কম্মর্স অমসুং ইন্দস্ত্রী মন্ত্রী শ্রী পিয়ুশ গোয়লনা ঙসি সরকারনা পোলিসীশিং লায়হন্নবা হোৎনরি অমসুং মসিগীদমক্তা ইন্দস্ত্রীশিংগী ফীদবেক হঙখি অমসুং মখোয়গা খুৎশম্ননা চৎমিন্নসি হায়খ্রে। ঙসি আত্মমানির্ভর ভারত ওইহন্নবা কারবার তৌবা লায়হনবগী সি.আই.আই.গী নেস্নেল দিজিতেল কনফরেন্স হৌদোকপগী থৌরমদা মন্ত্রীনা হায়খিবদা ইন্দস্ত্রীএল এপ্রুবেলশিংগীদমক্তা সিঙ্গল ৱিন্দো সীস্তেম অমা অতুবা মতমদা থম্লগনি হায়খি। মহাক্না ইন্দস্ত্রীশিং অমসুং সরকারনা খোঙলোয় ওইনা চৎমিন্ননবা অমসুং তেক্স থীদবা মীওইশিংবু মশক খংদোক্তপদা ইন্দস্ত্রীনা সরকারবু তেংবাংনবা হায়খ্রে।

কোবিদ ইরাং অসিগী মতাংদা পল্লদুনা মন্ত্রীনা লৈবাক অসিদা শেন্মিৎলোন ফবা হেনগৎলে অমসুং অথিংবা লৈবা কয়াসু তপ্না তপ্না লৌথোকপা হৌরে হায়খি। কোবিদ ইরাংগী মনুংদা লৈবাক অসিগী সর্বিস সেক্তরনা মালেমগী ক্লাইন্তশিংবু লেপ্তনা তেংবাংখিবশিংসু মহাক্না পনখি। মমাংগী চহিগী মান্নবা মতমগা চাংদম্নবদা হৌজিক ওইরিবা মপান লমদা পোত্থোক থাদোকপগী চাং অসি ৮৮%নি অমসুং মীরমদগী পোত্থোক পুশিল্লকপগী চাংনা ৭৫%নি হায়খি। “কারবার অসি হান্নগুম্না হঞ্জিল্লক্লি” হায়রদুনা বেন্তিলেতরদা থম্লিবা মপান্দা থাদোকপগী অথিংবা অসিসু লৌথোক্লগনি হায়না হায়খি। কেন্দ্র সরকারনা লেবর লো লায়হনবা, লেন্দ বেঙ্ক পোর্তেল লোঞ্চ তৌবা অমসুং শেল থাদবশিংগী অয়াবা পীবগী সিঙ্গল ৱিন্দো লৈহনবনচিংবা থবক কয়া রাজ্য সরকারগা খুৎশম্নদুনা পাংথোক্লি হায়খি।

মপান লমদা পোত্থোক থাদোকপদা ইন্সেন্তিব পীবগী হীরম, মর্চেন্দাইইজ এক্সপোর্ত ফ্রোম ইন্দিয়া স্কিম (এম.ই.আই.এস.), দা শ্রী পিয়ুশ গোয়লনা সরকারনা হীরমসিগী মতাংদা ইম্পোর্তকী থৌওংদা অকায়বা পীদনা অথুবা মতমদা ৱারোয়শিন অমা পুরক্লগনি হায়খি। “ঐখোয়না মরী লৈনবা মীওইশিংগা ৱারী শানরি অমসুং এম.ই.আই.এস. অসি অদুম লৈখিগনি। মসি শেল চৎপগী হীরম অমনি। মীয়াম পুম্নমক্কী মায় পাকপা ওইবা ৱারোয়শিন অমা অথুবা মতমদা ঐখোয়না পুরক্কনি”, হায়না মহাক্না মখা তানা হায়খি।

মন্ত্রীনা হায়খিবদা শেল-থুম মন্ত্রালয়না লৈবাক অসিদা শেল থাদহন্নিংবগী পুক্নিং চিংশিন্নবা লম্বী কয়া অমা য়াৎলি অমসুং বেঙ্কশিংনা পথাপ অসিদা লিক্বিদিতী মতিক চানা লৈ হায়দুনা সরকারদা থাজবা পীরে হায়না হায়খি। মহাক্কী মন্ত্রালয়না অহেনবা মিৎয়েং চংদুনা চাউখৎহনগদবা ইন্দস্ত্রীগী সেক্তর ২০সু মশক খঙদোক্লে হায়না মন্ত্রীনা হায়খি। অয়েৎপা পীবা আইন অমসুং মতমসিগা চান্নদ্রবা আইন মুত্থৎপগী হীরমসিংদসু সরকারনা কন্না য়েংশিল্লি হায়না মন্ত্রীনা হায়খি।

ইন্দস্ত্রীবু তেংবাংনবা অফবা লেবর লোগী তঙাই ফদবা লৈবগী মতাংদা শ্রী গোয়লনা কেন্দ্র সরকারনা রাজ্য অমসুং য়ু.তি. ১৬কা ৱা তানরে অমসুং মখোয়দগী ৱাহৌদোক কয়া অমসু ফংলে হায়না হায়খি। “মখোয়গী পাউতাকশিং অসিবু অমত্তা ওইনা য়ানবা ওইহন্নবা ঐখোয়না হোৎনরি। রাজ্যশিংনা মতৌ করম্না লেবর লোগী ইকোসীস্তেম অসি থবক ওইনা লাইনা পাংথোক্কদগে হায়বা য়েংলি”, হায়না মহাক্না মখা তানা হায়খি।

ভারত্তা ইন্দস্ত্রী শানবা লম লৈতবগী পাখৎপা লৈতে মরমদি মসিগীদমক্তা হেক্ত্যার লিশিং কয়াগী লম মশক খংদোকপা লোয়রে হায়না মন্ত্রীনা হায়খি। কেন্দ্র সরকারনা রাজ্যশিংদা লৈবা লমশিংগী লেন্দ বেঙ্ক অমা লোঞ্চ তৌনবা হোৎনরি অমসুং মসিদা রাজ্যশিংনা লেন্দ বেঙ্ক পোর্তা শেমগনি হায়খি। রাজ্য তরুক্না মসিগীদমক্তা দেতা থারক্তুনা লৈরবনি হায়না মহাক্না মখা তাখি।

শেল থাদবগী মতাংদা হৌদোক্লিবা সিঙ্গল ৱিন্দো সীস্তেম অসিগী মতাংদা মন্ত্রীনা সরকারনা অফবা থৌওং কয়া অমা প্লেৎফোর্ম অমগী মখাদা পুন্সিন্নবা হোৎনরি অমসুং সিঙ্গল ৱিন্দোনা মসিগীদমক্তা খ্বাইদগী অচুম্বা ওইগনি হায়খি। সিঙ্গল ৱিন্দো অসি অথুবা মতমদা থবক্তা ওন্থোক্নবা মহাক অমসুং মহাক্কী কাংবুনা রাজ্যগী বিভাগশিংগা মতম পুম্বদা পাউ ফাওনরি হায়না মন্ত্রীনা হায়খি।

***