চহি ৫গী মনুংদা ভারত ইলেকত্রিক গারিশিং শাফম অমা ওইরগনি হায়বগী থাজবা রোদ ত্রান্সপোর্ত অমসুং হায়ৱেজ অমসুং এম.এস.এম.ইগী য়ুনিয়ন মিনিস্তর নিতিন গাদকরিনা ফোঙদোকখ্রে । মহাক্না হায়খয়ি মসিগী সেক্তর অসিদা পাংবা য়াবা মতেং পাংনবা সরকারনা হোৎনরি অমসুং ইলেকত্রিক গারিশিংদা খ্বাইদগী পীকপা জি এস তি চাদা ১২ লৌরি ।

“কোবিদ-১৯ মতুংদা ভারতকী ইলেকত্রিক গারিগী লাল্লোং” হায়বা হিরমদা ঙসি ৱেবিনার অমদা মিনিস্তরনা হায়খি ইলেকত্রিক গারি শাবদা থেংনরিবা অৱাবশিং মহাক খঙলে অদুবু গারি মশিং য়াম্না য়োন্নবা থবকশিং পায়খৎলগনি । মালেম অসিনা হৌজিক চাইনাগা ললোন-ইতিক পাংথোকপা পামদ্রে, মসি ভারতকী ইন্দস্ত্রিনা ললোন-ইতিক হেনগৎহন্নবা য়াম্না ফবা খুদোংচাবা অমনি ।

মিনিস্তরনা হায়খি পে্ত্রোলিয়মগী থাউ লিক্না ফংবা মরম্না, মালেম অসিনা অতোপ্পা অমসুং মমল হোংবা ইনর্জি থিরি । ইলেকত্রিক অমসুং বাইও ফুএলশিং অসি অফবা খুদোংচাবা অমনি । ভেহিকল স্ক্রাপপিং পোলিসি চৎহন্দুনা মসিনা গারি শারিবশিংগী অৱাৎপশিং মেনখৎপা ঙম্লগনি ।

মিনিস্তরনা হায়খি মীয়ামগী চৎথোক-চৎশিনগী মতাংদা লন্দনগী নামুনা অসিদা লনাই অমসুং সরকারগী ইনভেস্তমেন্তশিং থবক ফজনা পাংথোক্লি । মসিগা মান্নবা থৌরাং অমা পায়খৎপদা লায়রবা মীওইশিং অমসুং লৈঙাক অনিমক কান্নবা ফংগনি । দিল্লি-মুম্বাই গ্রিন কোরিদোরদা ইলেকত্রিক হাইৱেজ অমা শেমগৎনবা পাইলোত প্রোজেক অমা থবক পায়খৎপা হৌরে ।

ওতো সেক্তরদা থাজবা থম্লদুনা মিনিস্তরনা হায়খি হৌজিক থেংনরিবা শেন-থুমগী অৱাবা অসিদা ইশাদা থাজবা থম্বা অসিনা অফবা কৈথেলগী খুদোংচাবশিং ফংগনি । ইন্দস্ত্রি অসিনা লৈবাক অসিগী মশাগী ওইবা পোৎথোকশিং পুথোক্নবা অমসুং প্রধান মন্ত্রীগী অত্মানির্ভর ভারত অভিয়ান শৌগৎনবা মহাক্না তকশিনখি ।

*****