রেলৱে মন্ত্রালয়
ইন্দিয়ন রেলৱেনা ইহান হানবা ওইনা বঙ্গলাদেশতা অখন্নবা পার্সেল ত্রেন থাখ্রে
রেলৱেজনা শেমদোক্লবা অমসুং মথৌ নিংথীনা পাঙথোকপা ফ্রৈৎ মথৌ তৌহন্নবা হোৎনরি
রেদ্দিপাল্মে (গুনতুর)দগী বেনাপোলে (বঙ্গালদেশ)তা অকংবা মোরোকশিং থাখ্রে
Posted On:
12 JUL 2020 2:33PM by PIB Imphal
ইন্দিয়ন রেলৱেজনা ইহান হানবা ওইনা লৈবাক অসিগী ঙমখৈ লান্না বঙ্গলাদেশকী বেনাপোলেদা অন্ধ্র প্রদেশ রাজ্যগী গুনতুর জিল্লাদগী অকংবা মোরোকশিং হাপতুনা অখন্নবা পার্সেল ত্রেন থাখ্রে।
অন্ধ্র প্রদেশকী গুনতুর অমসুং মসিগী অকোইবদা লৈরিবা মফমশিং অসি মোরোক লোকপগীদমক মমিং চৎলি। মসিগী ফার্মদগী পুথোকপা পোত্থোক অসিগী মগুন অসি মাগী তোপ তোপ্পা মহাও অমসুং মমিংগীদমক মালেমগী থাক্তা খঙনৈ। মমাংদা, গুনতুরগী অকোইবদা লৈবা লৌমী অমসুং লল্লোন ইতিক তৌবশিংনা বঙ্গলাদেশ তম্না মখা লম্বীদা চাং নেম্না থারমই অমসুং মসিদা চাউরাক্না চঙবা শেলসি তন অমদা লুপা ৭০০০ মুক্নি। লোকদাউনগী মনুংদা, মখোয়না মসিগী তঙাইফদবা পোৎলমশিং অসি লম্বীদা পুবগী খুদোংচাবা ফংখিদে। মসিগী মতুংদা রেলৱেগী স্তাফশিং অমসুং ওফিসিএলশিংনা দোলালিশিংগা পাউ ফাওনদুনা রেলনা পুবগী মতাংদা ৱারী শাখি। মসিগী মতুং ইন্না, মখোয়না অকংবা মোরোকশিংবু পোৎচৈ পুবা ত্রেনশিংনা মপৈ মপৈ পুখি। অদুবু পোৎচৈ পুবা ত্রেনশিংদা পুহন্নবগীদমক্তদি লৌমী অমসুং করবারৱালাশিংনা পোৎশিং অসি য়ামদ্রবদা তন ১৫০০গী মথক্তা পুরক্কদবনি।
হায়রিবা সমশ্যা অসি কোক্নবগীদমক্তা অমসুং রেল য়ুজরশিংনা মখোয়গী পোৎ অদু অপীকপা চাংদা হায়বদি য়াম্লবদা তন ৫০০মুক ত্রিপ অমদা পুবা য়ানবগীদমক সাউথ সেন্ত্রেল রেলৱেগী গুনতুর দিবিজন্না বঙ্গলাদেশতা অখন্নবা পার্সেল এক্সপ্রেস থানবা খোংথাং লৌখৎলকখি। মসিনা গুনতুরগী লৌমীশিংদা মখোয়গী ফার্মদগী পুথোকচরকপা পোত্থোকশিংবু লৈবাক অসিগী ৱাংমদা অকংবা মোরোকশিং অসিবু অখন্নবা পার্সেল এক্সপ্রেসকী খুথাংদা য়োনবা য়াহনখ্রে।
মসিগীদমক, বঙ্গলাদেশকী বেনাপোলেদা পার্সেল ভেন ১৬ য়াওবা অখন্নবা পার্সেল এক্সপ্রেস অমা থাখি। পার্সেল ভেন অমমমদা চাউরাক্না তন ১৯.৯ লুপবা অকংবা মোরোক্কী খাউ ৪৬৬ য়াওখি, অমসুং অখন্নবা পার্সেল এক্সপ্রেস অসিদা পুখিবা অপুনবা অরুম্বসি তন ৩৮৪নি। অখন্নবা পার্সেল এক্সপ্রেস অসিদা তন অমা পুবদা চঙবা শেল অসি ৪,৬০৮নি অমসুং তন অমদা লুপা ৭,০০০ চঙবা লম্বীদা গারীনা পুবদগীদি মসিনা হেন্না হোংবা হেল্লি অমসুং শেল মাঙহন্দবা হেল্লি।
মসিমসু নিংশিংবা য়াই মদুদি ইন্দিয়ন রেলৱেনা কোবিদকী মনুংদা পার্সেল ত্রেনগী ত্রাফিক হেনগৎহন্নবা খোংথাং কয়া মথং মথং লৌখৎখ্রবনি।
অপীকপা পার্সেল সাইজগী হিদাক লাংথক্কী সপ্লাই, খুৎশু খুৎলাই, চীঞ্জাক অসিনচিংবশিং অসি লল্লোন ইতিক তৌনবগী অমসুং য়ুমদা শীজিন্ননবগীদমক য়াম্না মরুওইবা পোৎলমশিংনি। মসিগী তঙাইফদবা পোৎলম অসি ফংহন্নবগীদমক ইন্দিয়ন রেলৱেনা রেলৱে পার্সেল ভেনশিংবু ই কম্মর্স এন্তাইতীশিংনা অমসুং রাজ্য সরকার য়াওনা অতোপ্পা কস্তমরশিংদা অথুবদা চাং য়াম্না পুবা য়াহনখি। রেলৱেনা তাইম তেবল ওইবা পার্সেল ত্রেনশিং অখনবা লম্বীদা তঙাইফদবা পোৎলমশিং থাদোক থাজিন তৌবা লেপতনবগীদমক চেলহনলি।
২২.০৩.২০২০দগী ১১.০৭.২০২০ ফাওবদা অপুনবা পার্সেল ত্রেন মশীং ৪৪৩৪ চেনখ্রে মসিগী মনুংদা ৪,৩০৪না তেম তেবল ত্রেনশিংনি।
***
(Release ID: 1638157)
Visitor Counter : 156