হকশেল অমসুং য়াইফ-য়ুম্বাল মন্ত্রালয়গী কেন্দ্রগী মন্ত্রী দোক্তর হর্শ বর্ধন্না ওস্ত্রেলিয়াগী হকশেল মন্ত্রী মিস্তর গ্রেগরি এন্দ্রিয়ু হন্তকা লোয়ননা ঙসি হকশেলগী লমদা মতেং পাংনবদা খন্ননবা দিজিতেলগী থোংদা ৱারি শাখ্রে।

ভারত অমসুং ওস্ত্রেলিয়ানা ২০১৭গী এপ্রিল ১০দা হকশেল অমসুং মেদিসিনগী লমদা পুন্না থবক পায়খৎনবা এম.ও.য়ু. অমা খুয়েক পীনখি। এম.ও.য়ু. অদুদা মেলরিয়া অমসুং ত্যুবর্ক্যুলোসিসগুম্বা লৌনগনবা লায়নাশিং, মেন্তল হেল্থ অমসুং লৌনগন্দবা লায়নাশিং, এন্তিমাইক্রোবিএল রেজিস্তেন্স, ফার্মাকোতিকেলশিংগী রিগুলেসন, হীদাক লাংথকশিং অমসুং মেদিকেলগী খুশু-খুলায়শিং অমসুং হকশেলগী ইনফ্রাস্ত্রকচরশিং দিজিতাইজেসন তৌবগুম্বদা অনিমক্কী অপাম্বা লমশিং য়াওরি। এম.ও.য়ু. অদুদা হৌজিক ওইরিবা কোবিদ লায়চৎকুম্বা মীয়ামগী হকশেলগী খুদোংথীবশিং মায়োক্ননবসু য়াওরি।

অহৌবদা দা. হর্শ বর্ধন্না ওতিজমনা নারবা অঙাংশিংগী কি.মি. ৫গী রন অমসুং অঙাংশিংদা দাইবেতিস নাবদা এৱ্যেরনেস পীবগুম্বা চেরিতি ইভেন্তশিং শিল লাংবগী মিস্তর গ্রেগরি হন্তদা অপাম্বা অদু ফোঙদোকখি। পুন্না থবক তৌমিন্নবা মথৌ তাবগী মতাংদা ৱা ঙালদুনা দা. হর্শ বর্ধন্না হায় “চাওখৎলবা মালেমগী ওইবা ওস্ত্রেলিয়াগী খ্বাইদগী ফবা হেল্থক্যের সিস্তেম অমা লৈরবসু ভারত্তা হেল্থক্যের অসি লাক্কদৌরিবা চহি ১০দা বিলিয়ন $২৭৫ য়ৌগনি হায়না পানরিবা খোংজেল য়াংনা চংশিল্লিবা সেক্তর অনি। ভারতকী দোমেস্তিক দিমান্দ অসি মালেমগী শেন্মীৎলোন্দা অপনবা কয়া লৈরসু হেনগৎলক্কনি হায়না পানরি। ভারতনা আর.অমসুং দি. অমসুং মেদিকেল তুরিজমদা অচৌবা খুদোংচাবশিংসু পীরি”। ভারতকী অয়ুর্বেদ অমসুং য়োগগুম্বা মহৌশাদগী লৈরক্লবা লায়েং পথাপশিংনা ওস্ত্রেলিয়ানা ওবেসিতি অমসুং মরী লৈনবা লায়নাশিং লায়েংবদা মতেং পাংবা ঙমগনি হায়না মহাক্না মখা তাখি।   

‘হকশেল ফনা থম্বা অসি মীয়ামগী ইহৌ অমা ওইহন্নবা’ প্রধান মন্ত্রী শ্রী নরেন্দ্রা মোদীগী খোঙথাং “ভারতকী য়ুনিভর্সেল হেল্থক্যের (অয়ুশমান ভারতকী মখাদা) অসিনা ইমুং কোতি ১০০ কোনশিল্লি; মীওই কোতি ১০দা মমাং চহি খক্তদা কান্নবা ফংহনখি; ইং কুমজা ২০২৫ ফাওবদা ভারতনা তি.বি. মুথৎনবা হোৎনবা; ভারতনা হাইপর্তেন্সন, খোম, থবোম্বী, খানাও অমসুং চিনগী কেন্সর অসিনচিংবা লৌনগন্দবা লায়নাশিংগী পাক শন্না স্ক্রীনিং তৌনবা লৌখৎলিবশিং; হকশেলগী লম অসি চাওখৎনবা অমসুং প্রজা খুদিংমক্তা ফংফম থোকপা খুদোংচাবা পীনবা দিজিতেল হেল্থ ব্লুপ্রিন্ত ইমপ্লিমেন্ত তৌনবা ভারতনসু হোৎনরি; কেন্সর অমসুং কার্দিয়ো-বাস্কুলরগী অমসুং কার্দিএক ইমপ্লান্তশিংগী অনাবশিং লায়েংনবা অহোংবা হীদাকশিং এফোর্দেবল মেদিসিন্স এন্দ রিলাইএবল ইমপ্লান্তস ফোর ত্রীৎমেন্ত (অমরিৎ) প্রোগ্রামগী মখাদা লায়রবশিংগী মরক্তা খরা হেন্না শোত্থবদা ফংহল্লগনি।” হায়না দা. হর্শ বর্ধন্না ফোঙদোকখি। মহাক্না মখা তারদুনা হায় প্রধান মন্ত্রীগী “সরকারগী অপুনবা” ৱাখল্লোননা মীওই কোতি ৪০০দা শেলগী মতেং ফংহল্লি অমসুং মখোয়দা হেল্থক্যের ফংহনবদা অওনবা পুরকখ্রে। 

মিস্তর হন্তনা প্রধান মন্ত্রী শ্রী নরেন্দ্রা মোদীনা অন্তরজাতিগী ওইবা কম্ম্যুনিতীদা থম্লিবা থাজবা অসিগী মতাংদা ৱাখল্লোন ফোংদোকখি। ওস্ত্রেলিয়াগী য়ুনিভর্সেল তেলিমেদিসিন্না  হৌজিক ফাওবা কেস মিলিয়ন ১৮ লাকশিনবদা মতেং পাংখ্রে হায়না মহাক্না ফোঙদোকখি। সরকার অমসুং লনাই হোস্পিতালশিংগী অমসুং মেন্তেল হেল্থকী  সমস্য য়েংশিনবা অসিগী খত্থাংদা হেল্থ ইনফ্রাস্ত্রকচরদা মীৎয়েং থম্বা মোদেলশিং অসি মতৌ তম্বদা কান্নগনি হায়না মহাক্না ফোঙদোকখি। অহোংবা জেনরিক দ্রগশিং সপ্লাই তৌদুনা মালেমগী হীদাক্কী ৬০% সপ্লাই তৌবদা ভারতনা অচৌবা থৌদাং লৌরিবা অদু শকখঙবা উত্তুনা মহাক্না মখা তারদুনা  জিনোমিক্স অমসুং স্তেম সেল তেক্নোলোজী শীজিন্নদুনা তাংনা থোকপা লাবনাশিংগী অনৌবা হীদাক পুথোক্নবা ওস্ত্রেলিয়াদা ভারতনা মতেং করম্না পাংবা য়াবগে ফোঙদোকখি।

লায়চৎ অসিবু লাকশিনবা অমসুং য়েংশিনবদা ভারতকী মেদিকেলগী ইচিল-ইনাওশিংনা লৌরিবা থৌদাং অসিগী মতাং ফোঙদোক্লদুনা দা. হর্শ বর্ধননা হায় কোবিদ-১৯ অসি লাকশিনবদা ভারতকী মেদিকেলগী লমদা লৈরিবশিং, পেরামেদিকশিং অমসুং সাইন্তিস্তশিংনা মরু ওইবা থৌদাং অমা লৌরি। মহাক্না হায় মখোয়না হীদাক পুথোকপদা অমসুং হান্না লৈরবা হীদাকশিং অমুক হন্না শীজিন্নবদা মতেং পাংলি। মখোয়না লায়না অসি হৌরকপা মতমদা ভারস অসু আইসোলেৎ তৌখি অমসুং জিনোম সিক্বেন্সিং শীজিন্নদুনা ভাইরস অসি থিজিনবগী থবক তৌরি। “জনুৱারিদা ভাইরস অসি তেস্ত তৌনবা লেব অমখক লৈরম্বদগী ভারত্তা হৌজিক লৈবাক শীনবা থুংনা মীয়ামদা পাক শন্না তেস্ত তৌবা ফংহন্নবা লেব ১২০০ হেন্না লৈরে হায়না মহাক্না মখা তাখি। ভারতকী হীদাক শারিবশিংনসু লৈবাক ১৪০দা ভারতনা হাইদ্রোক্সিক্লোরোক্বিন সপ্লাই তৌবা ঙমহল্লি।”

হকশেল অমসুং অতোপ্পা তঙাই ফদবা লমশিংদা পুন্না থবক তৌমিন্নবদা হকশেল মন্ত্রীশিংনা য়ানবা পুরকখ্রে।

***