অয়ুশকী কেন্দ্র মন্ত্রী শ্রী শ্রিপদ য়েসো নায়ক্না ওল ইন্দিয়া ইন্সতিত্যুৎ ওফ অয়ুর্বেদ (এ.আই.আই.এ.), নই-দিল্লীনা মসিগী কোবিদ-১৯ হেলথ সেন্তর (সি.ঐচ.সি.)দা লেম্না তেস্ত তৌবা অমসুং কোবিদ-১৯গী অনাবশিংবু লেম্না লায়েংবা হৌখ্রে হায়না লাউথোকখ্রে।

শ্রী নায়ক্না সি.ঐচ.সি. অসিদা জুলাই ২৮, ২০২০দা সেন্তর অসিদা কোবিদ-১৯গী অনাবশিং লায়েংবগী থৌওংশিং য়েংশিনবা চৎখি। খোংচৎ অদুদা মহাক্না সি.ঐচ.সি. অসিদা তেস্ত তৌবগী শেল লৌররোয় অমসুং অনাবশিংবু লেম্না লায়েংলগনি হায়না লাউথকখিবনি। বেন্তিলেতরগী খুদোংচাবা অমসুং অতোপ্পা আই.সি.য়ু.গী পোৎলমশিং য়াওবা সি.ঐচ.সি. অসিগী ইন্তেন্সিব কেয়র য়ুনিৎ অমসু মহাক্না শঙ্গাখি।

এ.আই.আই.এ. অসি দিল্লী সরকারনা কোবিদ-১৯গী তেস্ত (আর.তি.-পি.সি.আর. অমসুং রেপিদ এন্তিজেন তেস্তিং) তৌফম্নি হায়নসু লাউথোকখ্রবনি। মীয়াম্না তেলিফোন্দা কোবিদ-১৯গা মরী লৈনবা ৱাহং কয়া হংলকপদা পাউখুম পীননবা এ.আই.আই.এ.না কোবিক কোল সেন্তর অমসু হাংদোকখ্রে।

অয়ুশ মন্ত্রালয়গী থৌওং মখাদা ইন্সতিত্যুৎ অসিনা অশ্বাগন্ধা, নীম, কালামেঘা, গিলোয়নচিংবশিংগী হীরমদা লায়নাদগী ঙাকথোকপা, লায়েংবা অমসুং রিসর্চ তৌবগী থবক কয়া পাংথোক্তুনা মরু ওইবা থৌদাং লৌরিবনি।

অয়ুশ মন্ত্রালয়গী মখাদা পাংথোক্লিবা দিল্লী পুলিসকী মীওই ৮০,০০০বু লায়নাদগী ঙাকথোকপদা তেংবাংগী ‘অয়ুরকশা’ প্রোগ্রাম্বু মন্ত্রীনা থাগৎপা ফোংদোকখি। কোবিদ-১৯গী মাং-থাবা লান্মী ওইরিবা দিল্লী পুলিস্কী মীওইশিংদা ইম্ম্যুন হেনগৎনবা অয়ুরকশা কিৎ পীদুনা কোবিদ-১৯গী মায়োক্তা পুন্সিবু মগুন লৈবা হেনগৎহল্লি। অয়ুরকশা কিৎ অসিদা সনশামানি বতি (গিলোয়দগী শেম্বা), অয়ুশ করহা অমসুং নিংশা হোনবা নুংঙাইহন্নবা অনু তালিয়া য়াওরি। ঙসি ফাওবদা মীওই ৯০%না শরুক য়াদুনা অয়ুরকশাগী কিৎ ১,৫৮,৪৫৪ অসি তাঙ্কক অনি থোক্না য়েন্থোকখ্রে। দিল্লী পুলিস্তগী ফংবা ফীদবেকশিং অসি পব্লিক হেলথ ফাউন্দেসন ওফ ইন্দিয়া (পি.ঐচ.এফ.আই.)না তেংবাংদুনা কন্না য়েংশিল্লি। মীওইশিং অসিনা পাখৎপগী চাং হন্থবা, হকচাং নুংঙাইবা অমসুং লোক থুংবা অমসুং খুবগুম্বা সিম্পতম মচাশিংদা হন্থরকপগী মওংগা লোয়ননা অফবা ফীদবেক কয়া অমা পীরক্লি। দিল্লীগী মীয়ামগা চাংদম্নবদা পুলিস্কী মীওইশিং অসিদা কোবিদ-১৯গা মরী লৈনবা থৌদোক থোকপগী চাং হন্থবগী ফিভম উবা ফংলে।

মহাক্কী এ.আই.আই.এ.গী খোঙচৎ অদুদা মন্ত্রীনা দাক্তরশিংগা ৱারী শাদুনা অনাবশিংগী ফিভমগী মরমদা হংখি। কোবিদ-১৯ হেলথ সেন্তর অসিদা লৈরিবা ফেসিলিতীশিং অমসুং অয়ুর্বেদগী হিদাক্না লায়েংলিবা অসিগী মহৈগী মতাংদা মখোয়গী ফীদবেকসু লৌখি।

মন্ত্রীনা কোবিদ-১৯গী লায়চৎ মনুংসিদা এ.আই.আই.এ.না পীরিবা সেবাশিং অসিদা অপেনবা ফোংদোকখি। মফমসিগী কাংবু পুম্বগী মীওইশিং অসিনা অয়ুর্বেদগী পথাপকী মখাদা কোবিদ পোজিতিব ওইরবা অনাবশিংদা কেয়র পীবগী ৱাখলগী ইথিল, করিগুম্বা অমদা থৱাই য়াওবা, থৌনা অমসুং থবকশিং অসি থাগৎনিংঙাই ওই হায়না মহাক্না হায়খি। এ.আই.আই.এ.না ভারত শিনবা থুংনা লৈরিবা কোবিদ-১৯গী অনাবশিংদা মীওই অমদা মিৎয়েং চংবা অয়ুর্বেদগী হিদাক, চিঞ্জাক, য়োগ অমসুং পোত্থাবগী থৌওংশিংগী খুত্থাংদা হোলিস্তিক কেয়র পীবগী মশক থোকপা থবক পাংথোক্লি।

***