হেল্থ মিনিস্ত্রীনা পুথোকপা তেলি-মেদিসিন প্লেতফোর্মশিংদা তেলি-কন্সলতেসন লাখ ১.৫ পাংথোকখ্রবা মতুংদা ‘ই-সঞ্জিবানি’ অমসুং ‘ই-সঞ্জিবানি ও.পি.দি’ প্লেতফোর্মশিং হন্না য়েংশিনবগী মীফম অমা ঙসি য়ুনিয়ন হেল্থ অমসুং ফেমিলি ৱেলফিয়ার মিনিস্তর দোক্তর হর্শ্ বর্ধন্না লুচিংদুনা পাংথোকখ্রে।মীফম অদুদা হেল্থ অমসুং ফেমিলি ৱেলফিয়ারগী রাজ্য মন্ত্রী অশ্বিনি কুমার চৌবে শরুক য়াখি। ভর্চুএল ওইনা তামিল নাদুগী হেল্থ মিনিস্তর দোক্তর সি. বিজয়াবাস্কারসু শরুক য়াখি।

২০১৯গী নবেম্বরদগী, ‘ই-সঞ্জিবানি’ অমসুং ‘ই-সঞ্জিবানি ও.পি.দি’গী তেলি-কন্সলতেসন রাজ্য ২৩(অপুনবা মীশিংগী চাদা ৭৫)দা পায়খৎখ্রে অমসুং অতোপ্পা রাজ্যশিংসু মসি পায়খৎনবা থৌরাং তৌরি। চাউনা মাইপাকপা অমদা, নেসনেল তেলিমেদিসন সর্বিসনা তেলি-কন্সলতেসন ১,৫০,০০০ হেন্না পাংথোকখ্রে।

মাইপাকপা অসিদা থাগৎলদুনা দোক্তর হর্শ্ বর্ধন্না হায়খি, প্রধান মন্ত্রীগী লমজিং মখাদা ঐখোয়না অয়ুসমান ভারত-হেল্থ অমসুং ৱেলনেস সেন্তরশিংদা ব্রোদবেন্দ অমসুং মোবাইল ফোনশিংগী খুৎথাংদা দিজিতেল ইন্দিয়াগী থবকশিং পায়খৎলে। রাজ্যশিংনা মতেং পাংবা অমসুং হৈশিংলবা দোক্তরশিং লৈবদগী, ঐখোয়না ই-সঞ্জিবানিগুম্বা তেলি-মেদিসিন প্লেতফোর্মগী খুৎথাংদা লায়েংবগী থবক পাংথোকপা ঙম্বনি। মসিনা কোবিদ-১৯ লাইচৎ মনুংদা ঐখোয়গী অনা-লায়েংগী থবকশিং ফগৎহল্লে।

রাজ্য মন্ত্রী অশ্বিনি কুমার চৌবেনা হায়খি, সহরশিংদা লৈবা অহৈবা দোক্তরশিংগী খুদোংচাবা ফংবা ঙমদবা খুঙ্গংশিংগী মীয়ামগীদমক থবক অসি অচৌবা অহোংবা অমা ওইরগনি।

ই-সঞ্জিবানি প্লেতফোর্মদা মখল অনিগী তেলিমেদিসিনগী থবক পাংথোক্লি হায়বদি- দোক্তর অমসুং দোক্তর(ই-সঞ্জিবানি)লোয়ন্না অনাবা অমসুং দোক্তর(ই-সঞ্জিবানি ও.পি.দি)তেলিকন্সলতেসন্নি। অহানবগী থবক অসি অয়ুসমান ভারত হেল্থ অমসুং ৱেলনেস সেন্তর প্রোগ্রামগী মখাদা পায়খৎপনি। থৌরম অসিগী মখাদা ২০২২গী দিশেম্বর ফাওবগী মনুংদা ‘হব অমসুং স্পোক’ মোদেল অমদা হেল্থ অমসুং ৱেলনেস সেন্তর লাখ ১.৫গা তেলিকন্সলতেসন পাংথোক্নবা থৌরাং তৌরি। সব-হেল্থ সেন্তরশিং অমসুং প্রাইমারি হেল্থ সেন্তরশিংদা তেলি-কন্সলতেসনগী থবকশিং পায়খৎনবা মেদিকেল কোলেজশিং অমসুং দিস্ত্রিক হোস্পিতালশিংদা '‘হব’শিং লিংখৎনবা রাজ্যশিংনা থবক পায়খৎলে। মসিগী নেসনেল ই-প্লেতফোর্ম অসি শীজিন্ননবা কমুনিতি হেল্থ ওফিসারশিং অমসুং দোক্তরশিং পুন্না য়ুজর ১২,০০০ হৌজিক ফাওবদা ত্রেনিং পীখ্রে। হৌজিক রাজ্য ১০গী হেল্থ অমসুং ৱেলনেস সেন্তর ৩,০০০ হেনবদা তেলিমেদিসিনগী থবক পায়খৎলি।

কোবিদ-১৯ লাইচৎ অসিনা মরম ওইদুনা, ‘ই-সঞ্জিবানি ও.পি.দি’গী খুৎথাংদা হেল্থ মিনিস্ত্রীনা অনিসুবা তেলি-কন্সলতেসনগী থবক পায়খৎলে। শেন তিংদবা ই-হেল্থ সর্বিস অসি হৌজিক রাজ্য ২০ রোমগী মীয়াম্না মশামক হোস্পিতালদা চৎতনা দোক্তরশিংদগী লায়েংবগী খুদোংচাবা ফংলি। চাউরাক্না দোক্তর ২৮০০ রোম ত্রেনিং পীখ্রে অমসুং ‘ই-সঞ্জিবানি ও.পি.দি’দা শীজিন্নরে অমসুং লোকদাউন অসি কোমথোকলবসু লৈবাক শীনবা থুংনা দোক্তরশিং অমসুং স্পিসিএলিস্ত ২৫০ রোম্না নুমিৎ খুদিংগী ই-হেল্থ সর্বিসকী খুদোংচাবশিং ফংহল্লি। মসিগী খুদোংচাবা অসি এন্দ্রোইদ মোবাইল এপ্লিকেসনশিংদসু ফংলি। মসিনা মীয়াম্না চৎথোক-চৎশিন তৌদনা লায়েংবগী খুদোংচাবা ফংলে। লোগ ইন তৌরবা মিনিত ৫ রোমগী মতুংদা অনাবনা দোক্তরগা ৱারি শানবা য়াগনি।

হৌজিক ফাওবদা, লৈবাক শীনবা থুংনা তেলি-কন্সলতেসন ১,৫৮,০০০ পাংথোকখিবগী মনুংদা কন্সলতেসন ৬৭,০০০ ই-সঞ্জিবানিগী খুৎথাংদা অয়ুসমান ভারত হেল্থ অমসুং ৱেলনেস সেন্তরশিংদা পাংথোকখি অমসুং ই-সঞ্জিবানি ও.পি.দিগী খুৎথাংদা কন্সলতেসন ৯১,০০০ পাংথোকখি। হৌজিক ‘ই-সঞ্জিবানি’ অমসুং ‘ই-সঞ্জিবানি ও.পি.দি’ অনিমক্তা নোংমদা কন্সলতেসন ৫,০০০ পাংথোক্লি। হায়রিবা প্লেতফোর্মশিং অসিগী থবক নোংমদা কন্সলতেসন লাখ ৫দা হেনগৎহল্লে।

তেলিমেদিসিন প্লেতফোর্মদা ওনলাইন ও.পি.দি ৪০ হেন্না পাংথোক্লি, হায়রিবা ও.পি.দিশিং অসিগী মনুংদা গাইনেকোলোজি, সাইকিয়াত্রি, দরমাতোলোজি, ই.এন.তি, ওফথালমোলোজি, এইদস নারবা মীওশিংগী এ.আর.তি, এন.সি.দি য়াওরি।

 ‘ই-সঞ্জিবানি’ অমসুং ‘ই-সঞ্জিবানি ও.পি.দি’ প্লেতফোর্মশিংগী খুৎথাংদা কন্সলতেসন খ্বাইদগী য়াম্না রেজিস্তার তৌখিবা মকোক থোংবা রাজ্য ১০ অদুদি; তামিল নাদু(কন্সলতেসন ৩২,০৩৫), অন্ধ্র প্রদেস(২৮,৯৬০), হিমাচল প্রদেস(২৪,৫২৭), উত্তর প্রদেস(২০,০৩০), কেরলা(১৫,৯৮৮), গুজরাত(৭১২৭), পঞ্জাব(৪৪৫০), রাজাস্থান(৩৫৪৮), মহারাস্ত্রা(৩২৮৪) অমসুং উত্তরখান্দ(২৫৯৬)নি।

দোক্তর মশেল ই-সঞ্জিবানি কন্সলতেসন য়াম্না পাংথোকখিবা রাজ্যশিংদি অন্ধ্র প্রদেস(২৫,৪৭৮) অমসুং হিমাচল প্রদেস(২৩,৮৫৭নি অমসুং অনাবা অমসুং দোক্তরগী মরক্তা পাংথোকপা ই-সঞ্জিবানি ও.পি.দিদা তামিল নাদু(৩২,০৩৫)না মাংজিল থাখি।

রাজ্যশিংগা ৱা খন্নখিবা অদুদা ‘ই-সঞ্জিবানি’ অমসুং ‘ই-সঞ্জিবানি ও.পি.দি’গী থবক ওইনা পাংথোক্নবা রাজ্যশিংনা মতেং পাংখিবা অদু থাগৎখি। হায়রিবা ই-হেল্থ সর্বিস অসি পাংথোকপগীদমক তামিল নাদুগী হেল্থ মিনিস্তরনা হেল্থ মিনিস্ত্রী অমসুং সি-দাগ থাগৎখি। মীফম অদুদা রাজ্য খরনা পায়খৎলিবা অফবা থবকশিং খন্নখি হা্যবদি, পঞ্চয়াত খুদিংমক্তা অন্ধ্র প্রদেসতা ই-সঞ্জিবানি পায়খৎখিবা; ই-ও.পি.দিগী খুৎথাংদা হিমাচল প্রদেসতা লায়েংবা; থবক হৌখিবা থা অমগী মনুংদা উত্তর প্রদেসতা কন্সলতেসন ২০,০৩০ রেজিস্তার তৌখিবা অমসুং কেরলাগী পালাকাদ জিলাদা জেল অমদা মাইপাক্না তেলি-মেদিসনগী থবক পায়খৎখিবা থবক খন্নখি।

মীফম অদুদা য়ুনিয়ন হেল্থ সেক্রেতরি রাজেল ভুষন অমসুং মিনিস্ত্রীগী সেনিয়র ওফিসিএলশিং শরুক য়াখি। সি-দাগকী ইজুকিউতিপ দিরেক্তর, দোক্তর পি.কে খোসলা অমসুং সি-দাগকী এসোসিয়েদ দিরেক্তর, দোক্তর সঞ্জয় সুদ, এন.ঐচ.এমগী এম.দি , হেল্থ সেক্রেতরিশিং অমসুং রাজ্যশিংগী সেনিয়র ওফিসিএলশিং দিজিতেল ওইনা শরুক য়াখি।

****