৬সুবা মালেমগী যোগ নুমিৎ থৌরম পাংথোক্নবা স্কিল দিবলপমেন্ত এন্দ ওন্ত্রপ্রেনিয়রসিপ মিনিস্ত্রিনা ইরাই নুমিৎতা ৱেবিনার অমা পাংথোকখ্রে। ‘সে য়েস তু যোগ এন্দ নো তু রোগ’ হায়বা পান্দমদা পাংথোকখিবা ৱেবিনার অদুদা আর্ত ওফ লিভিংগী ফাউন্দর গুরুদেব শ্রী শ্রী রবি সনকার, যোগ ইন্সিতিতুৎকী দিরেক্তর দোক্তর হানসাজি য়োগেন্দ্র অমসুং স্কিল দিবলপমেন্ত এন্দ ওন্ত্রপ্রেনিয়রসিপ মিনিস্ত্রিগী মিনিস্তর দোক্তর মহেন্দ্র নাথ পান্দে শরুক য়াখি । বিউতি এন্দ ৱেলনেস সেক্তর স্কিল কাউন্সিলগী সি.ই.ও মোনিকা বালনা মোদেরেতর ওইদুনা পাংথোকখিবা ৱেবিনার অদুগী পান্দমদি মীয়ামদা যোগগী কান্নবা অমসুং কোবিদ-১৯ লাইচৎ মনুংদা মীয়াম যোগ শান্নবা পুক্নিং থৌগৎপনি ।

মীয়ামদা যোগগী মতাংদা খঙহনবগী মথক্তা, যোগগী লমদা নহারোলশিংনা থবক ফংনবা লৈরিবা খুদোংচাবশিং খঙহন্নবা পান্দম ৱেবিনার অসিদা থম্লি । স্কিল ইন্দিয়া মিসন্না নহারোল কয়া যোগগী লমদা থবক পীনবা থবকশিং পায়খৎলি অমসুং প্রধান মন্ত্রী কাউসাল বিকাস য়োজনা, প্রাইমারি রিককনিসন ওফ প্রাইয়োর লার্নিং, সোর্ত তার্ম ত্রেনিং অমসুং স্পিসিয়েল প্রোজেকশিংগী মখাদা মীওই ৯৬,১৯৬ যোগ ইন্সত্রক্তরশিং অমসুং ত্রেন্নরশিং ওইনা ত্রেন তৌখ্রে ।

যোগগী কোর্স অহুম লৈরি – যোগ ইন্সত্রক্তর ,যোগ ত্রেন্নর অমসুং সেনিয়র যোগ ত্রেন্নরনি । মিনিস্ত্রি অমসুং বিউতি এন্দ ৱেলনেস সেক্তর স্কিল কাউন্সিলগী মতেংগা লোয়ননা আর্ত ওফ লিভিং আমসুং পাতাঞ্জালিনা মাইপাক্না থবকশিং পায়খৎলে । যোগ হৈবা মীওই মশিং য়াম্না লৈবা রাজ্য মঙাগী মনুংদা উত্তর প্রদেস, কর্নাতাকা , মৈধ্য প্রদেস , ওরিসা অমসুং মহারাস্ত্রা য়াওরি । ২০২০-২১দগী ক্লাস ১১দগী সি বি এস ই স্কুলশিংদা বিউতি এন্দ ৱেলনেস সেক্তর স্কিল কাউন্সিলনা যোগগী ভোকেসনেল কোর্সশিং হাংদোকলে ।

শ্রী শ্রী রবি সানকরনা হায়খি , যোগ অসি স্কিল অমনি অমসুং মসি ইন্দস্ত্রিগা মরী লৈনৈ । কোরোনাভাইরস লাইচৎ শন্দোরকপদগী হৌজিক মালেমগী মীয়াম্না যোগগী মরুওইবা হেনগৎলক্লে । ঐখোয়গী ৱাখল খাংবা ঙম্বা, ৱাখল ইংথনবা মতেং পাংনবা হায়রিবা মতম অসিদা ঐখোয় খুদিংমক যোগ শানগদবনি । যোগ অসি শাথেক অমা নত্তে, যোগ অসি পুন্সি মহিং অমনি ।

মহাক্না হায়খি, যোগ অসি মী খুদিংমক্কী পুন্সি মহিং অমা ওইহন্নবা প্রধান মন্ত্রী মোদীগী মঙলান লৈরি , যোগ অসি ভারতকী কাচিন-কোয়া য়ৌরে । কাউসাল বিকাস কেন্দ্রশিংগী মখাদা লৈবাক্কী মনুংহুঞ্জিনবা মফমশিংদা লৈবা মীওইশিং যোগ তম্লে । যোগ অসি নহারোলশিংগী শীনফম অমা ওইরক্লে ।

স্কিল দিবলপমেন্ত এন্দ ওন্ত্রপ্রেনিয়রসিপ মিনিস্ত্রিগী মিনিস্তর দোক্তর মহেন্দ্র নাথ পান্দেনা হায়খি যোগ অসি ভারতনা মালেমদা পীবা মমল নাইদ্রবা খুদোল অমনি । চহি খর অসিদা হকচাং ফনা লৈনবা যোগ অসি মালেমগী ইহৌ অমা ওইরক্লে হায়না প্রধান মন্ত্রী নরেন্দ্র মোদীগা ফোংদোকখ্রে । ঐখোয়না মীয়ামদা যোগ অসি শীনফম অমা ওইনবা অমসুং নহারোলশিং তুংগী য়েংগা যোগ শান্নবা ৱাখল তাহন্নবা বিউতি এন্দ ৱেলনেস সেক্তর স্কিল কাউন্সিলগা লোয়ননা থবক পায়খৎলি । কোবিদ-১৯ মতুংদা যোগ ইন্সত্রক্তরশিং অমসুং ত্রেন্নরশিং য়াম্না দরকার ওইরক্কদবা মরম্না অথুবা ওইনা মীওই কয়া ত্রেন্নিং পীবা দরকার ওইরে । যোগ অসি মালেমগী শীনবা থুংনা চৎনবা অমসুং যোগগী লমদা নহারোলশিং শীনফম অমা ওইনবা ঐখোয়গী পান্দম অদু ফংনবা থবক পায়খৎলি ।

দোক্তর হান্সাজি য়োগেন্দ্রনা হায়খি মালেমগী যোগ নুমিৎ থৌরমদা ভারত্তা স্কিল হেনগৎহন্নবগী মতাংদা অমসুং কমদৌনা যোগনা খুন্নাইগী হকশেলগী লমদা অহোংবা পুরক্কদে হায়বগী মতাংদা খন্নখি । হৌজিক কোবিদ লাইচৎ মনুংদা যোগ অসি লায়না অসি ঙাকথোক্নবা অমসুং ইমুনিতি ফগৎহন্নবা খ্বাইদগী ফবা খুৎলায় অমা ওইরে ।

নেসনেল স্কিল দিবলপমেন্ত কোরোপেরেসনগী মখাদা লৈরিবা বিউতি এন্দ ৱেলনেস সেক্তর স্কিল কাউন্সিলনা কোরপোরেতশিং অমসুং লুপশিংগা লোয়ননা যোগনা থবক ফংহন্নবগী পান্দমদা মীওই কয়া ত্রেনিং পীরি । মসিদা সিদেসকো ইন্তরনেসনেল, হ্বাইত লোতস অমসুং ইন্তরনেসনেল যোগ এল্লাইন্স য়াওরি । ভারতকী নহারোলশিং যোগগী ত্রেনিং পীনবা থৌরম অদুদা ব্যুতী এন্দ ৱেলনেস সেক্তর স্কিল কাউন্সিলনা যোগ ইন্সতিতুৎকা য়ানা ৱারোল অমা খুৎয়েক পীনখি ।

*****