শেল-থুম মন্ত্রালয়

কোবিদ ইমর্জেন্সী ক্রেদিৎ ফেসিলিতীনা এম.এস.এম.ই.শিংতমক নত্তনা কম্পেনী খুদিংমক কোনশিল্লিঃ শেল-থুম মন্ত্রী

Posted On: 08 JUN 2020 6:29PM by PIB Imphal

কেন্দ্রগী শেল-থুম অমসুং কোর্পোরেৎ এফিয়র্স মন্ত্রী শ্রীমতী নির্মলা সিতারমন্না ঙসি হায়খ্রে মদুদি কোবিদ ইমর্জেন্সী ক্রেদিৎ ফেসিলিতীনা এম.এস.এম.ই.শিংতমক নত্তনা অতোপ্পা কম্পেনী খুদিংমকপুসু কোনশিল্লি। এফ.সি.সি.আই. নেস্নেল একজিক্যুতিব কম্মিতীগী মেম্বরশিংদা ৱা ঙাংলদুনা শ্রীমতী সিতারমন্না ভারতকী শেন্মিৎলোন হিংগৎনবা অমসুং ভারতকী লল্লোন ইতীক তৌরিবশিংবু ঙাক্লৌ পীনবা সরকারনা ইন্দস্ত্রীদা অঙম্বা মতেং পাংগনি হায়না থাজবা পীখি অমসুং হায়খি, " নখোয়গী মীহুৎশিংগী মরক্তা করিগুম্বা খুদোংচাদবা অমা হেক লাকপা মতমদা ঐখোয়না মতেং পাংনবা শেম শাদুনা লৈরি।"

লিক্বুইদিতীগী মতাংদা শেল-থুম মন্ত্রীনা হায়, "ঐখোয়না লিক্বুইদিতীগী মতাংদা লৈবা খুদোংচাদবশিং ময়েক শেংনা লোইশিনখ্রে। লিক্বুইদিতী মতীক চানা লৈরি। করিগুম্বা হৌজিকসু খুদোংচাদবা লৈরবদি হন্না য়েংশিনগনি।" শ্রীমতী সিতারমন্না মসিমসু হায়খি মদুদি, সরকারগী বিভাগ খুদিংমক্তা পুথরিবা শেলশিং শিংদোক্নবা খঙহনখ্রে অমসুং করিগুম্বা বিভাগশিংগী মরক্তা খুদোংচাদবা লৈরবসু সরকারনা য়েংশিনগনি।

অনৌবা ইনভেস্তমেন্তশিংদা কোর্পোরেৎ তেক্স ১৫% ফংহনবগী অরোইবা মতম শাংদোক্নবা সরকারনা খন্নগনি হায়নসু শেল-থুম মন্ত্রীনা ফোংদোকখি। "করি তৌবা য়াবগে হায়বদু ঐহাক্না য়েংশিনগনি। অনৌবা ইনভেস্তমেন্তশিংদা ইন্দস্ত্রীশিংনা কোর্পোরেৎ তেক্সকী ১৫%দগী খুদোংচাবা লৌহনবা পামই অমসুং নখোয়না পুখৎলক্লিবা মার্চ ৩১, ২০২৩গী অরোইবা মতম শাংদোকপগী ৱাফম অদু খন্ননবা হোৎনগনি," হায়না শ্রীমতী সিতারমন্না ফোংদোকখি।

শেল-থুম মন্ত্রীনা ইন্দস্ত্রীদা কোর্পোরেৎ এফিয়র্সকা নত্ত্রগা এস.ই.বি.আই.গী অরোইবা মতমগা মরী লৈনবা তৌবা য়াবশিং খঙহল্লক্তুনা তঙাইফদবা খোংথাংশিং লৌখৎনবা খঙহনখি।

খ্বাইদগী খুদোংথীবা মওংদা শোক্লবা সেক্তরশিংগী জি.এস.তি. রেত্তা হন্থনবগী মতাংদা ফোংদোক্লদুনা মহাক্না হায়, "জি.এস.তি. রেৎ হন্থবদি কাউন্সিলদা চৎকদবনি। অদুবু কাউন্সিলসু রেবিন্যু লাকপগী লম্বী য়েংলি। সেক্তর অমহেক্তগী রেৎ হন্থবগী ৱারেপতি কাউন্সিলনা লেপকদবনি।"

শেল-থুম অমসুং রেবিন্যু সেক্রেতরী মিস্তর ভুসান পান্দেনা এফ.আই.সি.সি.আই.গী মীহুৎশিংদা পাউদমখি মদুদি কোর্পোরেৎশিংদা ইঙ্কম তেক্স রিফন্দ পীবা হৌখ্রে অমসুং হৌখিবা চয়োল খরসিদা লুপা কোতি ৩৫,০০০গী আই-তি রিফন্দশিংসু পীবা হৌখ্রে।

মীফম অদুদা ইকোনোমিক এফিয়র্স সেক্রেতরী শ্রী তরুন বজাজ, কোর্পোরেৎ এফিয়র্স সেক্রেতরী শ্রী রাজেশ ভর্ম অমসুং দিপার্তমেন্ত ওব ফাইনান্সিএল সর্বিসেসকী সেক্রেতরী শ্রী দেবাসিস পান্দাসু শরুক য়াখি।

এফ.আই.সি.সি.আই.গী প্রসিদেন্ত দা. সঙ্গিতা রেদ্দীনা শেল-থুম মন্ত্রীনা পাউদমখি মদুদি, চেম্বর অসিনা তোঙান-তোঙানবা সরকারগী লোইশঙশিংগা কোবিদ-১৯গী শাফুশিং থেংননবা লৌখৎলিবা খোংথাংশিং থবক ওইনা পায়খৎনবা চাং নাইনা পাউ ফাওনরি। "এফ.আই.সি.সি.আই.না আত্মনির্ভর ভারতকী পান্দম্বু মাই পাক্নবা হোৎনরি অমসুং সরকারগা খুৎশম্নদুনা থবক ওইনা পায়খৎলিবশিং পাকথোক চাউথোক্নবা হোৎনরি," হায়না দা. রেদ্দীনা থমখি।

*****



(Release ID: 1630301) Visitor Counter : 7