ভারত সরকারনা জুন ৪,২০২০দা থোকখিবা গেজেৎ নোতিফিকেসন অমদা মমা ওইবগী চহী, এম.এম.আর. হন্থহনবগী মরু ওইবা, ন্যুত্রিসনগী থাক ৱাংহনবা অমসুং মরী লৈনবা হীরমশিংগী মতাংদা য়েংশিন্নবা তাস্ক ফোর্স অমা শেম্লে হায়খ্রে।

কেন্দ্রগী শেল-থুমগী মন্ত্রীনা পার্লিয়ামেন্ততা মহাক্কী বজেৎ ২০২০-২১ পুথোকপগী ৱা ঙাংবদা হান্না চৎনরম্বা শারদা এক্ত ১৯২৯দা শেমদোক্তুনা ১৯৭৮দগী নুপীশিংনা লুহোংবা য়াবগী চহী অসি তরামঙা ওইরম্বদগী তরানিপান্দা হেনগৎখ্রে হায়না হায়খি। ভারতনা চাউখৎলকপগী মতুং ইন্না নুপীশিংনা অৱাংবা থাক্কী মহৈ-মশিং তমদুনা কেরিয়র শেম্নবগী খুদোংচাবা ফংবসু হেনগৎলে। এম.এম.আর. হন্থহনবগী মরু ওইবা লৈবগা লোয়ননা ন্যুত্রিসনগী থাক্তা হেন্না অফবা ওইহনবগী তঙাই ফদবসু লৈরে। নুপীমচা অমনা মমা ওইবগী চহীগী ওইবা হীরমশিংসু ফিভম অসিদা য়েংশিনবা মথৌ তাই। থা তরুক্কী মনুংদা মরী লৈনবা ৱারোলশিং পীশিল্লক্কদবা তাস্ক ফোর্স অমা শেম্নবা মহাক্না হৌদোক্লি হায়না মহাক্না মখা তানা হায়খি। (রিফরেন্সঃ এফ.ৱাই. ২০২০-২১গী বজেত্তা ৱা ঙাংবগী পেরা ৬৭)

মখাদা পীরিবা মীওইশিং অসি তাস্ক ফোর্স অসিদা য়াওগনিঃ

১. জয়া জেতলী (নই-দিল্লী)- চেয়রপর্সন

২. দাক্তর বিনোদ পাউল, মেম্বর (হেলথ), নীতি আয়োগ – মেম্বর (এক্স-ওফিসিও)

৩. সেক্রেতরী, হকশেল অমসুং য়াইফ য়ুম্বাল মন্ত্রালয় – মেম্বর (এক্স-ওফিসিও)

৪. সেক্রেতরী, নুপী অমসুং অঙাং চাউখৎপগী মন্ত্রালয় – মেম্বর (এক্স-ওফিসিও)

৫. সেক্রেতরী, দি./ও. হায়র ইদুকেসন – মেম্বর (এক্স-ওফিসিও)

৬. সেক্রেতরী, দি./ও. স্কুল ইদুকেসন অমসুং লিতরেসী – মেম্বর (এক্স-ওফিসিও)

৭. সেক্রেতরী, লেজিস্লেতিব দিপার্তমেন্ত – মেম্বর (এক্স-ওফিসিও)

৮. নাজমা অখতর (নই-দিল্লী) – মেম্বর

৯. বসুধা কামথ (মহারস্ত্রা)- মেম্বর

১০. দিপ্তে শাহ (গুজরাত)- মেম্বর

তাস্ক ফোর্স অসিনা য়েংশিনগদবশিং অসি মখাদা পীরিঃ

১. (ক) হকশেল, অনা-অয়েক য়াওদনা লৈবা অমসুং মীরোল্লিঙৈদা, অঙাং পোকপদা অমসুং পোক্লবা মতুংদা মমা অমসুং অঙাংগী ন্যুত্রিসনগী ওইবা ফিভম, (খ) ইনফেন্ত মোর্তেলিতী রেৎ (আই.এম.আর.), মেতর্নেল মোরতেলিতী রেৎ (এম.এম.আর.), তোতেল ফর্তিলিতী রেৎ (তি.এফ.আর.), সেক্স রেসিও এৎ বর্থ (এস.আর.বি.), চাইল্দ সেক্স রেসিও (সি.এস.আর.)নচিংবা অমসুং (গ) হীরমশিং অসিগা চান্নবা হকশেল অমসুং ন্যুত্রিসন্নচিংবা ৱাফমশিংগা লুহোংবগী চহী অমসুং মমা ওইবগী চহীগা মরী লৈনবশিং য়েংশিনবা

২. নুপীশিংগী মরক্তা অৱাংবা থাক্কী মহৈ-মশিং তম্বগী খুমাং চাউশিলহন্নবা খোংথাংশিং হৌদোকপা

৩. তাস্ক ফোর্স অসিনা হায়বশিংবু হৌজিক চৎনরিবা আইনশিংদা হাপচিন্দুনা শেমদোকপা য়াহন্নবা মতিক চাবা পাম্বৈ হৌদোকপা

৪. তাস্ক ফোর্স অসিনা হায়বশিংবু থবক ওইনা পাংথোক্নবা কুপ্না য়াৎথোক্লবা মতমগী পরিং অমসু পীনবা থবক য়াৎথোকপা

৫. তাস্ক ফোর্স অসিনা তঙাই ফদবগী মতুং ইন্না অতোপ্পা অখং অহৈশিংসু মখোয়গী মীফমশিংদা য়াওহনগনি

৬. তাস্ক ফোর্স অসিদা নিতি আয়োগনা সেক্রেতরিএল এসিস্তেন্স পীগনি অমসুং জুলাই ৩১, ২০২০ ফাওবগী মনুংদা রিপোর্ত পীশিনগনি

*****