ ଅଧିକ ସୁଯୋଗ ସୃଷ୍ଟି

ପ୍ରଧାନମନ୍ତ୍ରୀ କହିଛନ୍ତି ଯେ ଏହି ସମୁଦ୍ରତଳ କେବୁଲ ସଂଯୋଗ ଦ୍ୱାରା ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜବାସୀ ସୁଲଭ ଓ ଉତ୍ତମ ସଂଯୋଗ ସୁବିଧା ପାଇବେ ଏବଂ ଡିଜିଟାଲ ଇଣ୍ଡିଆର ସମସ୍ତ ଲାଭ ସେମାନଙ୍କୁ ମିଳିବ । ଅନ୍‌ଲାଇନ ଶିକ୍ଷା, ଟେଲି ମେଡିସିନ୍‌, ବ୍ୟାଙ୍କିଙ୍ଗ ବ୍ୟବସ୍ଥା, ଅନ୍‌ଲାଇନ ବାଣିଜ୍ୟ କାରବାର ଏବଂ ପର୍ଯ୍ୟଟନର ବିକାଶରେ ଏହା ବିଶେଷ ସହାୟକ ହେବ । ସେ କହିଛନ୍ତି ଯେ ଭାରତ ମହାସାଗର ହଜାର ହଜାର ବର୍ଷ ଧରି ଭାରତର ସାମୁଦ୍ରିକ ବାଣିଜ୍ୟ ଓ ରଣକୌଶଳାତ୍ମକ ସାମର୍ଥ୍ୟର କେନ୍ଦ୍ରବିନ୍ଦୁ ହୋଇ ରହିଆସିଛି । ଏହାଛଡା ଆଣ୍ଡାମାନ ଓ ନିକୋବର ଦ୍ୱୀପ ଭାରତର ଆର୍ଥିକ ରଣକୌଶଳାତ୍ମକ ସହଯୋଗରେ ଏକ ଗୁରୁତ୍ୱପୂର୍ଣ୍ଣ କେନ୍ଦ୍ରଭାବେ କାର୍ଯ୍ୟ କରୁଛି । ସେ କହିଛନ୍ତି ଯେ ଭାରତର ସବୁ ଦ୍ୱୀପ ଭାରତ ଓ ପ୍ରଶାନ୍ତ ମହାସାଗର ଅଞ୍ଚଳରେ ଦେଶର ନୂଆ ବାଣିଜ୍ୟ ରଣନୀତିରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ । ପ୍ରାଚ୍ୟାଭିମୁଖୀ ନୀତି ବା ଆକ୍ଟ ଇଷ୍ଟ ପଲିସି ଅନୁସାରେ ଏହି ଦୁଇ ଦ୍ୱୀପ ଦକ୍ଷିଣ ପୂର୍ବ ଏସୀୟ ରାଷ୍ଟ୍ରଙ୍କ ସହ ସଂପର୍କ ବୃଦ୍ଧିରେ ଏକ ଅତି ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବ । ସେ କହିଛନ୍ତି ଯେ 3 ବର୍ଷ ତଳେ ଗଠିତ ହୋଇଥିବା ଦ୍ୱୀପ ବିକାଶ ସଂସ୍ଥା ଏବେ ଅଧିକ ମଜଭୁତ ହୋଇ ତାହାର ଦାୟିତ୍ୱ ନିର୍ବାହ କରୁଛି । ବର୍ଷ ବର୍ଷ ଧରି ଆଣ୍ଡାମାନ ଓ ନିକୋବରରେ ପଡି ରହିଥିବା ପ୍ରକଳ୍ପମାନ ଏବେ ତ୍ୱରିତ ଗତିରେ ସଂପୂର୍ଣ୍ଣ ହେବାରେ ଲାଗିଛି ।

ଉଚ୍ଚ ପ୍ରଭାବଶାଳୀ ପ୍ରକଳ୍ପ ଏବଂ ଉତ୍ତମ ଜଳ, ସ୍ଥଳ ଓ ଆକାଶ ପଥ

ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଛନ୍ତି ଯେ ଆଣ୍ଡାମାନ ଓ ନିକୋବରର 12ଟି ଯାକ ଦ୍ୱୀପରେ ଉଚ୍ଚ ପ୍ରଭାବଶାଳୀ ପ୍ରକଳ୍ପମାନ କାର୍ଯ୍ୟକାରୀ ହେବା ସହ ତାହାର କାୟା ବିସ୍ତାରିତ ହୋଇଛି । ଉତ୍ତମ ଇଣ୍ଟରନେଟ ଓ ମୋବାଇଲ ସଂଯୋଗ ସହିତ ଏସବୁ ଦ୍ୱୀପକୁ ଜଳ, ସ୍ଥଳ ଓ ଆକାଶ ପଥରେ ସଂଯୁକ୍ତ କରିବା ପାଇଁ ନୂଆ ନୂଆ ପ୍ରକଳ୍ପମାନ କାର୍ଯ୍ୟକାରୀ ହେଉଛି । ସେ କହିଛନ୍ତି ଯେ ଉତ୍ତର ଏବଂ ମଧ୍ୟ ଆଣ୍ଡାମାନ ମଧ୍ୟରେ ସଡକ ସଂଯୋଗ ପ୍ରତିଷ୍ଠା ପାଇଁ ଦୁଇଟି ବଡ଼ ସେତୁ ନିର୍ମାଣ କାର୍ଯ୍ୟ ଚାଲିଛି । ଏହା ଜାତୀୟ ରାଜପଥ-4ରେ ନିର୍ମିତ ହେଉଛି । ଏହାଛଡା ପୋର୍ଟବ୍ଲେୟାର ବିମାନଘାଟିର କଳେବର ବୃଦ୍ଧି କରାଯାଇ 1200 ଯାତ୍ରୀଙ୍କୁ ପରିବହନ ସୁବିଧା ଯୋଗାଇ ଦେବା ପାଇଁ କାର୍ଯ୍ୟ ଚାଲିଛି । ଏହା ସହିତ ଡିଗ୍ଲିପୁର, କାରନିକୋବର ଏବଂ କ୍ୟାମ୍ଫବେଲ୍‌-ବେ’ରେ 3ଟି ନୂଆ ବିମାନଘାଟି ନିର୍ମାଣ କାର୍ଯ୍ୟ ସରିଛି । ଏସବୁ ଏବେ ସେବା ଯୋଗାଇଦେବା ପାଇଁ ପ୍ରସ୍ତୁତ । ଏହାଛଡା ସ୍ୱରାଜ ଦ୍ୱୀପରେ ଯାତ୍ରୀ ଟର୍ମିନାଲ ସହିତ ଡିପ୍‌ ଓ ଲଙ୍ଗ୍‌ ଆଇଲାଣ୍ଡରେ ୱାଟର ଏରୋଡ୍ରମ ସୁବିଧା କରାଯାଉଛି । କେତେକ ସ୍ଥାନରେ ମଧ୍ୟ ଭାସମାନ ଜେଟି ନିର୍ମାଣ କାର୍ଯ୍ୟ ଚାଲିଛି । ଖୁବ୍‌ଶୀଘ୍ର ଏହିସବୁ ପ୍ରକଳ୍ପ କାର୍ଯ୍ୟକ୍ଷମ ହେବ । କୋଚି ଜାହାଜ ତିଆରି କାରଖାନାରେ ନିର୍ମାଣ ହେଉଥିବା 4ଟି ଜାହାଜ ଖୁବ୍‌ଶୀଘ୍ର ଆଣ୍ଡାମାନ ଓ ନିକୋବରକୁ ଯୋଗାଇ ଦିଆଯିବ । ଏହି ଦ୍ୱୀପ ଏବଂ ଭାରତୀୟ ମୁଖ୍ୟ ଭୂଖଣ୍ଡ ସହ ସଂପର୍କ ରକ୍ଷାରେ ଏହା ସାହାଯ୍ୟ କରିବ ବୋଲି ସେ କହିଛନ୍ତି ।

ବନ୍ଦରଭିତ୍ତିକ ବିକାଶ

ଶ୍ରୀ ମୋଦୀ କହିଛନ୍ତି ଯେ ବନ୍ଦରଭିତ୍ତିକ ବିକାଶ ଶୈଳୀରେ ଆଣ୍ଡାମାନ ଓ ନିକୋବର ଦ୍ୱୀପରେ ନବନିର୍ମାଣ କାର୍ଯ୍ୟ ଚାଲିଛି ଏବଂ ଏହାକୁ ଏକ ବନ୍ଦରଭିତ୍ତିକ ହବ୍‌ରେ ପରିଣତ କରିବା ପାଇଁ ଲକ୍ଷ୍ୟ ରଖାଯାଇଛି । ଏହି ପ୍ରକଳ୍ପ କାର୍ଯ୍ୟକ୍ଷମ ହେଲେ ଏହି ଦୁଇ ଦ୍ୱୀପର ବନ୍ଦର ସମୂହ ବିଶ୍ୱର ପ୍ରମୁଖ ବନ୍ଦରଗୁଡିକ ସହ ସମକକ୍ଷ ହୋଇପାରିବେ । ସ୍ୱଳ୍ପ ମୂଲ୍ୟରେ ଓ ସହଜରେ ଏସବୁ ବନ୍ଦରରୁ ମାଲ ପରିବହନ ସେବା ଉପଲବ୍ଧ ହେବ । ପ୍ରଧାନମନ୍ତ୍ରୀ କହିଛନ୍ତି ଯେ ଯେଉଁ ଦେଶର ବନ୍ଦର ସଂଯୋଗ ଯେତେ ଉନ୍ନତ ସେ ଦେଶ ଏକବିଂଶ ଶତାବ୍ଦୀରେ ଉତ୍ତମ ବାଣିଜ୍ୟ କାରବାର ପାଇଁ ସେତେ ଅଧିକ ସମର୍ଥ ହେବ । ଆଜି ଯେତେବେଳେ ଭାରତ ଆତ୍ମନିର୍ଭରତାର ସଂକଳ୍ପ ନେଇ କାର୍ଯ୍ୟ କରୁଛି ଏବଂ ବିଶ୍ୱ ଯୋଗାଣ ତଥା ଭ୍ୟାଲୁଚେନ୍‌ରେ ଏକ ଗୁରୁତ୍ୱପୂର୍ଣ୍ଣ ଦେଶଭାବରେ କାର୍ଯ୍ୟ କରୁଛି ସେତେବେଳେ ଆମକୁ ଆମର ଜଳପଥ ଓ ବନ୍ଦରର ସଂଯୋଗ ବ୍ୟବସ୍ଥାକୁ ଅଧିକ ଉନ୍ନତ କରିବାକୁ ପଡିବ । ବନ୍ଦର ଭିତ୍ତିଭୂମି ବିକାଶ କ୍ଷେତ୍ରରେ ଯେଉଁସବୁ ଆଇନଗତ ପ୍ରତିବନ୍ଧକ ଥିଲା ସରକାର ସେଗୁଡିକୁ ନିରନ୍ତର ଭାବରେ ଦୂର କରୁଛନ୍ତି ବୋଲି ସେ କହିଛନ୍ତି ।

ଆନ୍ତର୍ଜାତିକ ସାମୁଦ୍ରିକ ବାଣିଜ୍ୟ

ପ୍ରଧାନମନ୍ତ୍ରୀ କହିଛନ୍ତି ଯେ ଆନ୍ତର୍ଜାତିକ ବାଣିଜ୍ୟ ଉପରେ ନଜର ରଖିବା ସହ ସାମୁଦ୍ରିକ ବାଣିଜ୍ୟ କ୍ଷେତ୍ରରେ ସୁବିଧା ସୁଯୋଗ ଯୋଗାଇ ଦେବା ପାଇଁ ସରକାର ଗୁରୁତ୍ୱ ଦେଉଛନ୍ତି । ଏଥିପାଇଁ ସାମୁଦ୍ରିକ ଭିତ୍ତିଭୂମି ଓ ସୁବିଧା ସୁଯୋଗ ସଂକ୍ରାନ୍ତ ନିୟମାବଳୀର ସରଳୀକରଣ କରାଯାଉଛି । ଏହି ଅବସରରେ ସେ ଆଣ୍ଡାମାନରେ ନିର୍ମାଣାଧୀନ ଡିପ୍‌ଡ୍ରାଫ୍ଟ ଇନର ହାର୍ବର ନିର୍ମାଣ କାର୍ଯ୍ୟ ଏବଂ ଗ୍ରେଟ ନିକୋବରରେ ନିର୍ମାଣ ହେବାକୁ ଥିବା ଟ୍ରାନ୍ସସିପ୍‌ମେଣ୍ଟ ବନ୍ଦର ସଂପର୍କରେ ସୂଚନା ଦେଇଥିଲେ । ଗ୍ରେଟ ନିକୋବରର ଏହି ପ୍ରକଳ୍ପ ପାଇଁ 10 ହଜାର କୋଟି ଟଙ୍କା ଖର୍ଚ୍ଚ ହେବ । ଏହାଫଳରେ ଏହି ବନ୍ଦରରେ ବଡ ବଡ ଜାହାଜ ଲଙ୍ଗର ପକାଇବାର ସୁବିଧା ପାଇବେ । ଏହାଦ୍ୱାରା ଭାରତର ସାମୁଦ୍ରିକ ବାଣିଜ୍ୟ କାରବାର ବଢିବ ଏବଂ ନିଯୁକ୍ତିର ଉତ୍ତମ ସୁଯୋଗ ସୃଷ୍ଟି ହେବ ।

ପ୍ରଧାନମନ୍ତ୍ରୀ କହିଛନ୍ତି ଯେ ମତ୍ସ୍ୟଚାଷ, ସିଉଇଡ୍‌ ଫାର୍ମିଂ ଓ ଆକ୍ୱାକଲ୍‌ଚର ଆଦି ଯାହା ନୀଳ ଅର୍ଥନୀତି ଭାବରେ ପରିଚିତ ତଦ୍ଦ୍ୱାରା ଏହି ଦ୍ୱୀପପୁଞ୍ଜର ଅର୍ଥନୀତିରେ ଉନ୍ନତି ଆସିବ । ସେଥିପାଇଁ ଉଭୟ ଆଣ୍ଡାମାନ ଓ ନିକୋବର ଦ୍ୱୀପରେ ନୂଆ ପ୍ରକଳ୍ପ ଏବଂ ଭିତ୍ତିଭୂମି ମାନ ତିଆରି ହେଉଛି । ସରକାରଙ୍କ ଏସବୁ କାର୍ଯ୍ୟ କେବଳ ଏହି ଦ୍ୱୀପପୁଞ୍ଜବାସୀଙ୍କୁ ସୁବିଧା ସୁଯୋଗ ଦେବାକୁ ଉଦ୍ଦିଷ୍ଟ ନୁହେଁ, ବରଂ ଆଣ୍ଡାମାନ ଓ ନିକୋବରକୁ ବିଶ୍ୱ ପର୍ଯ୍ୟଟନ ମାନଚିତ୍ରରେ ସ୍ଥାନିତ କରିବା ପାଇଁ ଉଦ୍ଦିଷ୍ଟ ବୋଲି ସେ କହିଛନ୍ତି ।

**********