লৈবাক অসিদা কোবিদ-১৯না ওইহল্লিবা হকশেলগী খুদোংচাদবশিং অসি য়েংলদুনা হন্দক্কী চহীগী মালেমগী যোগ নুমিৎ অসি মালেমগী ওইনা দিজিতেল ওইনা পাংথোক্লগনি। হায়রিবা অসি ঙসি আয়ুশ মন্ত্রালয়গা ইন্দিয়ন কাউন্সিল ফোর কলচরেল রিলেসন (আই.সি.সি.আর.)গী প্রসিদেন্ত দাক্তর বিনয় সাহস্রাবুধেগা পুন্না পাংথোকখিবা প্রেস কনফরেন্সতা হায়খিবনি। হন্দক্কী চহীগী ওইনা থৌরম অসিনা যোগনা মীওই অমদা কান্নহনবা, মালেমগী লায়চৎ অসি থেংনবা ঙম্নবা ইম্ম্যুনিতী ফগৎহনবা অমসুং ইরাং অসিগী মরু ওইবা ৱাফম খরা শেম্বা ঙম্নবা খুন্নাইবু ঙাক শেনবনি হায়না দাক্তর সাহস্রাবুধেনা হায়খি। পুন্না পাংথোকখিবা প্রেস কনফরেন্স অসিদা আয়ুশকী সেক্রেতরী বাইদ্যা রাজেশ কোতেচাসু য়াওখি।

কোবিদ-১৯ শন্দোক্লিবা য়াম্না লৌনগনবা ভাইরস অসিগী মওং মতৌশিং অসি য়েংলদুনা মীয়াম পুনবদা অথিংবা লৈরি। মরম অদুনা মন্ত্রালয় অসিনা মীয়াম্বু মখোয় মখোয়গী য়ুমদা ইমুং মনুংগী মীওইশিংগা লোয়ননা যোগ তৌনবা পুক্নিং থৌগৎলি। প্রধান মন্ত্রী শ্রী নরেন্দ্র মোদীনা “ঐগী পুন্সি – ঐগী যোগ” হায়রিবা ভিদিও ব্লোগিং কন্তেস্ত অসিদা মীয়াম পুন্না শরুক য়ানবা হায়খ্রে হায়না দাক্তর সাহস্রাবুধেনা মীদিয়াগী মীওইশিংদা পাউদমখি। হায়রিবা ভিদিও ব্লোগিং চাংদম্নবা অসিগী খুত্থাংদা আয়ুশ মন্ত্রালয় অমসুং আই.সি.সি.আর.না যোগগী মতাংদা মীয়ামদা হেন্না খংহন্নবা হোৎনরি অমসুং মীয়ামদা ইথিল পীদুনা আই.ৱাই.দি.২০২০গী থৌরম পালন তৌবা অসিদা মীপুম খুদিংনা থৱাই য়াওনা য়াওনবা হায়খি।

থৌরম অসিদা ৱা ঙাংবদা আয়ুশ মন্ত্রালয়গী সেক্রেতরী বাইদ্যা রাজেশ কোতেচানা প্রধান মন্ত্রীনা চাংদম্নবা অসি লাউথোকপা মতমদা মীয়াম পুম্বনা খোইরাংবা উৎপদা নত্তনা মসিদা শরুক য়ানিংবগী ইথিলসু ফোংদোক্নখি হায়খি। যোগনা কোবিদ-১৯গী লায়চৎ লান্থেংনরিবা অসিগী ফিভম কয়া অমা শেন্নবদা অচৌবা ইথিল অমা পীরিবা অসি মীয়াম্না খংনরবা ৱাফম অমসু ওইরবনিনা হৌজিক লাউথোক্লিবা থৌওং অসিনা অফবা হক-শেলগী ফিভম অমা ওইহল্লকপদা অচৌবা মতেং পাংগনি হায়বগী আয়ুশ মন্ত্রালয়না থাজবা কয়া অমা থম্লি।

শ্রী কোতেচানা চাংদম্নরিবা অসিনা যোগগী লায়েংবা ঙম্বা অমসুং থেরাপ্যুতিক্কী মতিক লৈবা অমসুং মীওইবগী পুন্সিবু অফবা মাইকৈদা ওন্তোকপা ঙম্বগী মতিক অসিগী মতাংদা মালেম শিনবা থুংনা খংহনবা ঙমগনি হায়না মখা তানা হায়খি। যোগ ইন্সতিত্যুতশিং, যোগ স্তুদিওশিং অমসুং যোগ প্রোফেস্নেলশিংনচিংবা স্তেকহোলদর্শিংদসু প্রিন্ট অমসুং ইলেক্ত্রোনিক মীদিয়াগী খুত্থাংদা চাংদম্ননবা অসিগী মরমদা খংহনখ্রে হায়না হায়খি।

শ্রী কোতেচানা ব্লোগিং চাংদম্নবা অসি MyGov.gov.in গুম্বা দিজিতেল প্লেৎফোর্মশিংদা হৌখ্রে অমসুং জুন ১৫, ২০২০দা লোইগনি অমসুং মসিগী মতুংদা জ্যুরিশিংনা পুন্না অমুক য়েংখত্তুনা মকোক মথং তাবা মীওইশিংগী মমিং লাউথোক্কনি। ভিদিওগী চাংদম্নবসিদা য়াওরিবা মীওইশিংনা নহাশিংগী (চহী ১৮গী মখা), অহলশিংগী (চহী ১৮গী মথক) অমসুং যোগ প্রোফেস্নেলশিংগী থাক অহুমদা নুপাশিংগী অমসুং নুপীশিংগী কাংলুপ্তা থাজিল্লকপা য়াগনি। মতৌ অসুম্না চাংদম্নরিবা অসিদা পুন্না থাক তরুক লৈগনি। অহানবা, অনিশুবা অমসুং অহুমশুবা তাবা মীওইশিংনা মথংশিৎনা লুপা লাখ ১, লুপা ৫০,০০০ অমসুং লুপা ২৫,০০০ ফংগনি। মালেমগী ওইবা মনানা মথংশিৎনা $ ২৫০০, $ ১৫০০ অমসুং $ ১০০০ ওইগনি।

প্রেস কনফরেন্স অদুদা শ্রী দিনেশ কে. পত্নায়ক, দি.জি. (আই.সি.সি.আর.) অমসুং শ্রী পি.এন. রঞ্জিৎ কুমার, জে.এস. (আয়ুশ) জোইন্ত সেক্রেতরী, আয়ুশ মন্ত্রালয়সু য়াওখি। মীদিয়াদা ৱা ঙাংবা লোইরবা মতুংদা পাউমীশিংদা ইম্ম্যুনিতী কিৎশিংসু য়েন্থোকখি।

*****