“জম্মু, কশ্মীর অমসুং লদাখতা তংদু লৈতাবা, চাউখৎপা অমসুং নুংঙাই য়াইফবগী মতম অমা হৌরগনিঃ রোদ অমসুং হাইৱেগী প্রোজেক্ত কয়া অমনা শাহৌ লৌবগী শাফু পীরগনি” হায়না মিংথোনবা সেনিয়র পাউমী অমসুং প্রসার ভারতি বোর্দকী মেম্বর ওইবা শ্রী অশোক তান্দোন্না ইখিবা আর্তিকল অমগী ৱারোলশিং মখাদা পীরিঃ

 “ভারতিয় জন সংঘ (হৌজিক্কী ভারতিয় জনতা পার্তী) হৌদোক্লম্বা দাঃ স্যামা প্রসাদ মুকর্জীনা জম্মু অমসুং কশ্মীরবু ভারতকী মনুংদা চলহন্নবা হায়দুনা লৈবাক শিনবা থুংবগী সত্যগরহ (হিংশা য়াওদবা ইহৌ) লুচিংবদা মপুন্সি কত্থোকখি।

দাঃ মুকর্জীনা মে ১০, ১৯৫৩দা সরকারনা জে. অমসুং কে.গী ঙমখৈদা অয়াবা য়াওদনা চংবা য়াদে হায়বা ৱারোল অদুগী মায়োক্তা লেপখি অমসুং “এক দেশ মে দো বিধান, দো প্রধান অমসুং দো নিশান নহি চলেঙ্গে” (লৈবাক অমদা সংবিধান অনি, প্রধান মন্ত্রী অনি অমসুং ফিরাল অনি লৈবা য়াদে) হায়না লাউবগীদমক মহাকপু ফাখি।

মহাকপু শ্রীনগর জেলদা পুখি অমসুং মফমদুদা য়াম্না অঙকপা মওংদা জুন ২৩, ১৯৫৩দা লৈখিদে।

মতমদুদা মহাক্না খঙখিদবদি গুজরাত্তগী থোক্লকপা অনিশুবা চারোন-শুরোনগী মীওই অমনা মহাক্কী পান্দম অসি ফংহনগনি অমসুং পার্তী অসিবু কেন্দ্রদা এবসোল্যুৎ মেজোরিতী ফংদুনা লুচিংগনি হায়বা অসিনি।

প্রধান মন্ত্রী শ্রী নরেন্দ্র মোদীগী এন.দি.এ. সরকারনা ওগস্ত ৫, ২০১৯দা ভারতকী সংবিধানগী আর্তিকল ৩৭০গী মখাদা জম্মু অমসুং কশ্মীরদা থম্লিবা অখন্নবা থাক অসি লৌথোকখি অমসুং কেন্দ্র সরকারগী প্রোগ্রামশিং অমসুং শোত্থরবশিংগী ফংফম থোকপা হক, মহৈ তম্বগী হক, ই-পাউ ফংবগী হক অমসুং মিনিমম ৱেজ এক্ত অমসুং মাইনোরিতী এক্ত য়াওবা আইনশিংগী মখাদা লৈবা কান্নবা খুদিংমক রাজ্যগী মীয়ামদা ফংহল্লে।

রাজ্য অসিদা পীরম্বা ওতোনোমী মুথৎপগী ওর্দর অমা রাস্ত্রপতিনা থোকখিবা পুৱারী ওইবা ৱারোল অদুগী মথক্তা অতোপ্পা মশক থোকপা থৌশিল অমদি স্তেৎ রি-ওর্গনাইজেসন এক্ত, ২০১৯ অসিনি অমসুং মসিগী মতুং ইন্না রাজ্য অসিবু জম্মু অমসুং কশ্মীর অমদি লদাখ হায়না য়ুনিয়ন তেরিতোরী অনি খায়দোকখিবা অসিনি।

মসিদগী হৌনা এন.দি.এ. সরকারনা হৌখিবা চহি অমদগী হৌদুনা ঙমখৈগী ঙাক শেনবা, জে. অমসুং কে.গী হীরমগী মতাংদা মালেমগী খুন্নাইশিংগা চাউখৎপা ৱারী শাবা অমসুং রাজ্য অসিবু য়ুনিয়ন তেরিতোরী অনি থোকপগী মায়োক্তা লৈবাক অসিগী রাজনিতীগী মীওইশিংনা য়েৎলকপনচিংবা খুদোংচাদবা কয়া অমা থেংনদুনা লাক্লি।

মসিগী তুংদা মফম অহুমসিদা মীয়ামগী ওইবা তংদু লৈতাবা, চাউখৎপা অমসুং নুংঙাই য়াইফবগী ফিভম লৈহন্দুনা হীরম খুদিংদা অথুবা মতমদা চাউখৎপা পুরকপগী থৌদাং অমা লাক্লি।

কেন্দ্র সরকারনা খুদোংচাদবশিং অসি খুদোংচাবদা ওন্থোক্তুনা রাজ্যসিবু হৌখিবা দিকেদ ৭তগী ইমুং-মনুংনা চলায়বা রাজনিতীগী দলশিংনা আর্তিকল ৩৭০গী মিংদা জে. অমসুং কে. অমসুং লদাখকী মীওইশিংদা অৱাবা পীবা অমসুং অচান মীরাই নায়দুনা লাক্লিবা অসিবু নৌহৌননা শেমদোক্নবা থৌরাং তৌরি।

পি.এম.না মফমশিগী নহাশিংদা, কশ্মীর তম্পাক্তা লৈরিবা লান্না লমজিংলবা ইলিমেন্তশিং অসিদা মরু ওইনা, পুৱারী ওইরবা লম্বী অসিদা চৎমিন্নদুনা অফবা অমা ফংনবা চৎমিন্নসি হায়খিবা অসিগী মহৈ উবা ফংলে।

জে. অমসুং কে. অমসুং লদাখ অসিনা কেন্দ্র সরকারগী মখাদা হকথেংননা লৈবা য়ুনিয়ন তেরিতোরী (জম্মু অমসুং কশ্মীর মতম পুম্বগী নত্তনা) অমা ওইনা মোদী সরকারগী মখাদা হায়রিবা মফম পুম্বা অসিদা পুন্না চাউখৎপা অমসুং ময়েক লাবা লৈঙাক অমা ওইবগী অনৌবা মতম অমা লাক্নবা তংদু লৈতাবা অমসুং চাউখৎনবা থবক কয়া পায়খৎপা হৌরগনি।

তিম-মোদীনা মতমগা চান্নবা ইনফ্রাস্ত্রকচর কয়া শেম-শাদুনা অমসুং এম.এস.এম.ই.গী মনুং চনবা লশিং, হেন্দিক্রাফৎ, হেন্দলুম অমসুং হোর্তিকলচরগী ইন্তর্প্রাইস কয়াদা মিৎয়েং চংবা য়াম্না থুনা পাঙথোক্কদবা য়াইফ য়ুম্বাল অমসুং থবক পীবদা য়ুম্ফম ওইবা স্কিম কয়া অমা চলায়দুনা হায়রিবা মফম অহুম অসিদা লৈরিবা শোত্থরবা খুন্নাইগী মীওইশিংদা শাহৌ লৌবা অমসুং সোসিও-ইকোনোমিক্কী ফিভমশিং পাক শন্না ফগৎহনবদা পান্দম থম্বা থৌওং কয়া পাঙথোকপা হৌখ্রবনি।

চত্থোক চৎশিন তৌবদা খুদোংচাদবা কয়া লৈরম্বা মফমশিংবু শম্নহন্নবা অইং-অশা খুদিংদা চৎপা য়াবা অফবা শোরোক অমসুং হাইয়ে শেম শাবগী থবকশিং অসিনা লমদম অসিবু  খায়দোক্লবা মতুংদা অনৌবা থবক পীবগী থৌওং কয়া পাক শন্না পাঙথোকখি।

মফমশিং অসিগী চাউখৎনবগীদমক্তা চহি অমদগী সরকারনা হায়খ্রিবশিং অসি মফম মফমগী ওইনা ইয়েংশিল্লুবদা য়াম্না মায় পাক্না চত্থরি অমসুং স্ত্রেতজিক ওইবা মরু ওইবা  নেস্নেল হাইৱে, নাতৈ চাদবা মফমশিংদা শুরুং হুৎপা, শাথিবা অইং-অশাগী মনুংদা থবক তৌবা ঙম্বা লম্বী-শোরোক্নচিংবগী হৌজিক চত্থরিবা প্রোজেক্ত কয়া অসি লোইশিল্লকপা মতমদা ফজরবা মফম অসিগী মওং মতৌশিং অসি হেন্না নুংঙাইবা ওল্লদুনা ওল্লগনি।

কাশমিরঃ রিশি কশ্যপকী লমদম

অফাউবা ওস্ত্রেলিয়াগী রিসর্চর অমসুং কশ্মীরগী মতংদা লাইরিক কয়া ইরম্বা খ্রিস্তোফর স্নেদ্দেনগী মতুং ইন্না লমদম অসিগী মিং অসি কশ্যপ মির (কস্যাপ্পা মুনিগী পাত)দগী তেনশিনখিবনি হায়রি।

ভারতকী সুফিগী কবি অফাউবা অমসুং লাইরিক লাইশু হৌবা অমির খুস্রোনা কশ্মীরবু মখাদা পীরিবা ৱাহৈশিং অসিদা শৈথারম্মিঃ

অগর ফির্দোস বার রু-ই জমিন অস্ত,

হমীন অস্ত-ও হমীন অস্ত-ও হমীন অস্ত।

(করিগুম্বা মফম অসিদা স্বরগ লৈরবদি, মদু মফম অসিনি, মফম অসিনি)

লমকোয়বা অসি কশ্মীরগী শেন্মিৎলোনগী লাইফলাইন ওইদুনা লাক্লি অমসুং ফগৎলবা ইনফ্রাস্ত্রকচরশিং অসিনা তম্পাক অসিদগী এক্সপোর্ত তৌবগী থবকশিংদসু মায় পাকপগী মরু ওইবা মরম অমা ওইরি।

রোদ ত্রান্সপোর্ত অমসুং হাইৱে মন্ত্রালয়না মসিগী এন.ঐচ.এ.আই. অমসুং এন.ঐচ.আই.দি.সি.এল.গুম্বা মশাশিংগা বি.আর.ও. অমসুং রাজ্যগী পি.দবল্যু.দি.গা খুৎশম্নদুনা শাহৌ লৌবদা শাফু পীগদবা অমসুং স্তার্ত-অপশিংনা সেরিকলচর, কোল্দ ৱাতর ফিশরী, ক্রিকেত বেৎ শাবা, সেফ্রোন, হেন্দিক্রাফৎ অমসুং হোর্তিকলচরগী পোত্থোকশিং পুথোকপা ঙম্বা কম্পেনী ওইহন্নবা থবক কয়া পায়খৎলি।

হৌজিক চত্থরিবা প্রোজেক্তশিংগী মনুংদা শ্রীনগর-জম্মু-লখনপুর হাইৱে; কাজিগন্দ-বনিহল শুরুং অমসুং শ্রীনগর রিং রোদ য়াওরি।

জম্মুঃ

জম্বুপুরা হায়না হন্না খঙনরম্বা লাইশঙ য়াম্না লৈবা ফজরবা শহর অসি তাৱি তুরেলদা বাহু কিলা শাখিবা বাহু লোচানগী ময়াম্বা জম্বু লোচান নিংথৌগী কোনুংনি। মচিন মনাও অসি ভগ্বান রামগী চারোন শুরোন্নি হায়না মীয়াম্না থাজনৈ।

জম্মু রিং রোদ য়াওনা রেল অসুং রোদকী কন্নেক্তিবিতী য়াঙনা ফগৎলক্লিবা জম্মুগী শেন্মিৎলোন অসি লাইনিংগা মরী লৈনবা লম-কোয়বগী মরম্না ফগৎলক্লি অমসুং ৱুদ গ্রেনগী থবকশিং, মিলশিং, বাস্মতি চেং য়োনবশিং, চেংগী মিলশিং, কার্পেৎ, ইলেক্ত্রোনিক্সকী অমসুং ইলেক্ত্রিক্কী পোত্থোকশিংগী স্তার্ত-অপশিংনসু হীরম অসিদা য়াম্না তেংবাংলি।

লদাখঃ

লদভগস হায়নসু খঙনবা অৱাংবা পাস কয়াগী লৈফম অমসুং ঙারিগী মরয়ুল (ঙারিগী অনেম্বা মফমশিং)গী স্ত্রেতজিক ওইবা সেনিস্তিবিতী লৈ। মফম অসি কশ্মীর তম্পাক্তা লৈবা লৈঙাক্লীশিংনা মতম পুম্বদা তাথী তাওই তৌবিদুনা লাক্লবনি।

মোদী সরকারনা লদাখপু তোঙানবা য়ুনিয়ন তেরিতোরী অমা ওইহন্নবা লৌখিবা ৱারেপ অদুনা মফম অসিদা লৈবা শান্তি পাম্বা মীওইশিংগী তংদু লৈতাবা, চাউখৎপা অমসুং নুংঙাই য়াইফবগী অনৌবা মতম অমা লাকহনখিবতা নত্তনা শেন্মিৎলোন অমসুং লমদম অসি চাউখৎহনবগী খল নাইহন্দুনা তেংবাংলগনি।

লদাখতা হৌজিক হান্না তৌরমদবা ইনফ্রাস্ত্রকচর চাউখৎহনবগী থবকশিং পাঙথোক্লি অমসুং নাতৈ চাদবা মফমশিংবু শম্নহন্নবা অইং-অশা খুদিংদা চৎপা য়াবা লম্বী-শোরোক অমসুং হাইৱে কয়া শেম-শাবা হৌরে। লৈবাক্কী অমসুং মপান লমগী লমকোয়বশিংনা মফমসিদা লাকপগী হীরমদসু খুমাং চাউশিনহল্লি।

কেন্দ্র সরকারনা লদাখতা লেপ্পা নাইদবা শেলগী তেংবাং কয়া পীথরিবা অসিগী মহৈ ওইনা লৌউ-শিংউবা অমসুং শা-শন লোইবগী খুত্থাংদা ফার্মদা য়ুম্ফম ওইবা শেন্মিৎলোন্দা অঙকপা ফংনা শাহৌ লৌবগী থৌওং উবা ফংলি।

হোর্তিকলচর অমসুং শেল থোকপা মহৈ-মরোং থানবগীদমক্তা ফবা হেনগৎলবা ঈশিং পীবগী থৌওং কয়া অসিনা লৌউবশিংদা অহেনবা শেন্থোক পীরি।

পুম্লোয় লোয়বা ওইদনা, আর্তিকল ৩৭০ লৌথোকখিবা অমসুং মফম অসিবু য়ুনিয়ন তেরিতোরী অনি থোক্না খায়দোকখিবা অসিনা মফম অহুম অসিগী খুন্নাইশিংদা মীয়ামগী ওইবা থবক থৌরমশিংদা শরুক হেন্না য়ানিংবগী ইথিল পীরে। লমদমশিং অসিদা লৈরিবা নহাশিংনা সেক্যুরিতী ফোর্স অমসুং সিবিল সর্বিস্তা য়াওরক্লিবা অমসুং মহৈ-মশিং তম্বা অমসুং শান-খোৎনবগী হীরম মায় পাকপা ওইরক্লিবা অসি য়াম্না পুক্নিং থৌগৎনিংঙাইনি।

ঙসিদি কশ্মীর অমসুং লদাখতা নুপীশিংগী হক অমসুং নুপীমচাশিংবু মহৈ-মশিং তম্বীবগী মতাংদা মীয়াম্না খঙবা য়াম্না হেনগৎলে।

মীয়াম্না মফমসিগী লৈঙাক্লোইশিংগা মতেং পাংনদুনা চৎমিন্ননবা অমসুং পাকিস্তান্না নহাশিংবু লান্না লমজিংবীরিবা কয়া অসিবু লেপহন্নবগীদমক্তা মাং থানা থোক্লকপা হৌরে।

*******