ঙসি য়ুনিয়ন হোম মিনিস্তর অমিৎ শাহনা হায়খি লৈবাক শীনবা থুংনা লৈরিবা সেন্ত্রেল আর্মদ পুলিস ফোর্সেস(সি এ পি এফ)শিংনা এয়রপোর্তশিং অমসুং রেলৱেজ স্তেসনশিং ঙাকপা অমসুং তেরোরিজম থেংনবা খক নত্তনা, লৈবাক অসিনা কোবিদ-১৯গী মায়োক্তা শোক্নরিবা লাল অসিদা মরুওইবা থৌদাং অমা লৌরি। ঙসি হরিয়ানাগী গুরুগ্রামদা সি.এ.পি.এফকী লৈবাক শীনবা থুংনা পাংথোক্লিবা উ থাবগী খোঙজং হৌদোকপদা হোম মিনিস্তরনা হায়খি লাইচৎ অসিদা সি.এ.পি.এফকী জৱান ৩১ লৈখিদ্রে অমসুং মখোয়গী মফমদা ইকায়খুম্নবা উৎলি। মালেম অসিনা লাইচৎ অসি মায়োক্নরিঙৈ মতমদা উ থাবগী থবক অসি পায়খৎলি।

অমিৎ শাহনা হায়খি প্রধান মন্ত্রী নরেন্দ্র মোদীগী লুচিং মখাদা কোবিদ-১৯গী মায়োক্তা লাল শোক্নরি। ঙসিদি ভারতনা মাইপাক্না লাইচৎ অসি থেংনরি। খ্বাইদগী চাউখৎলবা লৈবাকশিং ফাওবা লাইচৎ অসিনা তোরা তুরবা মতম অসিদা মী কুংনা তাবা লৈবাক অমা ওইরিবা ভারতনা কমদৌনা লাইচৎ অসি থেংনবগে হায়বগী মতাংদা মালেম পুম্নমক্না ঙক্নরি। ঙসিদি ভারতনা প্রধান মন্ত্রী নরেন্দ্র মোদীগী লমজিং মখাদা লাইচৎ অসি মাইপাক্না থেংনরি। ‘মীয়াম অমা, ৱাখল্লোন অমা, লৈবাক অমা’ হায়বা পান্দমদা প্রধান মন্ত্রীগী লুচিং মখাদা ঐখোয়না কোরোনাগী মায়োক্তা অকনবা লাল থেংনরি।

হোম মিনিস্তরনা হায়খি মালেম শীনবা থুংনা সরকার খক্তনা লাইচৎ অসি থেংনরি অদুবু ভারত্তা মীওই করোর ১৩০ অসিগী মথক্তা রাজ্য সরকারশিংনা লাইচৎ অসি থেংনরি। মসিগী লানফম অসিদা ঐখোয়গী সি.এ.পি.এফশিংনা মরুওইবা থৌদাং অমা লৌরি, কৈথেলশিং, রেলৱেজ স্তেসনশিংদা মীয়াম লাকশিনবদা মফম অদুগী পুলিস অমসুং রাজ্য সরকারগী মতেং পাংলি। মখোয় মশাগী পুন্সিগী খন্দনা কোবিদ-১৯গী মথৌ পাংথোক্লিবা সি.এ.পি.এফকী কোরোনা লান্মীশিং য়ুনিয়ন হোম মিনিস্তরনা ইকায়খুম্নবা উৎখি।

য়ুনিয়ন হোম মিনিস্তরনা হায়খি সি.এ.পি.এফকী উ থাবগী খোঙজং অসিদা উ চারা করোর ১.৩৭ থানবা পান্দম থম্লি। হিন্দুগী অরিবা লাইরিক অমা পল্লদুনা হায়খি , উ অমনা মচানুপা ১০দগী হেন্না মমল য়াম্মি।

दशकूपसमावापी, दशवापीसमोह्रदः।

दशह्रदसमोपुत्रो, दशपुत्रसमोद्रुमः।।

[পুখ্রি অমগা গুহা ১০গা মান্নৈ, পাৎ অমগা পুখ্রি ১০গা মান্নৈ;

মচানুপা অমগা পাৎ ১০গা মান্নৈ অমসুং উ অমগা মচানুপা ১০গা মান্নৈ]

য়ুনিয়ন মিনিস্তরনা হায়খি ঐখোয়না মহৌশাগী লনশিং শীজিন্নগদবনি অমসুং মখোয় মাঙহল্লোইদবনি। কনাগুম্বা অমনা মহৌশা অসি মাংহনবগী মহুৎতা মহৌশা অসি য়োকখৎকদবনি হায়না চহি কয়াগী মমাংদগী ঐখোয়গী মুনিশিংনা তকশিন্দুনা লাকখি। অদুবু ঙসিদি শীজিন্নবা হেনগৎলকপনা মরম ওইদুনা অইং-অশাগী খল কাইরকপা অমসুং মালেম অসি শাবা হেনগৎলকপগী অৱাবশিং ঐখোয়না থেংনরি। হৌজিক ওজোনগী লৈরোলশিং পাথরে। ঐখোয়না কার্বোন দাই—ক্সাইদ অমসুং কার্বোন মোনো-ওক্সাইদ কাহেন্না থাদোক্লি অমসুং ওজোনগী মরোলশিং অসি য়াওদনা থৱায় পানবা হিংবা ঙম্লোই।

পোল্লুসন হন্থহনবদা উনা লৌরিবা থৌদাংগী মতাংদা অমিৎ শাহনা হায়খি ওক্সিজেন য়াম্না পুথোকপা ঙম্বা অমসুং তোঙান-তোঙানবা নোংজু-নুংশাগী ফিবমশিংদা হিংবা ঙমগদবা উ চারাশিং উ থাবগী খোঙজং অসিগীদমক খল্লে। অকোয়গী ফিবম কন্নবা থৌরম কয়া পায়খৎলি অদুবু উ থাবা খক্তনা পোল্লুসন লাকশিনবা ঙমগনি অমসুং মালেম অসি কনগনি।

অমিৎ শাহনা হায়খি মালেম অসি কাহেন্না শীজিন্নবগীদমক প্রধান মন্ত্রী নরেন্দ্র মোদীনা লৈবাকশিংদা চেকশিনৱা পীখি অমসুং অইং-অশাগী খল কাইরকপা থেংননবা পেরিস দিক্লারেসনদা লাউথোকখিবা মোদী ফোর্মুলা মালেম্না য়ারে। প্রধান মন্ত্রীনা হোৎনবদগী ভারত্তা ইন্তরনেসনেল সোলার এল্লাইন্স লিংখৎলে। নরেন্দ্র মোদীনা গুরাতকী চীফ মিনিস্তর ওইরিঙৈ মতমদা গুজরাত রাজ্যনা ভারত্তা অহানবা ওইনা অকোয়গী ফিবম ঙাক্নবা তোখাইবা বিভাগ অমা হাংদোকখি। মৈখু চেন্দবা থাওশিং অমসুং পেত্রোলদা ইথানোল য়ানশিনবগী থবক অসি প্রধান মন্ত্রীনা  পুক্নিং থৌগৎলি। অকোয়বগী ফিবম কন্নবা থৌরাং অমা ওইনা ভারত সরকারনা খুঙ্গংগী য়ুমশিংদা লেম্না সিলিন্দর করোর ৮ য়েন্থোকখ্রে।

মহাক্কী লোইশিল্লকপগী ৱারোলদা অমিৎ শাহনা হায়খি উ থাখিবা অসিনা অরোইবনি হায়না সি.এ.পি.এফশিংনা খল্লোইদবনি। মখোয় মশা মরোমদোম হিংবা ঙমদ্রিবা ফাওবা উ চারাশিং শেন্নগদবনি। লৈবাক অসি ঙাকপা খক নত্তনা উ চারা করোর অমা থানবা অচৌবা খোঙজং অসিদা শরুক য়ারিবা সি.এ.পি.এফ জৱানশিংগী থৌনা ঐনা থাগৎলি।

থৌরম অদুদা অমিৎ শাহনা পিপাল চারা অমা থাখি। য়ুনিয়ন হোম সেক্রেতরি, অজয় কুমার বাল্লা, সি.এ.পি.এফ তরেৎকী দিরেক্তর জেনেরেলশিং অমসুং সেনিয়র ওফিসিএলশিং শরুক য়াখি।  উ থাবগী খোঙজং হৌদোকপা ওইনা লৈবাক শীনবা থুংনা সি.এ.পি.এফশিংনা লৈরিবা তোঙান-তোঙানবা মফমশিংদা উ চারা লাখ ১০ হেন্না থাখি।

প্রধান মন্ত্রী নরেন্দ্র মোদীগী পান্দমনা ইথিল পীদুনা য়ুনিয়ন হোম মিনিস্তর অমিৎ শাহগী লুচিং মখাদা চহি অসিদা উ চারা করোর ১ থানবা পান্দমদা ২০২০গী ফেবুৱারিদগী মসিগী উ থাবগী খোঙজং অসি সি.এ.পি.এফশিংনা পায়খৎলকপনি। অকক্নবা মফমশিংদা অকক্নবা পাম্বী মখলশিং থানবা তাইমতেবল অমা শেম্লে অমসুং মসিগীদমক নোদেল ওফিসার অমা হাপ্লে। য়ারিবমখৈ মফম অদুগী উ মখলশিং থানবা ৱারেপ লৌরে অমসুং থাগদৌরিবা উশিং অদুগী তঙ্খাই অমা চহি ১০০ নৎত্রগা মসিদগী হেন্না শাংনা হিংগদবা উ মখলশিং থাগনি।

য়ুনিয়ন হোম মিনিস্তরনা উ থাখিবা অদুদা অকোয়বগী ফিবম ঙাক্নবা থবকশিংদা সি.এ.পি.এফগী মীওইশিং পুক্নিং থৌগৎখি। অশং-অমান্না থল্লবা ভারত অমা শেমগৎনবা সি.এ.পি.এফকী থৌরাং অমগী মখাদা উ থাবগী খোঙজং অসি পায়খৎলকপনি। সি.এ.পি.এফকী মীওইশিংনা ২০২০গী জুন ৩০ ফাওবদা লৈবাক শীনবা থুংনা উ চারা লাখ ২০ হেন্না থাখ্রে। লাক্কদৌরিবা চহিশিংদসু মসিগা মান্নবা খোঙজংশিং সি.এ.পি.এফ.শিংনা পায়খৎকনি।

***