কেন্দ্রগী কম্মর্স অমসুং ইন্দস্ত্রী অমসুং রেলৱেজকী মন্ত্রী শ্রী পিয়ুশ গোয়লনা পোৎ-য়োনবগী খুন্নাইশিংনা আত্মানির্ভর ভারত কেম্পেন মায় পাকহনবদা শরুক য়ানবা হায়খ্রে। লৈবাক্কী পোৎ-য়োনবশিংগী নুমিৎকী থৌরমদা ভিদিও কনফরেন্সিংগী খুথাংদা ললোনবা খুন্নাইগী মীওইশিংগা ৱারী শাবদা মখোয়না ভারত্তা শাবা পোত্থোকশিং মীয়াম্না লৈহন্নবা কস্তরমরশিং ভাব তাহনবগী কেম্পেন চত্থগদবনি হায়খ্রে। মহাক্না মখোয়না ফত্তবা থৌওংশিংগী মরমদা মীয়ামদা হায়দোক্কদবনি অমসুং পুকচেল শেংদবা অমসুং মীয়ামদা নমথাক তৌদুনা য়েক্নবা লৈবাকশিংদগী পুশিল্লকপা ফত্তবা পোত্থোক য়োনবা মীওইশিংবু মীয়ামদা তাকথোক্কদবনি হায়খি।

শ্রী গোয়লনা ললোনবগী খুন্নাইনা আত্মানির্ভর ভারত কেম্পেন্দগী খুদোংচাবা কয়া অমা ফংগনি মরমদি ভারত্তা শাবা অফবা পোত্থোকশিং অসিনা শেন্মিৎলোন চাউখৎহন্দুনা মমল হন্থহনবা অমসুং মালেমগী মার্কেত্তা চাংদম্নবা ঙমহনগনি। মসিনা লৈবাক মীয়ামদা থবক হেন্না পীবা ঙমগনি অমসুং মীয়াম্বু নুংঙাই য়াইফহন্দুনা পোৎ লৈবগী চাংসু হেনগৎহনগনি। হৌজিক সরকারনা ঘুক,শান-খোৎনবগী পোত্থোক, তি.ভি., তেলিফোন, তায়রনচিংবা ভারত্তা শাজবা য়াবা পোত্থোক কয়া মীরমদগী পুশিল্লকপদা অথিংবা থমখ্রে হায়না মহাক্না হায়খি। মীরমদগী পুশিল্লকপা লুপা কোতি লাখ ১০গী পোত্থোকশিংদি ভারত্তা পুথোকচবা পোত্থোকশিংনা মহুৎ শিঞ্জবা য়ারবনি হায়খি। মহাক্না পোৎ-য়োনবশিংদা পি.এম.না “ভোকেল ফোর লোকেল”গী খোল্লাও লাওরিবা অসিদসু তেংবাংগদবনি হায়খ্রে।

শ্রী গোয়লনা পোৎ-য়োনবশিং অসিনা কোবিদ লায়চৎ মনুংদা লৌরিবা থৌদাং, মরু ওইনা লোকদাউন মনুংদা থোক্লক্তুনা লৈবাক শিনবা থুংবদা তঙাই ফদ্রবা পোৎ-চৈশিং ফংহনবগী থৌওং পাঙথোকখিবা অসিবু থাগৎখি। অসিগুম্বা লুরবা মতমদা মখোয়না তেংবাংখিবা অসি প্রধান মন্ত্রীনসু খঙই অমসুং মসিগী হীরম অসি মহাক্কী মন কী বাত্তসু পনখ্রবনি। পোৎ-য়োনবশিং অসিনা পোৎ পুথোকপা মীওইশিং অমসুং শিজিন্নবা মীওইশিংগী মরক্তা মরু ওইবা থোং অমা ওইনা তেংবাংলি হায়না হায়খি।

মন্ত্রীনা লৈবাক্কী মফম শিনবা থুংনা লৈবা পোৎ-য়োনবশিংদা অতোপ্পা হীরমগী ললোন ইতিক্কী মীওইসু য়াওহন্দুনা মফম খুদিংদগী পাউতাক খোমজিনবা ঙম্নবা কাংলুপ অমা শেম্নবা হায়খি। ৱাফম অমখক্তনা পুম্নমক্কী মনিং থুংহনবা ঙম্লোই মরম অদুনা তোঙান তোঙানবা পাউতাক ময়াম অমা চংগনি হায়খি। অসিগুম্বা পাউতাকশিং অসি সরকারনা নীংথিজনা য়েংশিনগনি। ওনলাইন্দা লাইসেন্স পীবা, ওনলাইন্দা লাইসেন্স ফী পীবা, লাইসেন্সকী মতম শাংদোকহনবা, আইনশিংবু দিক্রিমিনেলাইজ তৌবা, আইন শেম্বা মীওইনা তৌনিংবতা তৌবা লোইশিনহনবা অমসুং কাঙলোনশিংবু লায়থোকহনবা অসি পোৎ-য়োনবশিংগী অশেংবা দিমান্দশিংনি হায়খি। তৌবতবু ওথোরিতীনা অয়াবা পীববু লান্না শিজিন্নদুনা অরানবা থৌওং তৌবা অমসুং খুন্নাই অসিগী মিংচৎ থীহনবা মীওইশিং অসি খুন্নাই অসিনা মশক খঙদোক্তুনা তোঙান্না থম্বীয়ু হায়না মহাক্না মখা তানা হায়খি।

মন্ত্রীনা পোৎ-য়োনবশিংগী খুন্নাইদা সরকারনা মখোয়দা তেংবাংনবগীদমক্তা হন্দক্তা লাউথোকখিবা আত্মানির্ভর স্কিম য়াওনা খোঙথাং কয়া অমা পায়খৎলি হায়বগী থাজবা পীখি। পার্সেল ত্রেন চেনবা, কিসান ত্রেন চেনবা, পোৎ-পুবা ত্রেনশিংবু হেন্না য়াঙনা চেলহনবা, পোৎ থমফমশিং অপগ্রেদ তৌবা, রেলৱে ওফিস কয়াদা ব্যুজিনেস দিবেলপমেন্ত সেল হাংদোকপনচিংবা পোত্থোক পুশিন তৌবদা মমল হোংথহনগদবা থবক কয়া অমা রেলৱেনা পায়খৎলে হায়না মহাক্না হায়খি।

শ্রী গোয়লনা খুন্নাই অসিদা নেস্নেল ত্রেদর্স ৱেলফিয়ার বোর্দ অমা অথুবা মতমদা শেম্লগনি হায়বগী থাজবা পীখি। মহাক্না পোৎ-য়োনবা মীওইশিংদা মখোয়গী মখাদা থবক তৌরিবা মীওইশিংবুসু ত্রেদর্দ পেন্সন স্কিমদা য়াওহল্লসি হায়খি। মহাক্না মখোয়বু সরকারগী পোৎ লৈবগী পোর্তেল ওইরিবা জি.ই.এম.দা য়াওবীনবসু হায়খি।

******