ইন্তর্নেসনেল ভেকসিন এল্লাইন্স গাবীদা য়ুএস দোল্লর মিল্লিয়ন ১৫ পীগনি হায়না ঙসি ভারতনা ৱাশকখ্রে।

য়ু.কেগী প্রধান মন্ত্রী বোরিস জোন্সন্না য়ুম্বু ওইদুনা পাংথোকখিবা ভর্চুএল গ্লোবেল ভেকসিন সমিৎতা প্রধান মন্ত্রী শ্রী নরেন্দ্র মোদী ৱা ঙাংখি। মীফম অদুদা লৈবাক ৫০ হেনবগী ললোন-ইতিক্কী লুচিংবশিং, য়ু.এন এজেন্সিশিং, সিবিল সোসাইতি, সরকারগী মন্ত্রীশিং, লৈবাকশিংগী লুচিংবশিং শরুক য়াখি।

মহাক্কী ৱারোলদা প্রধান মন্ত্রীনা হায়খি ৱারবা মতম অসিদা ভারতনা মালেমগীদমক অমত্তা ওইনা লেপ্লি।

প্রধান মন্ত্রীনা হায়খি মালেম অসি ইমুং অমা ওইনা উনবা ভারতকী সভ্যতানা তাকপী-তম্বীরি অমসুং মসিগী লাইচৎ মনুংদা লৈবাক অসিনা মসিগী পাউতাক অসিগা লোয়ননা হিংনবা হোৎনরি। ভারতনা লৈবাক ১২০ হেনবদা লৈবাক অসিদা ফংলিবা হিদাক-লাংথকশিং পীরি অমসুং ভারত মশাগী ওইনা মশিং য়াম্লবা মীওই কয়া কন্নবা হোৎনরিঙৈ তাঞ্জা অসিদা মতেং পীনবা হায়রকপা লৈবাকশিংদা অকক্নবা মতেং কয়া পাংলি।

প্রধান মন্ত্রীনা হায়খি কোবিদ-১৯ লাইচৎ অসিদা করিগুম্বা খরদা, মালেমগী ওইনা মতেং পাংনবদা লৈরিবা খুদোংচাদবশিং খঙলে অমসুং হন্দক অহানবা ওইনা মীওইবা খুন্নাইনা নাখৈ শেংলবা ময়ামগী য়েক্নবা অমা মায়োক্নরি।

গাবিগী মতাংদা মহাক্না হায়খি মসি সুপ্নগী মালেমগী চুংশিন্নবা অমা নত্তে অদুবু মসি মালেম অসি অমত্তা ওইবগী খুদম্নি অমসুং অতোপ্পশিং মতেং পাংবগা লোয়ননা ঐখোয়না ইশামক মতেং পাংবা ঙম্মি হায়বা উৎপা অমনি। ভারতকী মীশিং য়াম্না য়াম্মি অমসুং হকশেলগী খুদোংচাবা মরাংকাইনা লৈতে অমসুং লৈবাক অসিনা তিকা থাবগী মরুওইবা অদু খঙলে।

প্রধান মন্ত্রীনা হায়খি মহাক্কী সরকারনা অহানবা ওইনা হৌদোকখিবা মিসন ইন্দ্রধনুসনা পাক্লবা লৈবাক অসিগী মনুং হুঞ্জিনবা মফমশিংদা লৈরিবশিং য়াওনা লৈবাক অসিগী অঙাংশিং অমসুং নুপীশিং মপুংফানা তিকা থানবা পান্দম থম্লি। ভারতনা লৈবাক অসিগী নেসনেল ইম্মুনাইজেসন প্রোগ্রামদা অনৌবা তিকা ৬ হাপচিল্লে।

মহাক্না হায়খি লৈবাক অসিদা তিকা ফংহনবগী থবকশিং ভারতনা দিজিতাইজ তৌরে অমসুং মসিগী কোল্দ চেনগী থবকশিং য়েংশিন্নবা ইলেকত্রোনিক ভেকসিন ইন্তিলিজেন্স নেতৱার্ক অমা শেমগৎলে। পায়খৎলিবা অনৌবা থবকশিং অসিনা খ্বাইগী থাপ্পা মফমশিং ফাওবদা তিকাশিং চাং চপ চানা অমসুং মতম চানা অশোই-অঙাম থোকহন্দনা য়ৌহনবা ঙম্লগনি।

প্রধান মন্ত্রীনা হায়খি মালেমগী তিকা পুথোকপা লৈবাকশিংগী মনুংদা ভারতসু য়াওরি অমসুং মালেমগী অঙাংশিং চাদা ৬০ তিকা থাবদা ভারতনা মতেং পাংলি। গাবিগী থবকশিংগী অফবা মগুনশিং ভারতনা মশক খঙই ,মরম অসিনা হৌজিক ফাওবা গাবিগী মতেং ফংবা য়াবা লৈবাক ওইরবসু ভারতনা গাবিগী দোনর অমা ওইরি।

প্রধান মন্ত্রীনা হায়খি ভারতনা গাবিদা শেন-থুমগী মতেং পাংবা খক নত্তনা ভারতনা য়াম্না শীজিন্নবদগী মালেমগী ওইনা তিকাশিংগী মমল হন্থরক্তুনা হৌখিবা চহি ৫দা গাবিনা দোল্লর মিল্লিয়ন ৪০০ রোম কনবা ঙমখি।

মহাক্না হায়খি লৈবাক অসিনা অফবা হিদাকশিং অমসুং তিকাশিং শেন য়াম্না চংদনা পুথোকপা ঙম্বগা লোয়ননা ভারতনা মালেমগীদমক অমত্তা ওইনা লেপ্লি। লৈবাক অসিনা মশাগী ওইনা তিকা থাবগী থবক পাকথোক-চাউথোরকলি অমসুং লৈবাক অসিগী শিংথানিংঙাই ওইরবা সাইন্তিফিক রিছর্সকী হৈশিংবা লৈরি। ভারতনা মালেমগী হকশেলগী থবকশিংদা মতেং পাংবা ঙম্বা খক নত্তনা, মতেং পাংনিংবগী ৱাখল্লোনসু লৈরি।

***