நாட்டில் மொத்த மருந்துகள் மற்றும் மருத்துவ சாதனப் பூங்காக்களின் உள்நாட்டு உற்பத்தியை மேம்படுத்துவதற்காக மருந்துகள் துறையின் நான்கு புதிய திட்டங்களை மத்திய இரசாயன மற்றும் உரங்களுக்கான அமைச்சர் திரு. டி.வி.சதானந்த கவுடா இன்று தொடங்கி வைத்தார்.

இந்நிகழ்ச்சியில் பேசிய திரு. கவுடா, இது பிரதமர் திரு நரேந்திர மோடியின் பார்வைக்கு ஏற்ப அமைந்ததாகவும், இந்தியாவை மருந்தியல் துறையில் சுயசார்புடையதாக ஆக்குவதற்கான அவரது தெளிவான அழைப்பு என்றும் கூறினார். இதற்காக இந்திய அரசு மொத்த மருந்துகள் மற்றும் மருத்துவச் சாதனப் பூங்காக்களுக்கு தலா இரண்டு என நான்கு திட்டங்களுக்கு ஒப்புதல் அளித்துள்ளது, தொழில் நிறுவனங்கள் மற்றும் மாநிலங்கள் இந்த திட்டங்களில் முன்வந்து பங்கேற்குமாறு அவர் அறிவுறுத்தினார்.

இந்தியா பெரும்பாலும் 'உலகின் மருந்தகம்' என்று குறிப்பிடப்படுகிறது, குறிப்பாக கோவிட் -19 தொற்றுநோய்களில் இது உண்மையாக நிரூபிக்கப்பட்டுள்ளது, நாடு முழுவதும் ஊரடங்கு அமல்படுத்தப்பட்டிருக்கும் காலத்திலும் கூட முக்கியமான உயிர் காக்கும் மருந்துகளை இந்தியா தொடர்ந்து தேவைப்படும் நாடுகளுக்கு ஏற்றுமதி செய்கிறது எனத் தெரிவித்தார். இருப்பினும், இந்தச் சாதனைகள் இருந்த போதிலும், அடிப்படை மூலப்பொருள்களுக்கான இறக்குமதிக்காக நம்நாடு  பிற நாடுகளைச் சார்ந்துள்ளது என்பது கவலைக்குரிய விஷயம். இதேபோல் மருத்துவச் சாதனங்கள் துறையிலும், நமது நாடு மருத்துவச் சாதனங்களின் தேவைகளில் 86 சதவீதம் இறக்குமதியைச் சார்ந்துள்ளது.

NITI Ayog தலைமை நிர்வாக அதிகாரி, திரு. அமிதாப் காந்த் கூறுகையில், இந்தியா ஏராளமான பொதுவான மருந்துகளையும் 500க்கும் மேற்பட்ட செயலில் உள்ள மருந்து மூலப்பொருட்களையும் (API) உற்பத்தி செய்கிறது, இருப்பினும் அது அதிக அளவு செயலில் உள்ள மருந்து மூலப்பொருளை (API) இறக்குமதி செய்ய வேண்டும்.

இந்த திட்டங்கள் இந்தியாவை தன்னம்பிக்கை நாடாக மட்டுமல்லாமல், தேர்ந்தெடுக்கப்பட்ட மொத்த மருந்துகள் மற்றும் மருத்துவ சாதனங்களுக்காக உலகளாவிய தேவையை பூர்த்தி செய்யும் திறனையும் ஏற்படுத்தும் என்று எதிர்பார்க்கப்படுகிறது.

விரிவான வழிகாட்டுதல்களைக் காண இங்கே கிளிக் செய்க: https://pharmaceuticals.gov.in/schemes