ਕੋਰੋਨਾ ਵਾਇਰਸ ਦੇ ਵਧਦੇ ਪ੍ਰਕੋਪ ਨੂੰ ਕੰਟਰੋਲ ਕਰਨ ਦਾ ਇੱਕ ਪ੍ਰਭਾਵੀ ਤਰੀਕਾ ਇਸ ਦੇ ਟੈਸਟਿੰਗ ਨੂੰ ਵਧਾ ਕੇ ਕੋਵਿਡ-19  ਦੇ ਸ਼ਿਕਾਰ ਲੋਕਾਂ ਦੀ ਪਹਿਚਾਣ ਕਰਨਾ ਹੈ। ਰਾਸ਼ਟਰੀ ਬਨਸਪਤੀ ਖੋਜ ਸੰਸਥਾਨ  (ਐੱਨਬੀਆਰਆਈ), ਲਖਨਊ ਨੇ ਕੋਵਿਡ-19  ਦੀ ਟੈਸਟਿੰਗ ਲਈ “ਉੱਨਤ ਵਿਸ਼ਾਣੂ ਵਿਗਿਆਨ ਪ੍ਰਯੋਗਸ਼ਾਲਾ” ਸਥਾਪਿਤ ਕੀਤੀ ਹੈ। ਇਹ ਸੁਵਿਧਾ ਇੰਡੀਅਨ ਕੌਂਸਲ ਮੈਡੀਕਲ ਰਿਸਰਚ (ਆਈਸੀਐੱਮਆਰ), ਵਿਸ਼ਵ ਸਿਹਤ ਸੰਗਠਨ ਅਤੇ ਸਿਹਤ ਤੇ ਪਰਿਵਾਰ ਭਲਾਈ ਮੰਤਰਾਲੇ ਦੇ ਦਿਸ਼ਾ-ਨਿਰਦੇਸ਼ਾਂ ਦੇ ਅਧਾਰ ‘ਤੇ ਵਿਕਸਿਤ ਕੀਤੀ ਗਈ ਹੈ।

ਇਸ ਵਿਸ਼ਾਣੂ ਵਿਗਿਆਨ ਪ੍ਰਯੋਗਸ਼ਾਲਾ ਦਾ ਉਦਘਾਟਨ ਉੱਤਰ ਪ੍ਰਦੇਸ਼ ਸਰਕਾਰ ਦੇ ਮੁੱਖ ਸਕੱਤਰ ਆਰਕੇ ਤ੍ਰਿਪਾਠੀ ਅਤੇ ਕਿੰਗ ਜਾਰਜ ਮੈਡੀਕਲ ਯੂਨੀਵਰਸਿਟੀ  ਦੇ ਵਾਈਸ ਚਾਂਸਲਰ ਪ੍ਰੋਫੈਸਰ ਐੱਮਐੱਲਬੀ ਭੱਟ ਨੇ ਕੀਤਾ ਹੈ।  ਐੱਨਬੀਆਰਆਈ  ਦੇ ਡਾਇਰੈਕਟਰ ਪ੍ਰੋਫੈਸਰ ਐੱਸਕੇ ਬਾਰਿਕ ਨੇ ਦੱਸਿਆ ਕਿ ਇਹ ਟੈਸਟਿੰਗ ਸੁਵਿਧਾ  ਇੰਡੀਅਨ ਕੌਂਸਲ ਮੈਡੀਕਲ ਰਿਸਰਚ (ਆਈਸੀਐੱਮਆਰ),  ਵਿਸ਼ਵ ਸਿਹਤ ਸੰਗਠਨ  ਅਤੇ ਸਿਹਤ ਤੇ ਪਰਿਵਾਰ ਭਲਾਈ ਮੰਤਰਾਲਾ   ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ ਸਥਾਪਿਤ ਕੀਤੀ ਗਈ ਹੈ। 

ਕੋਰੋਨਾ ਵਾਇਰਸ ਨਾਲ ਲੜਨ ਲਈ ਕੀਤੇ ਜਾ ਰਹੇ ਯਤਨਾਂ ਤਹਿਤ ਕੋਵਿਡ-19  ਦੇ ਟੈਸਟਿੰਗ ਲਈ ਲਖਨਊ ਵਿੱਚ ਸ਼ੁਰੂ ਕੀਤੀ ਗਈ ਇਹ ਸੀਐੱਸਆਈਆਰ ਨਾਲ ਸਬੰਧਿਤ ਤੀਜੀ ਲੈਬ ਹੈ।  ਇਸ ਤੋਂ ਪਹਿਲਾਂ ਸੀਐੱਸਆਈਆਰ- ਸੈਂਟਰਲ ਡ੍ਰੱਗ ਰਿਸਰਚ ਇੰਸਟੀਟਿਊਟ  (ਸੀਡੀਆਰਆਈ)  ਅਤੇ ਸੀਐੱਸਆਈਆਰ-ਇੰਡੀਅਨ ਇੰਸਟੀਟਿਊਟ ਆਵ੍ ਟੌਕਸੀਕੋਲੋਜੀ  (ਆਈਆਈਟੀਆਰ)  ਵਿੱਚ ਵੀ ਕੋਵਿਡ-19  ਦੇ ਟੈਸਟਿੰਗ ਕੇਂਦਰ ਬਣਾਏ ਗਏ ਹਨ।

ਉੱਨਤ ਵਿਸ਼ਾਣੂ ਵਿਗਿਆਨ ਪ੍ਰਯੋਗਸ਼ਾਲਾ ਦਾ ਉਦਘਾਟਨ

ਐੱਨਬੀਆਰਆਈ ਨੂੰ ਕੋਵਿਡ-19  ਦੇ ਸੈਂਪਲ ਲਖਨਊ ਦੀ ਹੀ ਕਿੰਗ ਜਾਰਜ ਮੈਡੀਕਲ ਯੂਨੀਵਰਸਿਟੀ ਦੁਆਰਾ ਪ੍ਰਦਾਨ ਕੀਤੇ ਜਾਣਗੇ।  ਪ੍ਰੋਫੈਸਰ ਬਾਰਿਕ ਨੇ ਦੱਸਿਆ ਕਿ ਕੋਰੋਨਾ ਵਾਇਰਸ ਮਹਾਮਾਰੀ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਐੱਨਬੀਆਰਆਈ ਨੇ ਪਾਦਪ ਵਿਗਿਆਨ ਦੇ ਖੇਤਰ ਵਿੱਚ ਇੱਕ ਪ੍ਰਮੁੱਖ ਜਾਂਚ ਸੰਸਥਾਨ ਹੋਣ ਦੇ ਨਾਤੇ ਉੱਚ ਅਧਿਕਾਰੀਆਂ  ਦੇ ਨਿਰਦੇਸ਼ਨ ਵਿੱਚ ਟੈਸਟਿੰਗ ਸੁਵਿਧਾ ਵਿਕਸਿਤ ਕਰਨ ਦੀ ਪਹਿਲ ਕੀਤੀ ਹੈ।

ਐੱਨਬੀਆਰਆਈ ਵਿੱਚ ਸਥਾਪਿਤ ਟੈਸਟਿੰਗ ਸੁਵਿਧਾ ਦੇ ਕੋਆਰਡੀਨੇਟਰ, ਡਾ. ਐੱਸਵੀ ਸਾਵੰਤ ਨੇ ਕਿਹਾ ਕਿ ਸ਼ੁਰੂ ਵਿੱਚ 100 ਸੈਂਪਲਾਂ ਨਾਲ ਇਹ ਟੈਸਟਿੰਗ ਸੁਵਿਧਾ ਸ਼ੁਰੂ ਹੋਵੇਗੀ,  ਜਿਸ ਨੂੰ ਬਾਅਦ ਵਿੱਚ ਜ਼ਰੂਰਤ ਅਨੁਸਾਰ ਵਧਾਇਆ ਜਾ ਸਕਦਾ ਹੈ। ਐੱਨਬੀਆਰਆਈ ਮੁੱਖ ਰੂਪ ਵਿੱਚ ਪਾਦਪ ਅਧਾਰਿਤ ਜਾਂਚ ਲਈ ਜਾਣਿਆ ਜਾਂਦਾ ਹੈ।  ਇਸ ਲਈ,  ਸੰਸਥਾਨ ਦੀ ਟੀਮ ਨੂੰ ਇਸ ਟੈਸਟਿੰਗ ਸੁਵਿਧਾ ਦੇ ਸੰਚਾਲਨ ਲਈ ਮਾਹਿਰਾਂ ਦੁਆਰਾ ਕਿੰਗ ਜਾਰਜ ਮੈਡੀਕਲ ਯੂਨੀਵਰਸਿਟੀ ਅਤੇ ਸੀਐੱਸਆਈਆਰ-ਆਈਆਈਟੀਆਰ ਵਿੱਚ ਟ੍ਰੇਨਿੰਗ ਦਿੱਤੀ ਗਈ ਹੈ। ਇਸ ਪ੍ਰੋਜੈਕਟ ਵਿੱਚ ਐੱਨਬੀਆਰਆਈ ਦੇ ਨਾਲ-ਨਾਲ ਸੀਐੱਸਆਈਆਰ-ਸੀਮੈਪ ਦੀ ਟੀਮ ਵੀ ਨਾਲ ਹੀ ਕੰਮ ਕਰੇਗੀ।

ਮੁੱਖ ਸਕੱਤਰ ਆਰ ਕੇ ਤਿਵਾਰੀ ਨੇ ਸੰਸਥਾਨ ਦੇ ਵਿਗਿਆਨੀਆਂ ਨੂੰ ਵਧਾਈ ਦਿੰਦੇ ਹੋਏ ਕਿਹਾ ਹੈ ਕਿ ਪਾਦਪ ਵਿਗਿਆਨ ਦਾ ਮੋਹਰੀ ਸੰਸਥਾਨ ਹੋਣ  ਦੇ ਬਾਵਜੂਦ ਐੱਨਬੀਆਰਆਈ ਨੇ ਪਹਿਲ ਕਰਦੇ ਹੋਏ ਕੋਰੋਨਾ ਟੈਸਟਿੰਗ ਕੇਂਦਰ ਬਣਾ ਕੇ ਇੱਕ ਮਿਸਾਲ ਕਾਇਮ ਕੀਤੀ ਹੈ।

( ਅਧਿਕ ਜਾਣਕਾਰੀ ਲਈ ਸੰਪਰਕ ਕਰੋ :  pashirke@nbri.res.in )

*****

ਐੱਨਬੀ/ਕੇਜੀਐੱਸ(ਇੰਡੀਅਨ ਸਾਇੰਸ ਵਾਇਰ)