য়ুনিয়ন হোম মিনিস্তর অমিৎ শাহনা লুচিংদুনা জুন ২১দা দিল্লীদা কোবিদ-১৯গী মতাংদা লৌখিবা ৱারেপশিং থবক ওইনা পায়খৎনবা য়ুনিয়ন হোম সেক্রেতরীনা অমুক হন্না য়েংশিনবগী মীফম অমা জুন ২৫দা পাংথোকখ্রে । মীফম অদুদা নিতি অয়োগকী মেম্বর দোক্তর ভি.কে পাউল, এ.আই.আই.এম.এসকী দিরেক্তর দোক্তর রনদিপ গুলেরিয়া, আই.সি.এম.আরগী দিরেক্তর জেনেরেল দোক্তর বালরাম বারগাবা অমসুং দিল্লীদগী চীফ সেক্রেতরী অমসুং হেল্থ সেক্রেতরীসু শরুক য়াখি।

য়ুনিয়ন হোম সেক্রেতরীনা পাংথোকখিবা মীফম অদুদা ৱারেপশিং থবক ওইনা ফজনা অমসুং মতম চানা পায়খৎলে অমসুং দিল্লীগী কোবিদ-১৯ থেংননবা থৌরাং চপ চানা লৌখৎলে হায়বা ৱাফম মীফম অদুদা থমখি । কোবিদ-১৯গা মরী লৈনবা থবকশিং পায়খৎনবা জিলা থাক্কী কাংবুশিং শেমখি ।

য়ুনিয়ন হোম মিনিস্তর অমিৎ শাহনা মতম লেপখিবগী মতুংইন্না দিল্লীদা কোবিদ-১৯ শন্দোক্লিবা মফম পুম্নমক য়াওনা লাইচৎ শন্দোক্লিবা মফমশিং অমুক হন্না মশক খঙদোকপগী থবক জুন ২৬দা লোইশিল্লগনি হায়না মীফম অদুদা থমখি । জুন ৩০দগী য়ুমথোং-য়ুমথোং চংদুনা হকশেলগী সর্ভে তৌবগী থবক হৌরগনি ।

য়ুনিয়ন হোম মিনিস্তরগী য়াথং মতুংইন্না, জুন ২৭দগী দিল্লী সরকার অমসুং এন.সি.দি.সিনা পুন্না দিল্লীদা সেরোলোজিকেল সর্ভে পাংথোক্নবা ৱা খন্নখি । সর্ভে অদু জুন ২৭দগী হৌরগনি অমসুং মরী লৈনবা সর্ভে তিমশিং ত্রেনিং পীবগী থবক ঙরাং লোইশিনখ্রে ।

মখা তানা কোবিদ-১৯ লাইচৎ শন্দোরকপা খঙদোকপা ঙম্নবা অরোগ্যা সেতু অমসুং ইতিহাস এপ্প পুন্না শীজিন্ননবগী অয়াবা য়ুনিয়ন হোম মিনিস্তর অমিৎ শাহনা পীখি । এপ্পশিং পুন্না শীজিন্নবগী মতাংদা দিল্লী সরকারগী দিস্ত্রিক তিমশিংদা এন.সি.দি.সিনা ত্রেনিং পীবগী থবক ঙরাং পাংথোকখ্রে ।

*****