কেবিনেৎ সেক্রেতরী শ্রী রাজিব গৌবানা সভাপতি ওইদুনা সাইক্লোনিক স্তোর্ম “নিসর্গ” অসিবু মায়োক্ননবগী রাজ্যশিং অমসুং কেন্দ্রগী মন্ত্রালয়/ এজেন্সীশিংনা লৌখৎলিবা চেকশিন-থৌরাংশিং অদুবু য়েংশিন্নবা নেস্নেল ক্রাইসিস মেনেজমেন্ত কমিতী (এন.সি.এম.সি.)গী অনিসুবা মীফম পাংথোকখ্রে।

ইন্দিয়া মেতিয়োরোলোজিকেল দিপার্তমেন্ত (আই.এম.দি.)না হায়খি মদুদি অকনবা সাইক্লোনিক স্তোর্ম অসিনা জুন ৩গী নুংথিল/নুংদাইৱাইরমদা মহারাস্ত্রগী সমুদ্র খোংবানশিংদা শোকহনবা য়ানা লৈ। অকনবা নোং অমসুং নোংলৈ-নুংশিৎনা মরম ওইরগা রাজ্য অসিগী সমুদ্র খোংবান্দা লৈবা জিলাশিংদা মিতর ১-২ ফাওবা ৱাংবা ঈথক-ঈপোমশিংগা লোইনননা পুংদা কিলোমিতর ১০০-১১০ ফাওবদগীনা পুংদা কিলোমিতর ১২০ ফাওবা য়াংবা অকনবা নুংশিৎ শিৎপা য়ানা লৈরি।

নোংলৈ-নুংশিৎ অসিনা মহারাস্ত্রদা রাইগর, মুম্বাই, থানে অমসুং পালঘর, মসিগা লোইননা গুজরাতকী ৱলসাদ, নৱসারি, সুরত, ভাৱনাগর অমসুং ভারুচ অমসুং দামন, দাদ্রা অমসুং নাগর হৱেলিগী সমুদ্র খোংবানশিংদা শোকহনবা য়ানা লৈ।

রাজ্য সরকারশিং/য়ু.তি.গী ওফিসরশিংনা এন.সি.এম.সি.দা মখোয়না লৌখৎলিবা চেকশিন-থৌরাংগী পাম্বৈশিং অদুগী মতাংদা খঙহনখি। তঙাইফদনা চঙবা সপ্লাইশিং অদুগী স্তোকশিং অদু মখোয়দা মরাং কাইনা লৈ অমসুং ইমর্জেন্সী সর্বিস পুম্নমক থৌরাং তৌদুনা লৈরে হায়বগী থাজবা পীখি। তেলিকোম দিপার্তমেন্তনা পীবা বল্ক এস.এম.এস. ফেসিলিতী অদু শিজিন্নদুনা সাইক্লোন অসিনা শোকহনবা য়াবা মফমশিংদা লৈরিবশিংদা চেকশিন্নবা খঙহনখ্রে অমসুং মফম অসিদা লৈরিবা মীশিং অদুবু লৌথোকপগী থবকসু পাইখৎনবা থৌরাং তৌরি।

এন.দি.আর.এফ.না রাজ্যশিং অমসুং য়ু.তি.দা তীম ৪০ থাদোকখ্রে অমসুং অহেনবা তীমশিংসু নোংথক্কী লম্বীদা পুখ্রে। নেভী অমসুং এয়র ফোর্সকী জহাজ অমসুং এয়রক্রাফশিংগা লোইননা আর্মী অমসুং নেভীগী রেসক্যু অমসুং রিলীফ তীমশিং থৌরাং তৌদুনা লৈহনখ্রে। কোস্ত গার্দকী জহাজশিংনা সমুদ্রদা লৈরিবা ঙামীশিং কনবগী থবকশিং তৌরি।

রাজ্যশিং অমসুং কেন্দ্রগী এজেন্সিশিংগী চেকশিং-থৌরাংশিং অদু য়েংশিল্লদুনা কেবিনেৎ সেক্রেতরীনা সাইক্লোনগী লম্বিদা লৈরিবা অনেম্বা মফমশিংদা লৈরিবা মীশিং অদুবু মপুং ফানা লৌথোক্নবগী মথৌ তাবা পাম্বৈশিং অদু লৌখৎনবা অমসুং সমুদ্রদগী ঙামীশিং অদুবু অসোই-অঙাম য়াওদনা হল্লকহন্নবা খঙহল্লকখ্রে। কোবিদ-১৯গী পেসেন্তশিংদা মখোয়গী তঙাইফদনা চংবা মেদিকেল সর্বিসশিংদা অপনবা লৈতনবা খরা হেন্না হৌৎননবা হায়খ্রে। পাৱর, তেলিকম্যুনিকেশন, ন্যুক্লিয়র, কেমিকেল, এভিয়েশন অমসুং শিপ্পিং ইনফ্রস্ত্রকচর অমসুং এসেৎশিংদা অসোই-অঙাম য়াওহন্দনবা কন্তিঞ্জেন্সী প্লানশিং পাইখৎননবা এজেন্সীশিংদসু খঙহল্লকখ্রে।

মহারাস্ত্র অমসুং গুজরাতকী এদিস্নেল চীফ সেক্রেতরীশিং, অমসুং দাদ্রা অমসুং নাগর হাৱেলি অমসুং দামন অমসুং দ্যুগী এদমিনিস্ত্রেতরগী এদভাইজরনা ভিদিও কনফরেন্সকী খুত্থাংদা মীফম অদুদা শরুক য়াখি। য়ুমলৈ-কৈরৈগী মন্ত্রালয়, শিপ্পিং, পাৱর, রেলৱেজ, তেলিকম্যুনিকেসনশিং, পেত্রোলিয়ম অমসুং নেচেরেল গ্যাস, এতোমিক ইনর্জী, কেমিকেলশিং অমসুং পেত্রো কেমিকেলশিং, সিভিল এভিয়েশন, হেল্থ, আই.এম.দি., আই.দি.এস. অমসুং এন.দি.আর.এফ.কী মনন্ত্রালয়শিংদগী সেনিয়র ওফিসরশিংনা মীফম অসিদা শরুক য়াখি।

এন.সি.এম.সি.না থোরক্লিবা ফিভম অসিগী য়েংশিন্নবগীদমক্তা মীফম অমুক্কা পাংথোকখিগনি।

*****