ভারতকী রাস্ত্রপতি শ্রী রাম নাথ কোবিন্দনা জোর্জিয়াগী রাস্ত্রপতি হিজ এক্সিলেন্সী মিসেস সালোমী জরুবিচবিলীগা ঙসি (জুন ৩,২০২০)দা তেলিফোন্দা ৱারী শান্নখ্রে।

লুচিংবা অনীনা লৈবাক অনীগী মরক্তা লৈরিবা মরীগী মতাংদা খন্নখি। রাস্ত্রপতিনা হায়খি মদুদি ভারতনা জোর্জিয়াগা লৈনরিবা নুংশিনবা অমসুং মরুপ ওইবগী মরী অসিবু মমল লৈনা লৌই। লৈবাক অনীনা লল্লোন ইতিক, শেলথুম অমসুং নাৎকী ওইবা লমদা লৈরিবা লৈবাক অনীগী মরী অসি ফগৎহনবা তঙাইফদে। ত্রেনিং অমসুং কেপাসিতী বিল্দিংগী হীরমদা ভারতনা জোর্জিয়াগা লৈনরিবা তেংবাং হেন্না খুমাঙ চাউশিন্নবা হোৎনবদা তরাম্না ওকখি।

কোবিদ-১৯ লাইচৎনা মরম ওইদুনা মালেম পুম্বনা থেংনরিবা খুদোংচাদবশিং অমসুং পৃথিবী পুম্বদা থেংনরিবা পুন্সি মাঙবা কয়া অসি য়েংদুনা রাস্ত্রপতিনা কোবিদ-১৯ শন্দোকপা থিংনবগীদমক জোর্জিয়ানা পায়খৎলিবা থৌরাংশিং মশক থোকই হায়না ফোঙদোকখি। রাস্ত্রপতিনা জোর্জিয়াগী রাস্ত্রপতিদা পাউদমখি মদুদি কোবিদ-১৯ লাকশিন্নবা হোৎনবদা ভারতনা থৌনা ফুদোক্তুনা হোৎনরি অমসুং পাক শন্না মাই পাক্লি। ভারতনা হৌজিকফাওবদা মালেমগী থাক্তা কোবিদ-১৯ লাকশিন্নবা হোৎনবদা মাঙজিল থানা হোৎনরি অমসুং লৈবাক ১৫০ হেনবদা হিদাক লাংথক পীথোক-পীশিন তৌরি। লুচিংবা অনীনা মালেমগী কম্ম্যুনিতীনা অপুনবা ওইনা খুৎশম্নদুনা শেলথুম ফগৎনবা হোৎনগদবনি হায়না ফোংদোক্নখি।

জোর্জিয়াদা ভারতকী মহৈরোই কয়ানা মেদিকেল তম্নবা য়াওনা লৈরিবশিংবু পল্লদুনা রাস্ত্রপতিনা জোর্জিয়াগী সরকারবু মহৈরোইশিংবু ময়ুমদা থোক্নবা হোৎনবদা পীবীখিবা মতেং অমসুং জোর্জিয়াদা লৈরিবা ভারতকী মীওইশিংগী য়াইফনবা হোৎনবীরিবশিংগীদমক থাগৎপা ফোংদোকখি।

*****