ঙসি ৱর্ল্দ য়ুথ স্কিল্স দে অমসুং ‘স্কিল ইন্দিয়া’ মিসনগী মঙাসুবা কুমওন নুমিৎকী থৌরমদা পাঙথোকপা তিজিতেল স্কিল্স কনক্লেবতা পীখিবা মহাক্কী পাউজেলদা প্রধান মন্ত্রীনা থুনা হোংলক্লিবা লল্লোন ইতিক্কী মওং মতৌ অমদি কৈথেলগী ফীভম অসিগা চুননা লৈনবগীদমক নহাশিংদা স্কিল, রিস্কিল অমসুং অপস্কিলগী তঙাইফদবশিংগী মতাংদা ৱাফমশিং থমখি‍। থৌরম অদুদা নহাশিংদা হরাও তয়ামবা ফোঙদোক্লদুনা মতম পুম্নমক্তা নহাশিংনা অনৌবা স্কিল তমশিনবা ঙমবগী মতিং লৈবা মরম্না মালেম অসি মখোয়গীনি হায়না মহাক্না হায়খি‍।

মহাক্না হায়খি, চহী মঙাগী মমাঙদা নুমিৎসিমক্তদা হৌদোকখিবা স্কিল ইন্দিয়া মিসননা স্কিল, রিস্কিল অমদি অপস্কিলগী অচৌবা মচাক-মথুম অমা শেমগৎলে অমদি ইরমদমসিদা অমদি মালেমগী মফমশিংদা থবক ফংবগী খুদোংচাবা হেনগৎহল্লে‍। মসিনা মরম ওইরগা লৈবাক শিনবা থুংনা পি.এম. কৌসাল কেন্দ্র চা কয়া লিংখৎখ্রে অমদি আই.তি.আই. ইকোসিস্তেমগী কেপেসিতী হেনগৎহল্লে‍। পুন্না হোৎনমিন্নবা অসিনা, হৌখিবা চহী মঙাসিদা নহা করোর মঙা হেন্না স্কিল লৈহনখ্রে‍। হৈশিংলবা শিন্মীশিং অমদি থবক পীরিবা মীওইশিং খঙদোক্নবা হন্দক্তা নৌনা হৌদোকখিবা পোর্তেল অদুগী মতাংদা পল্লদুনা, মহাক্না হায়, মসিনা মশা মশাগী ময়ুমদা হল্লকখ্রবা মাইগ্রেন্ত শিন্মীশিং য়াওনা হৈশিংলবা শিন্মীশিংবু থবক লায়না ফংহনবদা অমদি থবক পীরিবা মীওইশিংবু মাউস অমুক নমবদা হৈশিংলবা শিন্মীশিং পাউ ফাওনবা ঙমহল্লগনি‍। মাইগ্রেন্ত শিন্মীশিংগী হৈশিংবনা মফম মফমগী শেন্মিৎলোনদা অহোংবা পুরকপদসু মতেং ওইরগনি হায়বা ৱাফম মহাক্না ফোঙদোকখি‍।

মহাক্না হৈশিংববু ঐখোয় ইশানা ইশাদা পীজবা য়াবা খুদোল অমনি হায়রদুনা মখা তাখিবদা হৈশিংবা হায়বসি মতম লৈতে, তোপ তোপ্পী, লোত্তুনা লৈরিবা মপু পান্দ্রিবা লননি অমদি কনাগুম্বা মীওই অমবু থবক ফংবা য়ারবা মীশক অমা ওইহনবতা নত্তনা অপেনবা পুন্সি অমা ওইনা হিংবদসু মতেং ওইরি‍। অনৌবা হৈশিংবগী মহৈশিং ফংনবা মহৌশাগী ওইবা ৱাখল্লোন অসিনা মীশক অমগী পুন্সিদা অনৌবা পাঙ্গল অমসুং পুক্নীং থৌগৎপা পী হায়না মহাক্না হায়খি‍। হৈশিংবা হায়বসি হিংনবগী লম্বী অমা ওইবতা নত্তনা ঐখোয়গী নুংতিগী পুন্সিদা মহাও লৈনা অমদি মতিং লৈনা হিংনবগী মরম অমসুনি‍।

প্রধান মন্ত্রীনা মহাক্কী ৱারোলদা ‘লৌশিং’ অমসুং ‘হৈশিংবা’ অনিগী মরক্তা লৈরিবা খেন্নবসু পুথোকখি‍। মহাক্না খুদম অমা লোয়ননা তাকখি – মদুদি সাইকল অমনা কমদৌনা চেল্লিবনো খঙবসিনা ‘লৌশিংনি’ অদুগা তশেংনা সাইকলদুবু থৌবা ঙমবসিনা ‘হৈশিংবনি’‍। নহাশিংনা অনিসিগী মরক্তা লৈরিবা খেন্নবা, মখোয়গী মওং মতৌ অমদি শীজিন্নফম খঙদোকপা মথৌ তাই‍। উ শুবগী মতাংদা খুদম অমা পীরদুনা মহাক্না স্কিল্লিং, রিস্কিল্লিং অমসুং অপস্কিল্লিংগী মশক মওংশিং তাকখি‍।

মহাক্না মখা তানা লৈবাকসিদা হৈশিংবা পুরক্নবগী লৈরিবা খুদোংচাবশিং মওং চুম্না শীজিন্নবগী ওইথোকপা য়াবশিংগী মতাংদা ফোঙদোকখি‍। মহাক্না ভারতকী হৈশিংলবা মীওইশিংনা মালেমগী লৈরিবা দিমান্দ মেনখৎপা য়ারবা হেল্থকেয়র সেক্তরগী মতাংদা খুদম পীখি‍। হায়রিবা দিমান্দ অসি খঙদোক্তুনা ভারতকী স্তেন্দর্দপু অতৈ লৈবাকশিংগা চাশিন্নহন্নবা ৱাফম থমখি‍। মতৌ অসুম্না, শাংলবা সমুদ্রদা ইতারকপগী চৎনবী লৈরিবা ভারতকী নহাশিংনা মালেম শিনবা থুংনা দিমান্দ হেনগৎলক্লিবা মর্চেন্ত নেভীগী লমদসু হৈথোই শিংথোইরবা জহাজ হোনবা মীশিং পুথোকপা ঙমগনি হায়বা ৱাফম মহাক্না থমখি‍।

চহী খুদিংগী জুলাই ১৫দা পাঙথোকপা ৱর্ল্দ য়ুথ স্কিল দে চহী অসিগী ওইনদি ভর্চুএল মোদতা পাঙথোকখি‍। স্কিল দেভেলপমেন্ত অমসুং ওন্ত্রপ্রিন্যুরসিপ মন্ত্রী দা: মহেন্দ্র নাথ পান্দে, স্কিল দেভেলপমেন্ত অমসুং ওন্ত্রপ্রিন্যুরসিপকী রাজ্য মন্ত্রী শ্রী আর. কে. সিংহ, অমদি গ্রুপ চেরমেন, লার্সেন এন্দ তৌব্রো লিমিতেদ, শ্রী এ. এম. নাইকসু কনক্রেব অদুদা ৱা ঙাঙখি‍। ত্রেনী লাখ কয়াগী পাক চাউরবা নেতৱর্ক য়াওনা সিস্তেম অসিগী স্তেকহোল্দর পুম্নমক্না কনক্লেব অদুদা শরুক য়াখি‍।

*****