ঙসি অহানবা বেৎচকী মীদিয়ম মলতি-রোল কম্বেৎ এয়রক্রাফৎ (এম.এম.আর.সি.এ.) রাফেল জেৎ মঙানা অম্বালা বেজতা য়ৌরকখিবদা ঙাকশেল মন্ত্রী শ্রী রাজনাথ সিংহনা ত্বীৎ কয়াগী পরিংগী খুত্থাংদা তরাম্না ওক্লদুনা ৱাহৈশিং অসি হায়খি, “উচেকশিং অসিনা ভারতকী এয়রস্পেস য়ৌশিল্লক্লে...অম্বালাদা তেক্ত কায়দনা তাবা ওইরো”।

শ্রী রাজনাথ সিংহনা প্লেনসিং অসিবু তেক্ত কায়দনা পুরকপগীদমক ইন্দিয়ন এয়র ফোর্স (আই.এ.এফ.)পু থাগৎপা ফোংদোক্লদুনা অসুম্না হায়খি, “১৭শুবা স্ক্বাদ্রোন, গোলদন এরোনা মখোয়গী মোত্তো ‘উদয়ম অজাস্রম’বু লেপ্তনা ঙাক্তুনা চৎকনি হায়বগী ঐহাক্না থাজৈ। আই.এ.এফ.কী কম্বেৎকী মতিক অসি মতম চানা হেনগৎপদা ঐহাক্না য়াম্না হরাওবা পোকই”।

 “ভারত্তা রাফেল কম্বেৎ এয়রক্রাফৎ থুংলকপা অসিনা ভারতকী মিলিতরীগী পুৱারীদা অনৌবা মতম অমা হৌরগনি। মসিগী মখল কয়াদা শিজিন্না এয়রক্রাফৎশিং অসিনা আই.এ.এফ.কী তৌবা ঙম্বশিংবু হেন্নবা ফগৎহল্লগনি”, হায়না মহাক্না অতোপ্পা ত্বীৎ অমদা মখা তানা হায়খি।

এয়রক্রাফৎ অসিগী তৌবা ঙম্বশিংগী মরমদা হায়রদুনা শ্রী রাজনাথনা অসুম্না ফোংদোকখি, “মসিগীএয়রক্রাফৎ অসিনা নীংথিনা পায়বা ঙম্মি অমসুং মসিগী খুৎলায়শিং, রেদার  অমদি অতোপ্পা সেন্সরশিং অমসুং ইলেক্ত্রোনিক্কী লালোংগী থৌওং কয়া অমা পাংথোকপা ঙম্বা অসিনা মসিবু মালেমগী খ্বাইদগী ফবশিংগী মনুংদা চল্লিবনি। মসিনা ভারত্তা য়ৌরকপা অসিনা আই.এ.এফ.না লৈবাক অসিনা থেংনরক্কদবা শিংনবা খুদিংমক অকনবা মওংদা মায়থিবা পীবা ঙমগনি”।

ঙাকশেল মন্ত্রীনা প্রধান মন্ত্রী শ্রী নরেন্দ্র মোদীবু মহাক্না অচুম্বা ৱারেপ লৌখিবগীদমক্তা থাগৎপা ফোংদোক্লি। “রাফেল জেৎশিং অসি প্রধান মন্ত্রী শ্রী নরেন্দ্র মোদীনা এয়রক্রাফৎ অসিবু ফ্রান্সকা খুৎশম্নদুনা সরকার অনিগী মনুংদা য়ানবা পুরকপগী খুত্থাংদা লৈনবা অচুম্বা ৱারেপ লৌখিবা অদুগী মহৈদগী লৈবা ঙমখিবনি। মসিগী এয়রক্রাফৎ লৈবগী থৌওং অসি মতম কুইনদগী পন্দুনা লৈরকখিবনি”।

মহাক্না কোবিদ লায়চৎ অসিগী মনুংদা থম্লিবা অহকপা অথিংবা কয়াগী মরকসিদা এয়রক্রাফৎশিং অমসুং খুৎলায়শিং অসিবু মতম চানা য়ৌহল্লকপগীদমক্তা  ফ্রান্সকী সরকার, দাসোলত এবিএসন অমসুং অতোপ্পা ফ্রেঞ্চ কম্পেনীশিংবু থাগৎপা ফোংদোকখি।

শ্রী রাজনাথ সিংহনা অসুম্না মখা তানা হায়খি, “রাফেল জেৎশিং অসি আই.এ.এফ.কী তঙাই ফদবা খুদিংমক পীবা ঙমগনি খংলবা তুংদা লৈখিবনি। মসিগী লৈবগী থৌওং অসিগী মতাংদা য়ুম্ফম য়াওদবা ৱাফম কয়া অমা থোকখিবশিং অসিগী মতিক চাবা পাউখুম পীদুনা লোয়শিনখ্রবনি”। মহাক্না মখা তারদুনা হায়খিবদা ইন্দিয়ন এয়র ফোর্সকী অনৌবা পাঙ্গল অসিগী মতাংদা পাখৎপা অমসুং য়েংশিনগদবা মীওইশিং অদুদি লৈবাক অসিগী অপুনববু অকায়বা পীনিংবা মীওই ওইগনি হায়খি।

শ্রী রাজনাথ সিংহনা এয়রক্রাফৎশিং অসিনা ভারতকী এয়রস্পেস চংশিল্লকপগী ফোতো অমসুং ভিদিওশিং মীয়ামদা উৎখি।

ইন্দিয়ন নেভেল শিপ (আই.এন.এস.) কোলকতাগী কেপ্তেন্না অঙনবদা রাফেল এরো লীদরবু ভারত মহাসাগরদা তরাম্না ওক্লদুনা অসুম্না হায়খি, “নহাক্না মায় পাকপগা লোয়ননা অতিয়াবু শোকপা ঙম্বা ওইয়ু”। রাফেল মঙাদুনা ভারতকী এয়রস্পেসতা চংশিল্লকপা মতমদা এস.য়ু.৩০ এম.কে.আই. অনিনা ঙাক শেনখি।

***