রোদ ত্রান্সপোর্ত অমসুং হায়ৱেজ অমসুং এম.এস.এম.ই.গী কেন্দ্রগী মন্ত্রী শ্রী নিতিন গদকরীনা লম্বী শরক্তা মী শিবগী চাং হন্থহন্নবগী মতাংদা মীয়ামদা তাকপী তম্বীবগী তঙাই ফদবা লৈরে হায়খ্রে। ইকোলোজী অমসুং সস্তেনেবিলিতী রেৎ অসি মীওইবগী পুন্সিদা য়াম্না মরু ওই হায়খ্রে। ভিদিও কনফরেন্সিংগী খুত্থাংদা য়ু.এন.দি.পি. অমসুং এম.ও.আর.তি.ঐচ.গী ‘হায়ৱেদা মীওইবা অমসুং শা-উচেক শিবা হন্থহনব’গী নেস্নেল কেম্পেন হৌদোকপগী থৌরমদা মন্ত্রীনা ইথিক্স, শেন্মিৎলোন অমসুং ইকোলোজী অসি ঐখোয়গী লৈবাকসিগী খ্বাইদগী মরু ওইবা য়ুম্বি অহুম্নি হায়খি।

শ্রী গদকরীনা ভারত্তা চহী খুদিংগী লম্বীদা খুদোংথিবা থোকপা লাখ ৫মুক উবা ফংই অমসুং মসিগী মনুংদা চাউরাক্না মীওই লাখ ১.৫গী পুন্সি মাংই হায়খি। হায়রিবা থৌদোকশিং অসি মথংগী মার্চ ৩১ ফাওবদা চাদা ২০-২৫ ফাওবা হন্থহনবা ঙম্নবা হোৎনরি হায়না মহাক্না হায়খি। খুদোংথিনিংঙাই ওইবা য়াবা মফম ৫০০০ খংদোকপা ঙম্লে অমসুং মখোয়বু মতম খরগী ওইনা অমসুং মতম পুম্বগী ওইনা শেমদোক শাদোক্নবগী থবকশিং অসি অথুবা মতমদা পায়খৎপা হৌরে। মতম খরগী ওইনা নত্ত্রগা মতম পুম্বগী ওইবা খুদোংথিনিংঙাই ওইবা য়াবা মফম শেমদোকপগী এস.ও.পি.সু থাদোকখ্রে। ঙসি ফাওবদা খুদোংথিনিংঙাই ওইবা য়াবা মফম ১৭৩৯দা মতম খরগী ওইনা শেমদোকপা অমসুং খুদোংথিনিংঙাই ওইবা য়াবা মফম ৮৪০ মতম পুম্বগী ওইনা শেমদোকপগী থবক পায়খৎখ্রে।

খুদোংথিনিংঙাই ওইবা য়াবা মফম শেমদোকপা, ত্রাফিক নিংথিনা শিন্দোক্কদবা মফমশিং, ক্রাস বেরিয়র, লম্বী শেমজিনবা, অখুবা অমসুং অকায়বা থোঙশিং শেমজিনবা অমসুং নৌনা শাবা, রোদ সেফতী য়েংশিনবা, খুদোংথিনিংঙাই ওইবা য়াবা শরকশিং শেমজিনবা, হায়ৱে পেত্রোলিং তৌবা অমসুং লম্বী শেম্বা মতমদা তেক্ত কায়দা থোক্তনবা শেম্বনচিংবা অসি নেস্নেল হায়ৱেশিংগী ওইনা য়েংশিনবগী থবক কয়াদা মন্ত্রীনা মিৎয়েং চংবা হৌরে হায়খি।

লম্বী শরক্তা শাশিংগী পুন্সি ঙাক শেনবগী তঙাইফদবগী মতাংদসু খংই হায়না মন্ত্রীনা হায়খি। ৱাইল্দলাইফ ইন্সতিত্যুত ওফ ইন্দিয়া, দেহরাদুন্না লম্বী শরক অমসুং মরী লৈনবা ইনফ্রাস্ত্রকচরশিং অমসুং লম্লক্কী শাশিংগী পুন্সিবু তেক্ত কায়দনা থম্নবা “ লম্লক্কী শা-উচেকশিংদা লিনিয়র ইনফ্রাস্ত্রকচরশিংনা থোইদোক্না অকায়বা পীদনবা ইকো ফ্রেন্দলী ওইবা খোংথাংশিং” কৌবা মেনুএলদা য়াওরিবা খুদিংমকপু এজেন্সী খুদিংমক্না ইন্ননবা মন্ত্রালয়না হায়খ্রে হায়না মহাক্না হায়খি। মহাক্না এন.জি.ও.শিং অমসুং মীয়ামগী লুপশিংদা শা-উচেকশিংদা খুদোংথিনিংঙাই ওইবা য়াবা মফম খংদোক্তুনা মন্ত্রালয়দা হায়রক্নবা হায়খি অমসুং মদুগী মতুং ইন্না শেমদোক শাদোক্নবা থবকশিং পায়খৎকনি হায়না থাজবা পীখি।

মন্ত্রীনা মহাক্কী মন্ত্রালয় অমসুং মসিগা মরী লৈনবা লুপশিংনা শাশিংদা অকায়বা থোক্তনবা ইনফ্রাস্ত্রকচরশিং শানবা শেল কয়া থাদরি হায়না হায়খি। নাগপুর-জবলপুর হায়ৱেদা কৈশিংনা নাকোয়ননা চৎপা য়ানবা লুপা কোতি ১৩০০ চংনা শাখিবা লৈখুনগী লম্বীগী মতাংদা মহাক্না খুদম ওইনা পীখি। মসিগা মান্ননা এম.পি., মহারস্ত্রা, ওরিসানচিংবগী উমংগী মফমশিংদা থবক কয়া অমসু পায়খৎলি হায়খি। শাশিংনা চত্থোক চৎশিন তৌবদা য়েৎনরোইদবা শরক শাবা, লম্বীগী মখাদা চৎফম শেম্বা অমসুং কোরিদোর ৱাংখৎহনবনচিংবা থবক কয়া হায়রিবশিং অসিগী মনুংদা চল্লি।

এম.ও.আর.তি.ঐচ.না উমং য়োকখৎপগী স্কিমগী মতুং ইন্না তঙাইফদনা য়ান্দবা য়াদবা উগী মশীং ইন্দুনা অমসুং লম্লক্কী শা-উচেকশিংদা অকায়বা পীদনবা ৱাংখৎপা লম্বী-শরক, অন্দরপাস/ওভরপাস শাননবা হান্নদগী হায়দুনা লাক্লি হায়না মহাক্না হায়খি। মমাংদা পায়খৎখিবা থবকশিংগী মতুং ইনবা ওইনা নৌনা পায়খৎলিবা খোংথাংশিং অসিদসু লম্বী-শরক্কী গ্রীন রেতিং সীস্তেম অদুমক ইনগনি অমসুং মসি ফোংবগী আই.আর.সি. কাউন্সিলনসু অয়াবা পীখ্রবনি। মখা তানা ভারতকী চাউরবা লম অসি য়েংলদুনা গ্রীন রোদ ওইহন্নবা চৎন কাংলোনশিংসু শেম শাবা লোইখ্রে।

*****