எதிர்கால நோய்த்தொற்றின் பரவலைக் கண்காணிக்க உதவும் வகையில் கொவிட் -19 இந்திய தேசிய உயர்நிலை மாதிரியை அறிவியல் மற்றும் தொழில்நுட்பத்துறை (DST) துவக்கியுள்ளது, சுகாதார அமைப்புகளின் தயார்நிலை மற்றும் பிற நோய் தணிப்பு நடவடிக்கைகள் சம்பந்தப்பட்ட முடிவுகளுக்கு இது உதவுகிறது.

தொற்று மற்றும் இறப்பு குறித்து அரசாங்கம் உன்னிப்பாகக் கண்காணிக்கும் அதே வேளையில், பரவலைக் கணிப்பதற்கும், நோய்க் கண்காணிப்பை மேம்படுத்துவதற்கும் ஒரு வலுவான முன்கணிப்பு மாதிரியைக் கொண்டு வருவது கட்டாயமாகும். கொவிட் -19 முன்கணிப்பு மற்றும் கண்காணிப்புக்கான பல கணித மாதிரிகள் அறிவியல் மற்றும் தொழில்நுட்பத்துறை (DST) - அறிவியல் மற்றும் பொறியியல் ஆராய்ச்சி வாரியம் (SERB) மற்றும் பிற நிறுவனங்களால் நிதியளிக்கப்பட்ட புலனாய்வாளர்களால் உருவாக்கப்படுகின்றன.

அளவீட்டு நிகழ்வுகளின் பேரழிவு மேலாண்மைத் திட்டத்திற்கு கணித மாதிரிகளைப் பயன்படுத்திய இந்தியாவின் வரலாற்றால் ஈர்க்கப்பட்ட அறிவியல் தொழில்நுட்பத்துறை, இந்தத் துறையில் நிபுணத்துவம் பெறுவதற்கும், முழு நாட்டிற்கும் ஒரு மாதிரியை உருவாக்குவதற்கும் இந்த பயிற்சியைத் தொடங்கியுள்ளது, இது சான்றுகள் அடிப்படையிலான முன்கணிப்புக்குத் தேவையான கடுமையான சோதனைகளுக்கு உட்படுத்தப்படும், இது வானிலை முன்னறிவிப்பு துறையில் வழக்கமாக நடைமுறையில் உள்ளது.

இந்த மாதிரி முற்றிலும் கொவிட்-19 உடன் தொடர்புடைய தரவை மட்டுமே நம்பியிருக்கும், மேலும் தரவின் புதிய போக்குகளிலிருந்து கற்றுக்கொள்ள ஒரு தகவமைப்பு உள்ளமைக்கப்பட்ட கூறுகளையும் கொண்டுள்ளது. இது வெற்றிகரமான சான்றுகளை அடிப்படையாகக் கொண்ட கணித மற்றும் புள்ளிவிவர முன்கணிப்பு மாதிரிகளை ஒருங்கிணைத்து, தொற்றுநோய்ப் பரவல் குறித்த வலுவான முன்கணிப்புக்கான சிறந்த முன்கணிப்புப் பகுப்பாய்வுகளையும் உள்ளடக்கும். இந்தியாவிலும் உலகெங்கிலும் உள்ள கொள்கை வகுப்பாளர்கள் இந்த சூப்பர்மாடலைப் பயன்படுத்தலாம், இது நோய்த்தொற்று பரவுவதற்கான வீதத்தையும், அது எவ்வாறு சுகாதாரத்துறைக்கு சுமையை ஏற்படுத்தும் என்பதையும் கணிப்பதில் உள்ள சிக்கல்களை சமாளிப்பதால் இதன் மூலம் தொற்றுநோயைத் தடுக்க முடியும்.

இந்த முயற்சியின் ஒரு பகுதியாக, ஜவஹர்லால் நேரு மேம்பட்ட அறிவியல் ஆராய்ச்சி மையம்  (ஜே.என்.சி.ஏ.எஸ்.ஆர்) மற்றும் இந்திய அறிவியல் நிறுவனம் ( IISc) பெங்களூருவும், நாட்டில் உள்ள அனைத்து கொவிட்-19 மாடலிங் திட்டங்கள் மற்றும் திட்டங்களை  இணைத்து ஒருங்கிணைந்து பணிபுரியும்.