সেসন ২০২০-২১দগী হৌদুনা, অহানবা ওইনা মমি লৈরবা পতিয়ালাগী নেতাজি সুভাস নেসনেল ইন্সতিতুৎ ওফ স্পোর্ত(এন.এস.এন.আই.এস)তা স্পোর্তস কোচিংগী দিপ্লোমা কোর্সতা মশক নাইরবা শান্নরোই নুপা অমসুং নুপী ৪৬ হকথেংন্না মিং চল্লগনি । মসিগী ৱারেপ অসি য়ুথ এফেয়ার্স অমসুং স্পোর্তসকী য়ুনিয়ন মিনিস্তর কিরেন রিজিজুনা লাউথোকখিবনি । হৌজিক, কোর্স অসিদা শক্নাইরবা শান্নরোইশিং মশিং য়াম্না শরুক য়ানবা থবক অমা পায়খৎলকপদগী, মমাংদা চৎনরম্বা মিং চনবগী নিয়ম খর কোমথোক্লগনি ।

কোর্স অসিদা মিং চন্নবা শান্নরোইশিংগী মহৈগী থাক ১০+২ ওইরম্বা অদু অহোঙবা পুরক্তুনা এসিয়ান অমসুং কম্মনৱেল্থ গেমশিংদা মেদল ফংলবশিং অমসুং সেনিয়র ৱাল্দ চেম্পিয়নসিপশিংদা শরুক য়ারুরবশিং কোর্স অসিদা মিং চনবা য়ারগনি । হান্নগী চৎনবীদা,  শান্নরোই অমা তঙাইফদনা সেনিয়র ৱাল্দ চেম্পিয়নসিপতা মেদল অমা ফংগদবনি, অদুবু অনৌবা কাংলোন অসিগী মতুংইন্না চেম্পিয়নসিপ অসিদা শরুক য়ারুবা শান্নরোই অমা কোর্স অসি য়াওবা য়ারগনি । এসিয়ান নৎত্রগা কম্মনৱেল্থ গেমশিংদা সনাগী মেদল অমা ফংগদবনি হায়বা কাংলোন অদুগী মহুৎ ওইনা হায়রিবা থৌরমশিং অদুদা সনা নৎত্রগা সিলভর নৎত্রগা ব্রোঞ্জ মেদল অমা হেক্তা ফংলবদি য়ারে । ওলেম্পিকশিং শরুক য়ারুবা শান্নরোইশিং কোর্স অসি মিংচনবা য়ারে ।

ৱারেপ অদুগী মতাংদা, স্পোর্তস ওথোরিতি ওফ ইন্দিয়াগী দিরেক্তর জেনেরেল সন্দিব প্রধান্না হায়খি ভারতকী শান্নবগী হৌজিক ওইরক্লিবা ফিবম অসিদা কোচ মশিং য়াম্না দরকার ওইবা অমসুং লৈবাক অসিদা খ্বাইদগী ফবা শান্নারোইশিং লাকহন্নবা ভারতকী মশক নাইবা শান্নরোইশিং কোচিংগী শীনফমদা য়াওহনবা অসি য়াম্না মরুওইবনি । মিং চনবদা শক্নাইরবা শান্নরোইশিংগীদমক কোমথোকপা অসিনা কোর্স অসিদা মখোয় মশিং য়াম্না শরুক য়াবা ঙমহনগনি ।

স্পোর্তস ২৩গীদমক শক্নাইরবা শান্নরোই ৪৬(মশান্না অমমমগী নুপা ১, নুপী ১)খনগনি অমসুং কোর্স অসিগী পুৱারিদা অহানবা ওইনা ওনলাইন্দা পাংথোক্কদৌরিবা ইনত্রান্স একজামদা মখোয় শরুক য়ারোই । অদুবু, কোর্স অসিগীদমক হকথেংননা খল্লবা শক্নাইরবা শান্নরোইশিং অতোপ্পা কেন্দিদেৎশিংগা লোয়ননা মেদিকেল অমসুং ফিজিকেল তেস্তশিং পাংথোক্কনি ।

করিগুম্বা মশান্না অমদা শক্নাইরবা শান্নরোই অনি মিং চন্নবা লাক্লবদি , পোইন্ত সিস্তেমদা অরোইবা কেন্দিদেৎ অমা খনগনি ।

মশক নাইবা শান্নরোইশিং কোমথোকপা অসি য়েংলগা , কোর্স অসিদা শরুক য়ানবা ওনলাইন এপ্লিকেসন পীশিনবগী অরোইবা নুমিৎ জুলাই ৩১ ফাওবা শাংদোকলে ।

শক্নাইরবা শান্নরোইশিংগী মথক্তা, অতোপ্পা কেন্দিদেৎশিংগী ওইনা, হৌজিক ওইরিবা কোরোনা লাইচৎকী ফিবম অসি য়েংলগা, দিগ্রি কোর্সশিংগী অরোইবা পরিক্ষাগী ফলশিং ঙাইরিবশিং নৎত্রগা মখোয়না তমলিবা য়ুনিভর্সিতিশিংগী দিগ্রি কোর্সশিংগী অরোইবা পরিক্ষা পাংথোক্ত্রিবা কেন্দিদেৎশিং দিপ্লোমা কোর্স অসিদা মিং চন্নবা ওনলাইন্দা শরুক য়াবা য়াগনি অদুবু ২০২০গী সেপ্তেম্বর ৩০ ফাওবগী মনুংদা অরোইবা চহি পরিক্ষা পাস তৌবগী শক্তাকচে পুথোক্কদবনি ।

***