জম্মু অমসুং কশ্মীরগী ইন্তরনেস্নেল বোর্দর (আই.বি.) অমসুং লাইন ওফ কন্ত্রোল (এল.ও.সি.) ময়াদা লৈবা চেকশিন্নিংঙাই ওইবা ঙমখৈগী মফমশিংদা লৈবা লম্বী অমসুং থোং শম্নহনবগী অনৌবা য়াওল অমা পুরক্লদুনা ঙাকশেল মন্ত্রী শ্রী রাজনাথ সিংহনা ঙসি মফমসিদগী ভিদিও কন্ফরেন্সিংগী খুত্থাঙদা লাল্লোং য়াৎপদা মরুওইবা থোং তরুক লৈবাকসিদা কত্থোকখ্রে‍। লাল্লোং য়াৎপদা য়াম্না মরুওইবা থোংশিং অসি বোর্দর রোদ ওর্গনাইজেসন (বি.আর.ও.)না তেল্লবা মতমদা রেকোর্দ থমদুনা লোইশিনখিবনি‍।

ঙাকশেল মন্ত্রীনা বি.আর.ও.গী রেঙ্ক খুদিংমকপু থোং তরুক অদু তেল্লবা মতমদা রোকোর্দ থমদুনা লোইশিনখিবগীদমক্তা নুংঙাইবা ফোঙদোকখি অমদি মখোয়বু খ্বাইদগী খুদোংথিনিংঙাই ওইরবা চীংমায় মরক্তা অমদি ঈশিং নুংশিৎকী ফীভম মরক্তা থবক শুদুনা লৈবাকসিবু মপাঙ্গল কনখৎহনবদা থৌদাং য়াখিবগীদমক্তসু থাগৎখি‍। লম্বী অমসুং থোং অসি লৈবাক খুদিংমক্কী হিংনবগী লম্বী ওইরি অমদি মনুং হঞ্জিনবা মফমশিংদা খুন্নাইলোন-শেন্মিৎলোন চাওখৎহনবদা মরুওইবা শক্লোন লৌরি হায়না মহাক্না হায়খি‍। কেন্দ্র লৈঙাক্না জে. অমসুং কে.দা চাওখৎপা পুরকপগী থবক থৌরমশিংদা লেপ্লিবা খোঙফমগী মতাংদা পল্লদুনা মহাক্না হায়, ঐখোয়গী প্রধান মন্ত্রী শ্রী নরেন্দ্র মোদীনা হায়রিবা প্রোজেক্তশিং অসিদা চাং নাইনা য়েংশিল্লি অমদি মতম চানা থবক পায়খৎনবগীদমক ফন্দ মরায় কায়না পীথরি‍।

শ্রী রাজনাথ সিংহনা হায়, “ঙসি মালেম অসিনা লাপথোক্ননবা হোৎনরিঙৈ, অমগা অমগা তোখায় তোখায় লৈনরিঙৈ (কোবিদ-১৯না মরম ওইরগা) তাল্লকসিদা ‘মীয়ামবু শনজিন্নহনবা’ থোংশিং অসি শঙ্গাবা অসি নুংঙাইরবা ইতিও অমা ওইরি‍। ঐনা বোর্দর রোদ ওর্গনাইজেসনবু মরুওইবা থবক অসি য়াম্না হৈ-শিংবগা লোয়ননা লোইশিনবগীদমক্তা থাগৎপা ফোঙদোক্লি‍।”

বি.আর.ও.বু থাগৎলদুনা ঙাকশেল মন্ত্রীনা হায়, “বি.আর.ও.না লেপ্পা নাইদনা খোঙফম চেৎনা লেপ্তুনা লৈবাকসিগী ঙমখৈগী মফমশিংদা লম্বী অমসুং থোংশিং শেমগৎলকপসিনা খ্বাইদগী মনুং হঞ্জিনবা মফমশিংদা য়ৌশিন্নবগীদমক লৈঙাক অসিনা পায়খৎলিবা থৌরাংশিং অসি মংফাওনহনবদা মতেং ওইরগনি‍।” ঙমখৈগী মফমশিংদা লৈরিবা লম্বীশিং অসি মরুওইবা লাল্লোং কনখৎহনবতা নত্তনা মনুং হঞ্জিনবা মফমশিংবু ময়োললমগা শমজিন্নহনবগী থবকসু তৌরি‍। মতৌ অসুম্না আর্ম ফোর্সগী লাল্লোংগী মরুওইবা ওইরবসু নৎত্রগা হকশেল, মহৈ-মশিং অমসুং লল্লোন ইতিক্কা মরী লৈনবা অতোপ্পা চাওখৎ থৌরাংগী থবক ওইরবসু, পুম্নমকশিং অসি শমজিন্নহনবসিখক্তনা ওইথোকপা ঙমহল্লিবনি, হায়না মহাক্না মখা তাখি‍।

জম্মু অমসুং কশ্মীরগী মীয়ামবু মখোয়গী তেংবাংগীদমক থাগৎলদুনা, শ্রী রাজনাথ সিংহনা হায়, “অনৌবা মতমগী লম্বী অমদি থোংশিং শেমগৎপা অসিনা লমদমসিদা নুংঙাই য়াইফবা পুরক্কনি হায়না ঐনা থাজৈ‍। ঐখোয়গী লৈঙাক অসিনা ঐখোয়গী ঙমখৈগী মফমশিংদা ইন্ফ্রাস্ত্রকচর য়োকখৎপদা খোঙফম চেৎনা লেপ্লি অমদি মসিগীদমক মথৌ তাবা মচাক মথুমশিং পীগনি‍। ঐখোয়গী লৈঙাক অসিনা জম্মু অমসুং কশ্মীরদা চাওখৎ থৌরাং পায়খৎপদা পুক্নীং লুপ্লি‍। জম্মু অমসুং কশ্মীরগী মীয়াম অমদি খুৎলাই পাবা লান্মীশিংগী মথৌ তাবশিং পুক্নীংদা থম্লদুনা অতৈ অতোপ্পা চাওখৎ থৌরাংগী থবক কয়াসু পায়খৎকদবগী লেংদুনা লৈরি অমদি হায়রিবশিংসি মতমগী মতুং ইন্না লাউথোরক্লগনি‍। জম্মু রিজনদা কিলোমিতর ১০০০রোম শাংবা লম্বীশিং হৌজিক হৌজিক শেমগৎলি‍।”

হৌখিবা চহী অনিসিদা খ্বাইদগী অনৌবা তেক্নোলোজী অমসুং স্তেত-ওফ-দি-আর্ত খুৎলায়শিং শীজিন্নদুনা বি.আর.ও.না কিলোমিতর ২,২০০গী মথমক্তা চীং ককখ্রে, কিলোমিতর ৪,২০০রোমগী লম্বী তেমথোকখ্রে অমসুং মিতর ৫,৮০০ রোমগী লেংদ্রবা থোংশিং শাখ্রে হায়বা ৱাফম ঙাকশেল মন্ত্রীনা থমখি‍।

লাল্লোং য়াৎপদা মরুওইবা লম্বীশিং শেমগৎনবগীদমক বি.আর.ও.দা মচাক মথুং মতিক চানা পীননবা থৌরাং লৈঙাক অসিনা লৌখৎলি‍। কোবিইদ-১৯ লাইচৎ লৈজরবসু, লৈঙাক অসিনা বি.আর.ও.গী মচাক মথুম অৱাৎপা লৈহল্লোই‍। অদুগা বি.আর.ও.গী ইঞ্জিনিয়রশিং অমদি থৌমীশিংগী খুদোংচানবা থৌরাংশিং মন্ত্রালয়না য়েংশিনগনি হায়না মহাক্না থাজবা পীখি‍।

থোংশিং অদু শঙ্গাবদা রাজ্য মন্ত্রী (এম.ও.এস.) (ইন্দিপেন্দেন্ত চার্জ) অমসুং এম.ও.এস. প্রধান মন্ত্রীগী ওফিস, পর্সোনেল, পব্লিক গ্রিভান্সেস অমসুং পেন্সন্স মন্ত্রালয়, দিপার্তমেন্ত ওফ এতোমিক ইনর্জী অমদি দিপার্তমেন্ত ওফ স্পেস দা: জিতেন্দ্র সিংহসু শরুক য়াখি‍। জম্মুগী মেম্বর ওফ পার্লিয়ামেন্ত শ্রী জুগল কিশোর শর্ম্মসু ভিদিও লিঙ্ককী খুত্থাঙদা থোং শঙ্গাফমদা শরুক য়াখি‍।

তর্নাহ নল্লাদা শাবা থোং অনি অমসুং অখনুং/জম্মু দিস্ত্রিক্তা লৈবা অখনুং-পল্লনৱালা লম্বীদা লৈবা থোং মরীদু মিতর ৩০দগী মিতর ৩০০ ফাওবগী চাংদা শাংই অমদি অপুনবা শেন্ফম লুপা করোর ৪৩ চঙনা শাখিবনি‍। বি.আর.ও.গী প্রোজেক্ত সম্পর্কনা শাখিবা থোংশিং অসিনা লাল্লোং য়াৎপদা য়াম্না মরুওইবা সেক্তরসিদা খুৎলায় পায়বা লান্মীশিংনা চত্থোক চৎশিন তৌবদা নুংঙাইহল্লগনি অমদি মনুং হঞ্জিনবা ঙমখৈগী মফমশিংগী অপুনবা শেন্মিৎলোন ফগৎহনবদা মতেং ওইরগনি‍।

হৌখিবা চহী খরসিদা বি.আর.ও.না তৌরকপা থবক্তা চাউনা হেনগৎলক্লিবা অসি অদুম্মক খঙনরে‍। মসিনা তাক্লিবদি বি.আর.ও.না শেনবা চহী ২০১৮-২০১৯গা য়েংনবদা শেনবা চহী ২০১৯-২০দা চাদা ৩০গী চাং হেনগৎনা থবক তৌরে হায়বসিনি‍। মসি ঙম্লিবসি লৈঙাক্না বদজেতকী ঙাক্লৌ মতিক চানা পীবা অমদি বি.আর.ও.গী স্ত্রকচরদা অহোংবা পুরকখিবা অমদি মীৎয়েং চুমবা/কত্থোকপা থৌওংশিংননি‍।

শেনবা চহী ২০০৮-২০১৬গী মনুংদা বি.আর.ও.গী চহীগী বদজেত লুপা করোর ৩,৩০০দগী লুপা করোর ৪,৬০০ ফাওবা খেন্ননা লৈরমবা অদুদগী শেনবা চহী ২০১৯-২০২০দা লুপা করোর ৮,০৫০ ওইদুনা মশক থোক্না হেনগৎলক্লে‍। ঙমখৈগী মফমশিংদা ইন্ফ্রাস্ত্রকচর ফগৎহনবদা লৈঙাক্ন থম্লিবা মীৎয়েংগা লোয়ননা শেনবা চহী ২০২০-২০২১গী বদজেত অসি লুপা করোর ১১,৮০০ ওইরবা য়ারি‍। মসিনা হৌজিক পায়খৎলিবা প্রোজেক্তশিংদা অচৌবা ইনোৎ অমা পীরগনি অমদি ঐখোয়গী অৱাং ঙমখৈ পরিংদা লাল্লোংদা মরুওইবা লম্বীশিং, থোংশিং অমদি লৈনুংহুৎশিং শেমগৎপদা হেন্না খুমাঙ চাওশিনহল্লগনি‍।

থৌরমদুদা ৱা ঙাঙলদুনা, বি.আর.ও.গী দাইরেক্তর জেনেরেল লেফ্তনেন্ত জেনেরেল হরপল সিংহনা লৈবাক শেমগৎপদা বি.আর.ও.গী থৌদাংগী মতাংদা ৱাফমশিং থমখি অমদি ঙাকশেল মন্ত্রীবু মহাক্কী লেপ্পা নাইদবা লমজিং অমসুং ঙাক্লৌগীদমক থাগৎপা ফোঙদোকপগা লোয়ননা লৈঙাক্না থম্লিবা লৈবাক অপুম্বগী লাল্লোনগী পান্দমগা চুশিন্ননা থম্লিবা তার্গেৎ অদু ফংবা ঙম্নবা বি.আর.ও.না লেপ্তনা হোৎনখিগনি হায়না থাজবা ফোঙদোকখি‍।

চীফ ওফ আর্মী স্তাফ জেনেরেল এম.এম. নরভানে, দিফেন্স সেক্রেতরী দা: অজয় কুমার, দি.জি. বি.আর.ও. লেফ্তনেন্ত হরপল সিংহনা দিল্লীদা অদুগা আর্মীগী মকোক থোংবা অমসুং সিভিল এদমিনিস্ত্রেসনগী ওফিসিএলশিংনা থোং শঙ্গাফমদা লৈদুনা থৌরমদুদা শরুক য়াখি‍।

***