ਭਾਰਤ ਸਰਕਾਰ ‘ਆਤਮਨਿਰਭਰ ਭਾਰਤ ਅਭਿਯਾਨ’ ਨੂੰ ਇੱਕ ਵਿਲੱਖਣ ਪਹਿਚਾਣ ਦੇਣ ਲਈ MyGov.in ਦੁਆਰਾ ਕਰਵਾਏ ਜਾ ਰਹੇ ‘ਆਤਮਨਿਰਭਰ ਭਾਰਤ ਲੋਗੋ ਡਿਜ਼ਾਈਨ ਮੁਕਾਬਲਾ’ ਜ਼ਰੀਏ ਦੇਸ਼ ਦੇ ਨਾਗਰਿਕਾਂ ਤੋਂ ਇੱਕ ਸਿਰਜਣਾਤਮਕ ਤੇ ਨਵੀਨ ਖੋਜ ਨਾਲ ਸਬੰਧਿਤ ਇਨਪੁਟਸ ਦੇ ਅਧਾਰਿਤ ਇੱਕ ਲੋਗੋ ਵਿਕਸਤ ਕਰਵਾਉਣ ਜਾ ਰਹੀ ਹੈ। ਇੰਦਰਾਜ਼ ਜਮ੍ਹਾਂ ਕਰਵਾਉਣ ਦੀ ਆਖ਼ਰੀ ਤਰੀਕ 5 ਅਗਸਤ, 2020 ਨੂੰ ਰਾਤੀਂ 11:45 ਵਜੇ ਤੱਕ ਹੈ। ਜੇਤੂ ਲੋਗੋ ਨੂੰ 25,000/– ਰੁਪਏ ਤੱਕ ਦਾ ਨਕਦ ਇਨਾਮ ਦਿੱਤਾ ਜਾਵੇਗਾ।

ਮਾਈਗੌਵ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਦੁਆਰਾ ਰਾਸ਼ਟਰ ਦੇ ਸ਼ਾਸਨ ਤੇ ਵਿਕਾਸ ਵਿੱਚ ਭਾਰਤੀ ਨਾਗਰਿਕਾਂ ਦੀ ਸਰਗਰਮ ਸ਼ਮੂਲੀਅਤ ਨੂੰ ਹੁਲਾਰਾ ਦੇਣ ਲਈ ਇੱਕ ਨਾਗਰਿਕ ਸਮਾਵੇਸ਼ ਮੰਚ ਹੈ। ਮਾਈਗੌਵ ਨੇ ਵਿਭਿੰਨ ਵਿਭਾਗਾਂ ਅਤੇ ਸਵੱਛ ਭਾਰਤ, ਦੇਖੋ–ਅਪਨਾ–ਦੇਸ਼, ਲੋਕਪਾਲ ਅਤੇ ਹੋਰ ਬਹੁਤ ਸਾਰੀਆਂ ਅਜਿਹੀਆਂ ਪਹਿਲਾਂ ਦੇ ਬਹੁਤ ਸਾਰੇ ਲੋਗੋ ਆਮ ਨਾਗਰਿਕਾਂ ਤੋਂ ਹੀ ਤਿਆਰ ਕਰਵਾਏ ਹਨ।

‘ਆਤਮਨਿਰਭਰ ਭਾਰਤ’ ਬਾਰੇ ਪ੍ਰਧਾਨ ਮੰਤਰੀ ਦੀ ਦੂਰ–ਦ੍ਰਿਸ਼ਟੀ ਅਧੀਨ, ਭਾਰਤ ਨੇ ਇਹ ਪ੍ਰਦਰਸ਼ਿਤ ਕਰ ਵਿਖਾਇਆ ਹੈ ਕਿ ਉਹ ਕਿਵੇਂ ਚੁਣੌਤੀਆਂ ਦਾ ਸਾਹਮਣਾ ਕਰ ਸਕਦਾ ਹੈ ਅਤੇ ਉਸੇ ਦੌਰਾਨ ਨਵੇਂ ਮੌਕਿਆਂ ਦਾ ਲਾਭ ਵੀ ਲੈ ਸਕਦਾ ਹੈ। ਭਾਰਤ ਨੇ ਕੋਵਿਡ–19 ਦੀ ਸਥਿਤੀ ਦਾ ਸਾਹਮਣਾ ਬਹੁਤ ਹੌਸਲੇ ਅਤੇ ਆਤਮਨਿਰਭਰਤਾ ਦੀ ਭਾਵਨਾ ਨਾਲ ਕੀਤਾ ਹੈ; ਇਹ ਗੱਲ ਇਸੇ ਤੱਥ ਤੋਂ ਜ਼ਾਹਿਰ ਹੈ ਕਿ ਮਾਰਚ 2020 ਤੋਂ ਪਹਿਲਾਂ ਦੇਸ਼ ਵਿੱਚ ‘ਪਰਸਨਲ ਪ੍ਰੋਟੈਕਸ਼ਨ ਇਕੁਇਪਮੈਂਟ’ (ਪੀਪੀਈ – PPE) ਦਾ ਉਤਪਾਦਨ ਬਿਲਕੁਲ ਵੀ ਨਹੀਂ ਹੁੰਦਾ ਸੀ ਪਰ ਅੱਜ ਭਾਰਤ ਨੇ ਰੋਜ਼ਾਨਾ 2 ਲੱਖ ਪੀਪੀਈ ਕਿਟਾਂ ਤਿਆਰ ਕਰਨ ਦੀ ਸਮਰੱਥਾ ਪੈਦਾ ਕਰ ਲਈ ਹੈ, ਜੋ ਕਿ ਸਥਿਰਤਾ ਨਾਲ ਵਧਦੀ ਵੀ ਜਾ ਰਹੀ ਹੈ।

ਇਸ ਤੋਂ ਇਲਾਵਾ, ਭਾਰਤ ਨੇ ਇਹ ਦਰਸਾਇਆ ਹੈ ਕਿ ਉਹ ਚੁਣੌਤੀਆਂ ਦਾ ਸਾਹਮਣਾ ਕਿਵੇਂ ਕਰ ਸਕਦਾ ਹੈ ਤੇ ਉਨ੍ਹਾਂ ਵਿੱਚ ਹੀ ਮੌਜੂਦ ਮੌਕਿਆਂ ਦਾ ਲਾਭ ਕਿਵੇਂ ਲੈ ਸਕਦਾ ਹੈ; ਇਹ ਤੱਥ ਜੀਵਨ–ਬਚਾਊ ਵੈਂਟੀਲੇਟਰ ਬਣਾਉਣ ਵਿੱਚ ਤਾਲਮੇਲ ਲਈ ਆਟੋਮੋਬਾਈਲ ਖੇਤਰ ਦੇ ਵਿਭਿੰਨ ਉਦਯੋਗਾਂ ਨੂੰ ਮੁੜ–ਉਦੇਸ਼ਿਤ ਕੀਤੇ ਜਾਣ ਤੋਂ ਪ੍ਰਤੱਖ ਹੈ।

ਕਿਸੇ ਵੀ ਤਰ੍ਹਾਂ ਦੀ ਪੁੱਛਗਿੱਛ ਲਈ, ਕਿਰਪਾ ਕਰਕੇ ਸੰਪਰਕ ਕਰੋ:

connect@mygov.nic.in

*****

ਆਰਸੀਜੇ/ਐੱਮ