শিপ্পিং স্তেৎ (আই/সি.)গী মন্ত্রী শ্রী মনশুখ মান্দাবিয়ানা নেস্নেল মেরিতাইম দে সেলেব্রেসন কমিতীনা ঙসি পাংথোকখিবা মালেমগী হিরোইশিংগী নুমিৎকী থৌরমদা চীফ গেস্ত ওইনা ভিদিও কনফরেন্সিংগী খুত্থাংদা শরুক য়াখ্রে। হন্দক্কী চহিগী  হিরোইশিংগী চহিগী ওইবা থৌরম অসিগী হিরমদি “হিরোইশিংসি মরু ওইবা থৌমীশিংনি’ হায়বসিনি। হিরম অসিনা হিরোইশিংনা মালেম শিনবা থুংনা পোৎ চৈ য়ৌহল্লিবা, মালেমগী ত্রেদকী ৯০% অসি ঈশিং লম্বীদা চৎলি, অসিবু মীয়ামদা শক খঙহল্লি।

শ্রী মান্দাবিয়ানা ই-সোবেনর অমা ফোংখি অমসুং থৌরমদুদা তিনবা মীয়ামদা ৱা ঙাংখি। থৌরম অদুদা দি.জি. শিপ্পিংগী ওফিসিএলশিং, শিপ্পিং কোরপোরেসন ওফ ইন্দিয়াগী চেয়রপর্সন অমসুং এম.দি., এস.সি.আই.গী ওফিসিএলশিং অমসুং হিরোই কয়ানা শরুক য়াখি।

শ্রী মান্দাবিয়ানা মালেমগী হিরোইশিংগী নুমিৎকা মরী লৈননা হিরোইশিংদা থাগত্তুনা য়াইফ-পাউজেল কয়া পীখি। ভারতকী হিরোইশিংনা লৈবাক অসিগী শেন্মিৎলোন অমসুং চাউখৎপদা তেংবাংবগী থৌওংশিংবু শক খঙবা উৎখি। শ্রী মান্দাবিয়ানা হিরোইশিংগী ইমুং মনুংদসু অসিগুম্বা মখোয়গী খুদোংথিনীংঙাই ওইরবা থবক অসিবু শৌগৎপগীদমক থাগৎপা ফোংদোকখি। কোবিদকী লাইচৎ মনুংদা থবক তৌবদা মখোয়না থেংনবা খুদোংচাদবশিং, সাইন ইন অমদি সাইন ওফ তৌবা অমসুং লোকদাউন মনুংদা চত্থোক চৎশিন তৌবনচিংবা, অসিসু খঙই হায়খি। মহাক্না ভারতকী হিরোইশিংগী শরুক অসি ইং ২০১৪দা ৯৪,০০০ ওইবদুদগী লাখ ৫দা হেনগৎহন্নবা পান্দম অমসু থমখি। মসিনা ভারতকী নহাশিংদা থবক্কী খুদোংচাবা কয়া পীদুনা শেল য়াম্না থোকপা থবক কয়া অমসু পীগনি হায়খি। শ্রী মান্দাবিয়ানা লাইচৎ অসিগী মনুংদা শেন্মিৎলোনগী খোংজেল লেপহন্দনবা হোৎনরিবা হিরোইশিংগী থৌদাংশিংবু থাগৎপা ফোংদোক্লদুনা লাক্কদৌরিবা মতমশিংদা তেক্ত কায়দনা চৎনবা অমসুং অনৌবা ভারত অমা শেমগৎপগী শরুক ওইননবা য়াইফ-পাউজেলসু পীখি।

*****