কোবিদ-১৯গী মতাংদা অৱাংবা থাক্কী গ্রুপ ওফ মিনিস্তর (জি.ও.এম.)গী ১৮শুবা মীফম হকশেল অমদি য়াইফ-য়ুম্বালগী কেন্দ্র মন্ত্রী দা. হর্শ বর্ধননা থৌরম মপু ওইদুনা ঙসি মফমসিদা ভিদিও কন্ফরেন্সিংগী খুত্থাঙদা পাঙথোকখ্রে‍। কেন্দ্রগী ফোরেন মন্ত্রী দা. এস. জয়সঙ্কর, সিভিল এভিএসনগী কেন্দ্র মন্ত্রী শ্রী হরদীপ এস. পুরি, হকশেল অমসুং য়াইফ-য়ুম্বালগী রাজ্য মন্ত্রী শ্রী অস্বিনি চৌবে, অমসুং কেমিকেল অমসুং ফর্তিলাইজর অমদি সিপ্পিংগী রাজ্য মন্ত্রী শ্রী মনসুখ মন্দাভিয়া অদুগা নিতি আয়োগ মেম্বর (হকশেল) দা. বিনোদ পোলনা ভিদিও কন্ফরেন্স লিঙ্ককী খুত্থাঙদা মীফমদুদা শরুক য়াখি‍।

মীফমদুদা জি.ও.এম. অদুদা ভারত্তা হৌজিক ওইরিবা কোবিদ-১৯গী ফীভমগী মতাংদা পাউদমখি‍। মালেমগী ওইনা খ্বাইদগী শোকপা লৈবাক মঙা লৌখত্তুনা চাংদম্নবদা ভারতনা মীওই মিলিয়ন খুদিংদা নাবা (৫৩৮) অমসুং মীওই মিলিয়ন খুদিংদা শিবগী চাং (১৫) মালেমগী লৈরিবা মথংশিৎনা ১৪৫৩ অমসুং ৬৮.৭সিগা য়েংনবদা ভারতনা খ্বাইদগী নেম্লি‍। ঙসি ফাওবগী ওইনা য়েংবদা লৈবাক অসিদা স্তেত নিপানদা (মহারাস্ত্র, তামিল নাদু, দিল্লী, কর্নাতকা, তেলঙ্গনা, অন্ধ্র প্রদেশ, উত্তর প্রদেশ অমসুং গুজরাত) অপুনবা হৌজিক নারিবা মীশিংগী চাদা ৯০ লৈরি‍ অমদি দিস্ত্রিক্ত ৪৯দা হৌজিক নারিবা মীশিংগী চাদা ৮০ লৈরি‍। মসিগী মথক্তা স্তেত তরুক্তা (মহারাস্ত্র, দিল্লী, গুজরাত, তামিল নাদু, উত্তর প্রদেশ অমসুং ৱেস্ত বেঙ্গল) শীবা মীশিংনা অপুনবা শিবা মীশিংগী চাদা ৮৬ অমসুং দিস্ত্রিক্ত ৩২না অপুনবা শিবা মীশিংগী চাদা ৮০ লৈরি‍। মীশিং ৱাংনা শিরিবা মফমশিংদা অখন্নবা থৌরাংশিং লৌখৎলি হায়না জি.ও.এম. অদুদা পাউদমখি‍।

লৈবাকসিগী কোবিদ-১৯ হেল্থকেয়র ইন্ফ্রাস্ত্রকচরগী মতাংদা ৱাফমশিং থম্লদুনা, ঙসি ফাওবদা লৈবাকসিদা আইসোলেসন ফমুং (আই.সি.য়ু. ঙাক্লৌ য়াওদবা) ৩,৭৭,৭৩৭, আই.সি.য়ু. ফমুং ৩৯,৮২০ অমসুং ভেন্তিলেতর ২০,০৪৭গা লোয়ননা ওক্সিজেনগী ঙাক্লৌ য়াওবা ফমুং ১,৪২,৪১৫ লৈবগা লোয়ননা ফেসিলিতী পুন্না ৩৯১৪ লৈরে‍। হেল্থকেয়র লোজিস্তিক্কী মতাংদনা পুন্না এন.৯৫ মায়খুম লাখ ২১৩.৫৫, পি.পি.ই. লাখ ১২০.৯৪ অমসুং ঐচ.সি.ক্যু. গুলি লাখ ৬১২.৫৭ য়েন্থোকখ্রে‍।

অনলোক ২.০ গী মনুংদা লৌখৎলিবা তুংগী খোঙফমশিংদি হকশেল অমসুং য়াইফ-য়ুম্বাল মন্ত্রালয়গী চৎন-পথাপকী মতুং ইন্না কন্তেন্মেন্ত জোন য়াত্থোক্তুনা থমবা য়াওনা লাকশিনবা অমদি শেন্নবা হায়বসিদা অকনবা মীৎয়েং চঙবা; কন্তেন্মেন্ত জোনশিং ৱেবসাইততা খঙহনবা; তঙাইফদবা থৌওংখক্তমক য়াহনবগা লোয়ননা অকোয়বদা চেকশিন্না শেন্নবা; অকনবা কন্তেক্ত ত্রেসিং, য়ুম-য়ুম চঙদুনা থিবা/য়েংশিনবা; অমসুং ওইরকপা য়াবা অনৌবা কেসশিং লাকশিন্নবা কন্তেন্মেন্ত জোনশিংগী মপান্দা বফর জোনশিং খঙদোকপনি‍।

চাং নাইনা পায়খৎবা কেন্দ্র অমসুং স্তেত/য়ু.তি. তেংবাংনবগী থৌরাংশিংগী মনুংদা খ্বাইদগী শাথিনা শোকহল্লবা স্তেতশিংদা লমজিং লমতাক পীননবা কেন্দ্রগী পব্লিক হেল্থ এক্সপর্তকী কাঙবুশিং চাং নাইনা চৎপা অমদি স্তেতশিংদা কন্তেন্মেন্ত অমসুং কন্ত্রোলগী থৌরাংশিং হেন্না মতিং লৈহন্নবগীদমক শৌগৎপিবগী থৌওংশিং য়াওরি হায়বা ৱাফম পনখি‍। স্তেত/য়ু.তি.শিংগা কেবতনেত সেক্রেতরীগা চাং নাইনা ভিদিও কন্ফরেন্স পাঙথোক্লিবা অসিনা লাইচৎ অসি শন্দোরকপদগী লাকশিনবা, তেস্ত তৌবগী মশীং হেনগৎহনবা অমদি শিবগী চাং হন্থহনবা হায়বা ৱাফমশিংদা মীৎয়েং চঙলি‍।

দা. হর্শ বর্ধননা হায়খি মদুদি “ঐখোয়না মাঙদা অদুম চঙশিল্লকসিদা, লাকশিন্নবগী অমদি য়েংশিনবগী অকনবা থৌরাং; তেস্তিং কেপাসিতী মপুং ফানা শীজিন্নবা; অতোপ্পা অনাবা লৈবা অমদি অহল ওইরবা মীওইশিং শেন্নবদা মীৎ য়েং চঙবা; আরোগ্য সেতুগুম্বা দিজিতেল তুলশিংগী মতেং লৌদুনা নৌনা হোতস্পোত ওইরক্লিবা মফমশিং মাঙজৌননা খঙদোকপা; অনাবা এদমিসন তৌবগী থৌওংদা অপনবা লৈহন্দবা; মচাক মথুম (ক্রিতিকেল কেয়র ফমুং, ভেন্তিলেতর অমদি লোজিস্তিক) শেম শাদুনা থমবদা মীৎয়েং চঙবা হায়রিবা থৌওংশিংগী খুত্থাঙদা কোবিইদ-১৯ মেনেজ তৌবদা ঐখোয়গী মীৎয়েং থমগদবনি‍।” ঐখোয়গী পান্দমদি স্তেত/য়ু.তি.শিংগা লোয়ননা ঙন্না খঙদোকপা অমদি মতিক চাবা ক্লিনিকেল মেনেজমেন্ত পীদুনা শিবগী চাং হন্থহনবা অমদি নেম্না থমবা অসিনি,” হায়না মহাক্না থমখি‍।

দা. সুজীত কে. সিংহ, দাইরেক্তর (নেসনেল সেন্তর ফোর দিজীজ কন্ত্রোল)না লাইচৎ মনুংসিদা ভারত্তা পায়খৎখিবা সর্ভিলেন্সকী মচা খায়বা রিপোর্ত অমা থমখি‍। এস.এ.আর.আই./আই.এল.আই. কেসশিং, সেরোলোজিকেল সর্ভে অমসুং লৈবাক পুম্বগী ওইনা তেস্ত তৌবগী চাং হেনগৎহন্নবা লেব নেতৱর্ক হেনগৎহনবনচিংবগী খুত্থাঙদা কন্তেন্মেন্তকী অকনবা লাল্লোং অমসুং সর্ভিলেন্সতা মীৎয়েং চঙলি‍। লৈবাকসিদা য়াম্না নুংনাংনিংঙাই ওইবা ৱাফমশিংসু পুখৎখি অমদি কেস ফেতালিতী রেসিও হন্থহন্নবা তেস্ত তৌবগা লোয়ননা মতম চানা ক্লিনিকেল মেনেজমেন্ত পীবা অমসুং অতোপ্পা অনাবা লৈবা খুদোংথিবগী চাং ৱাংবা মীয়ামদা সর্ভিলেন্সকী থৌওং য়াওনা পায়খৎকদবা থৌরাংশিংসু থমখি‍।

এম্পৱর্দ গ্রুপ-৮ (ওন ইন্ফোর্মেসন, কম্ম্যুনিইকেসন এন্দ পব্লিক এৱ্যারনেস)কী চেয়রমেন শ্রী অমিত খারেনা থমখিবা মচা খায়বা প্রজেন্তেসন অদুদা ঈ-পাউ ফাওদোক ফাওজিন অমসুং মীয়ামদা হেন্না খঙহন্ননবগী লৌখৎখিবা মরুওইবা খোঙথাঙশিংগী মতাংদা জি.ও.এম. অদুদা পাউদমখি‍। গ্রুপ অসিনা অরানবা পাউগী এলর্ত ৬,৭৫৫ ফংখি, মদুগী মনুংদা ৫,৮৯০দি হকথেংননা পাউখুম পীখি অমদি মপান লৈবাক্কী মেদিয়াগী পাউ ১৭কী মতাংদা শেংদোক ৱারোল ফোঙখ্রে‍। গ্রুপ অসিনা কোবিদ-১৯গী দেলী বুলেতিন ৯৮ ফোঙবদা, মেদিয়া ব্রিফিং ৯২ পীবদা, অমদি প্রেস রিলীজ ২,৪৮২ থাদোকপদা মতেংসু পাংখি‍। লাইচৎ মনুংসিদা লমচৎ শাজৎ হোংদোকপগী কেম্পেন পাঙথোকপদা অমদি প্রধান মন্ত্রীনা হৌদোকখিপা আত্ম নিরভর ভারত অভিয়ানগী মখাদা লৌমীশিংদা অমদি এম.এস.এম.ই.শিংদা পীরিবা তেংবাংগী থৌরাংশিংগী মতাংদা মীয়ামদা খঙহনবদা গ্রুপ অসিনা মাঙজিল থানা থৌদাং য়াখি‍। মাঙদা চঙশিল্লকপসিদা কোবিদ-১৯ লাইচৎকা মরী লৈননা পুক্নীং ৱাখল ফনা লৈবগা মরী লৈনবা ৱাফমশিং মেদিয়াদা খন্ন-নৈনবগী খুত্থাঙদা ঈ-পাউ ফাওদোক্নবগী অচৌবা শরুক অমা ওইগনি হায়বা ৱাফম থমখি‍। ইন্তরপর্সোনেল অমদি মাস কম্ম্যুনিকেসনগী খুত্থাঙদা মীশিং য়াম্না য়ৌহনবা ঙম্নবা পাউজেল অমদি ঈ-পাউশিং লম-লমগী লোনদা পীনবগী মতাংদসু মীৎয়েং থমখি‍।

সেক্রেতরী (হেল্থ) মিস প্রীতি সুদন, ও.এস.দি. (এম.ও.ঐচ.এফ.দব্লিউ.) শ্রী রাজেশ ভুষন, সি.ই.ও. (নিতি আয়োগ) শ্রী অমিতাব কান্ত, দি.জি. (আই.সি.এম.আর.) দা. বলরাম ভরগঙা, সেক্রেতরী (ফার্মা) শ্রী পি.দি. ভঘেলা, সেক্রেতরী (সিপ্পিং) শ্রী সঞ্জীব রঞ্জন, সেক্রেতরী (তেক্সতাইল্স) শ্রী রবি কপুর, সেক্রেতরী (দি.দব্লিউ.এস.) শ্রী পরমেস্বরন ঐয়র, সেক্রেতরী (এম.ই.আই.তি.ৱাই.) শ্রী অজয় প্রকাশ সোহনী, আই.তি.বি.পি.গী মীহুৎশিং ভর্চুএল মেদিয়াগী খুত্থাঙদা শরুক য়াখি‍।

****