ভারত সরকারগী কলচর মিনিস্ত্রীগী মখাদা লৈবা ইন্তরনেস্নেল বুদ্ধিস্ত কনফিদরেসন (আই.বি.সি.)না জুলাই ৪, ২০২০দা ধর্ম চক্র নুমিৎ হায়না অসাধ পুর্নিমা থৌরম পাংথোক্কনি। নুমিৎ অসিদা, হৌজিক মতমগী উত্তর প্রদেশকী বরানসী ময়াদা লৈবা সর্নাথকী সিপাতানাগী দিয়র পার্কতা মহাক্কী সেবক মঙাদা বুধনা মহাক্কী অহানবা পাউজেল শন্দোকপা হৌখিবা অদু নিংশিংবা ওইবা নুমিৎ অসিদা থৌরম অসি পাংথোক্কদবনি। নুমিৎ অসি মালেমগী মফম কয়াদা লৈবা বুধিস্তশিংনা ধর্ম চক্র পর্বাত্তানা নুমিৎ নৎত্রগা “ধর্মগী চাকা উংবা” হায়না থৌরম পাংথোক্নরি। নুমিৎ অসি বুদ্ধিস্ত অমসুং হিন্দু অনিমক্না মখোয়গী গুরুশিং ইকায়খুম্নবা উৎপা নুমিৎ অমা ওইনা গুরু পুর্নিমা হায়না থৌরম পাংথোক্নরি।

ভারত অসি বুধনা মঙাল ফংখিবা, মহাক্কী ধর্মগী চাকা উংখিবা অমসুং মহাপরিনির্ভনা ওইখিবা পুৱারিগী মফম অমা ওইবনা, ভারতকী রাস্ত্রপতি রাম নাথ কোবিন্দনা রাস্ত্রপতি ভাবন্দগী ধর্ম চক্র নুমিৎ হৌদোক্কনি। ভগবান বুধগী শান্তি অমসুং অচুম্বগী পাউজেলশিং অমসুং অৱাবশিং কোক্নবা মহাক্না তাকখিবা লম্বী নিপালগী মরুওইবা য়েংদুনা থৌরম অদুদা প্রধান মন্ত্রী নরেন্দ্র মোদীনা ভিদিওদা পীবা ৱারোল অমা শন্দোক্কনি। হৌদোকপগী থৌরমদা কলচরগী মিনিস্তর প্রাহলাদ পতেল অমসুং মাইনোরিতি এফেয়ার্সকী রাজ্য মন্ত্রী কিরেন রিজিজু ৱা ঙাংগনি। মোঙ্গোলিয়াগী রাস্ত্রপতিগী অখন্নবা ৱারোল অমা পাথোক্কনি অমসুং ভারত্তগী পুখিবা চহি চা কয়া মোঙ্গোলিয়াদা লিদুনা থম্লক্লবা মমল য়াম্লবা বুদ্ধিস্তকী অরিবা লাইরিক অমা ভারতকী রাস্ত্রপতিদা খুদোল তমগনি।

নুমিৎ অদুগী অতৈ থৌরমশিং হায়বদি বুধিস্ত লাইনিংগী লুচিংবশিং, মালেমগী মফম কয়াদগী লাকপা লুচিংবশিং অমসুং অখঙ-অহৈশিংগী পাউজেলশিং সর্নাথ অমসুং বুধ গয়াদগী শন্দোক্কনি।

কোবিদ-১৯ লাইচৎনা মরম ওইদুনা, চহি অসিগী মে ৭দা ভর্চুএল বাইসাখ(বুধ পুর্নিমা) মাইপাক্না পাংথোকখিবগুম, থৌরম অসিসু ভর্চুএল ওইনা পাংথোক্কনি। জুলাই ৪গী থৌরম অসি মালেম শীনবা থুংনা ৱেবকাস্ত তৌদুনা চাউরাক্না ভক্ত লাখ ৩০ রোম য়েংগনি হায়না থাজরি।

*****