ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ
ଆସନ୍ତାକାଲି ଆଷାଢ ପୂର୍ଣ୍ଣିମା/ ଧର୍ମ ଚକ୍ର ଦିବସ ସମାରୋହକୁ ସମ୍ବୋଧିତ କରିବେ ପ୍ରଧାନମନ୍ତ୍ରୀ
Posted On:
03 JUL 2020 5:09PM by PIB Bhubaneshwar
ଭାରତ ସରକାରଙ୍କ ସଂସ୍କୃତି ମନ୍ତ୍ରଣାଳୟର ଆନ୍ତର୍ଜାତିକ ବୌଦ୍ଧ ମହାସଂଘ ଆସନ୍ତାକାଲି (04.07.2020) ଆଷାଢ ପୂର୍ଣ୍ଣିମା ଅବସରରେ ଧର୍ମ ଚକ୍ର ଦିବସ ପାଳନ କରୁଛି । ଏହି ଦିନ ରିସିପାଟଣାର ହରିଣ ଉଦ୍ୟାନ (ବର୍ତ୍ତମାନର ଉତ୍ତର ପ୍ରଦେଶ ବାରଣାସୀର ସାରନାଥ) ଠାରେ ମହାତ୍ମା ବୁଦ୍ଧ ତାଙ୍କର 5ଜଣ ଶିଷ୍ୟଙ୍କୁ ପ୍ରଥମ ନୀତିବାଣୀ ଶୁଣାଇଥିଲେ । ସମଗ୍ର ବିଶ୍ଵରେ ବୌଦ୍ଧ ଧର୍ମାବଲମ୍ବୀ ମାନେ ଏହି ଦିନଟିକୁ ଧର୍ମ ଚକ୍ର ପ୍ରବର୍ତ୍ତନ ଦିବସ ଭାବେ ପାଳନ କରିଥାନ୍ତି । ଏହି ଦିନ ଗୁରୁଙ୍କୁ ସମ୍ମାନ ଜଣାଇ ଉଭୟ ବୌଦ୍ଧ ଓ ହିନ୍ଦୁ ଧର୍ମାବଲମ୍ବୀ ମାନେ ଗୁରୁପୂର୍ଣ୍ଣିମା ଭାବେ ପାଳନ କରିଥାନ୍ତି । ଏହି ଐତିହାସିକ ଦିବସ ଭାରତରେ ବୁଦ୍ଧଙ୍କ ମହାପରିନିର୍ବାଣ ଦିବସ ଭାବେ ମଧ୍ୟ ପାଳନ କରାଯାଏ । ଏହି ଅବସରରେ ରାଷ୍ଟ୍ରପତି ଶ୍ରୀ ରାମ ନାଥ କୋବିନ୍ଦ ରାଷ୍ଟ୍ରପତି ଭବନଠାରେ ଧର୍ମ ଚକ୍ର ଦିବସର ଉଦ୍ଘାଟନ କରିବେ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏକ ଭିଡିଓ ବାର୍ତ୍ତା ଜରିଆରେ ସମ୍ବୋଧନ କରି ଭଗବାନ ବୁଦ୍ଧଙ୍କ ପ୍ରବର୍ତ୍ତିତ ଅଷ୍ଟାଙ୍ଗ ମାର୍ଗ ଓ ଶାନ୍ତି ବାର୍ତ୍ତା ସମ୍ପର୍କରେ ଲୋକଙ୍କୁ ଅବଗତ କରାଇବେ । କେନ୍ଦ୍ର ସଂସ୍କୃତି ମନ୍ତ୍ରୀ ଶ୍ରୀ ପ୍ରହଲ୍ଲାଦ ପଟେଲ ଏବଂ ସଂଖ୍ୟାଲଘୁ ବ୍ୟାପାର ରାଷ୍ଟ୍ରମନ୍ତ୍ରୀ ଶ୍ରୀ କିରଣ ରିଜିଜୁ ମଧ୍ୟ ଏହି ଉଦ୍ଘାଟନୀ ସମାରୋହରେ ଉଦବୋଧନ ଦେବେ । ମଙ୍ଗୋଲିଆ ରାଷ୍ଟ୍ରପତିଙ୍କ ଏକ ସ୍ଵତନ୍ତ୍ର ଅଭିଭାଷଣ ଏହି ଅବସରରେ ପାଠ କରାଯିବା ସହ ଏକ ଅତ୍ୟନ୍ତ ଉପାଦେୟ ବୌଦ୍ଧ ପାଣ୍ଡୁଲିପି ଭାରତର ରାଷ୍ଟ୍ରପତିଙ୍କୁ ପ୍ରଦାନ କରାଯିବ । ଏହି ପାଣ୍ଡୁଲିପି ମଙ୍ଗୋଲିଆରେ ଶହ ଶହ ବର୍ଷ ଧରି ସଂରକ୍ଷିତ ରଖାଯାଇଛି । ବିଶ୍ଵର ବିଭିନ୍ନ ସ୍ଥାନରୁ ଆସିଥିବା ବୌଦ୍ଧ ଧର୍ମର ପଣ୍ଡିତ ଓ ବିଦ୍ଵାନମାନେ ସାରନାଥ ଏବଂ ବୁଦ୍ଧ ଗୟାଠାରୁ ସେମାନଙ୍କ ବାଣୀ ଉପସ୍ଥାପନ କରିବେ । କୋଭିଡ-19 ବୈଶ୍ଵିକ ମହାମାରୀ ଯୋଗୁଁ ସମସ୍ତ କାର୍ଯ୍ୟ ଭର୍ଚୁଆଲ ଭାବେ ହେଉଛି । ୱେବକାଷ୍ଟ ଜରିଆରେ ବିଶ୍ଵବ୍ୟାପୀ ପ୍ରାୟ 30 ଲକ୍ଷ ଭକ୍ତ ଏହି କାର୍ଯ୍ୟକ୍ରମକୁ ଆସନ୍ତାକାଲି (04.07.2020) ଦେଖିପାରିବେ ।
**********
(Release ID: 1636239)
Visitor Counter : 200
Read this release in:
Malayalam
,
Kannada
,
Marathi
,
Assamese
,
English
,
Urdu
,
Hindi
,
Manipuri
,
Bengali
,
Punjabi
,
Gujarati
,
Tamil
,
Telugu