লৈবাক অসিগী অচৌবা ঈশিং ইচাউ থোক্কনবা তুরেলশিং মোন্সুন অমসুং ইচাউ থেংননবা শেম-শানবগী থবকশিং অমুক হন্না য়েংশিন্নবা অৱাংবা থাক্কী মীফম অমা য়ুনিয়ন হোম মিনিস্তর অমিত শাহনা পাংথোকখ্রে । ঈশিং ইচাউ হন্থন্নবা অমসুং লন-থুম অমসুং পুন্সি কয়া মাঙবা হন্থহন্নবা নিংথিনা শেম-শারবা স্কিম অমা পায়খৎনবা অমিত শাহনা ওফিসিএলশিংদা খঙহনখ্রে ।

লৈবাক অসিগী মরুওইবা কেতচমেন্ত জোনশিংদা ঈশিং ইমায় হেনগৎলকপা অমসুং মমাংজৌননা ঈশিং ইচাউ থোক্কদৌরে হায়না লাউথোক্নবা তুংকোইনা চৎনগদবা থবক অমা পায়খৎনবা এজেন্সিশিংগী মরক্তা থবক তৌমিন্ননবা য়ুনিয়ন হোম মিনিস্তরনা তকশিনখি ।

বিহার, উত্তর প্রদেশ অমসুং অৱাং-নোংপোক রাজ্যশিংদা চহি চুপ্পা ঈশিং ইচাউগী অৱাবা মায়োক্নরিবা অসি কোকহন্নবা মরুওইবা মফমশিংদা থবক পায়খৎনবা য়ুনিয়ন হোম মিনিস্তরনা খঙহনখ্রে

মতম চানা ঈশিং থাদোক্নবা অমসুং ঈশিং ইচাউ থোক্তনবা অচৌবা দামশিং ঈশিং ফাজিন্দুনা থম্বা ঙম্বগী দেতা লৌনবা অমসুং অমুক হন্নবা য়েংশিন্নবা জাল শক্তি মিনিস্ত্রি অমসুং সেন্ত্রেল ৱাতর কম্মিসন্দা য়ুনিয়ন হোম মিনিস্তরনা য়াথং পীখি ।

ৱাতর রিসোর্সেস, রিভর দিবলপমেন্ত অমসুং গঙ্গা রিজুবিনেসন দিপার্তমেন্তগী সেক্রেতরিনা লৈবাক অসিদা থোক্লিবা অচৌবা ইচাউশিংগী মতাংদা পাউদমখি । দামশিং, রিজার্বরশিংনা ইচাউ থিংনবা পায়খৎলিবা থবকশিং, নেপালদা হৌজিক পায়খৎলিবা থবকশিং, মমাংজৌননা ঈশিং ইচাউ থোক্কদৌরে হায়না লাউথোক্নবা অমসুং গঙ্গা অমসুং ব্রহ্মাপুত্রানা ইচাউ থোকহনবদগী ঙাকথোক্নবা পায়খৎলিবা থবকশিংগী মতাংদা মহাক্না পাউদমখি । নেসনেল দিজাস্তর রেন্সপোন্স ফোর্স অমসুং ইন্দিয়ান মেতোরোলোজিকেল দিপার্তমেন্তগী সেনিয়র ওফিসিএলশিংসু ৱাফম কয়া ফোংদোকখি ।

ভারত্তা পুন্না লম হেক্তর মিল্লিয়ন ৪০ ঈশিং ইচাউ থোক্কনবা মফম ওইরি ,মসিদা গঙ্গা অমসুং ব্রহ্মাপুত্রা মপান্দা লৈবা অসাম, বিহার, উত্তর প্রদেশ অমসুং নোংচুপ বঙ্গালগী মফমশিং য়াওরি ।

ঈশিং ইচাউনা মরম ওইদুনা মহৈ-মরোং, লন-থুম, পুন্সি মাঙবগী খুদোংচাদবা কয়া মায়োক্নরিবা লৈবাক অসিগী মীওই লাখ কয়াগী অৱাবা কোকহন্নবা থবকশিং পায়খৎনবা মীফম অদুদা ৱারেপ কয়া লৌখি ।

মীফম অদুদা হোম এফেয়ার্সকী রাজ্য মন্ত্রী নিত্যনন্দ রাই অমসুং মরী লৈনবা মিনিস্ত্রিশিং অমসুং এজেন্সিশিংগী সেনিয়র ওফিসিএলশিংসু শরুক য়াখি।

****