ସ୍ୱାସ୍ଥ୍ୟକର୍ମୀମାନଙ୍କ ନିରାପତ୍ତା ଓ ବ୍ୟବହାର ସକାଶେ ଏବେ ଗୁରୁତ୍ୱପୂର୍ଣ୍ଣ ପିପିଇ କଭରଅଲ୍‌ ଭାରତରେ ପ୍ରସ୍ତୁତ କରାଯାଉଛି । ସେଥିପାଇଁ ପିପିଇ କଭରଅଲର ପ୍ରୋଟୋଟାଇପ୍‌ର ନମୁନାଗୁଡ଼ିକୁ ବିଧିବଦ୍ଧ ଭାବେ ଦେଶର ନଅଟି ସ୍ୱୀକୃତ ପରୀକ୍ଷାଗାରରେ ପରୀକ୍ଷା କରାଯାଉଛି । ସେପରି ପରୀକ୍ଷା ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଦ୍ୱାରା ଜାରି କରାଯାଇଥିବା ବୈଷୟିକ ମାନ ଅନୁସାରେ କରାଯାଉଛି । ପୁନଶ୍ଚ, ଏଥିପାଇଁ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଦ୍ୱାରା ଜାରି ଗାଇଡ଼ ଲାଇନକୁ ମଧ୍ୟ ବିଧିବଦ୍ଧ ଭାବେ ଅନୁସରଣ କରାଯାଉଛି । ଏଥିପାଇଁ ISO 16603 କ୍ଲାସନ-3 ପରୀକ୍ଷଣ ମାନ ଅବଲମ୍ବନ କରାଯାଉଛି । ଏଭଳି ପିପିଇ କଭରଅଲକୁ ‘Synthetic Blood Penetration Resistance Test’  କରାଯାଉଛି । ଏହି ପିପିଇ କଭରଅଲକୁ ଏପରି ଭାବେ ଡ଼ିଜାଇନ୍‌ କରାଯାଇଛି ଯାହା ମଧ୍ୟଦେଇ କୌଣସି ପ୍ରକାର ତରଳ ପଦାର୍ଥ କିମ୍ବା ଏରୋସୋଲ ପାର୍ଟିକିଲ୍‌ ପ୍ରବେଶ କରିପାରିବନାହିଁ ଏବଂ ଏହାକୁ ପରିଧାନ କରିଥିବା ବ୍ୟକ୍ତି ସଂପୂର୍ଣ୍ଣ ସୁରକ୍ଷିତ ରହିବ ।

ଏଥିପାଇଁ ସମସ୍ତ ସରକାରୀ ସଂଗ୍ରହକାରୀ ଏଜେନ୍ସି ଏବଂ ଘରୋଇ ହସପିଟାଲମାନଙ୍କୁ ପରାମର୍ଶ ଦିଆଯାଇଛି ଯେ ସେମାନେ କେବଳ ସ୍ୱୀକୃତ ଏଜେନ୍ସିମାନଙ୍କ ଠାରୁ ଯେଉଁମାନଙ୍କର କଭରଅଲରେ ‘ୟୁନିକ୍‌ ସାର୍ଟିଫାଏଡ଼ କୋଡ’ ଚିହ୍ନ ଛାପା ଯାଇଥିବ କେବଳ ସେମାନଙ୍କ ଠାରୁ ଏଭଳି ଉପକରଣ କ୍ରୟ କରନ୍ତୁ । କ୍ରୟ ପୂର୍ବରୁ ସେମାନେ ବୟନଶିଳ୍ପ ମନ୍ତ୍ରଣାଳୟ ପକ୍ଷରୁ ପ୍ରଦାନ କରାଯାଇଥିବା ୱେବ୍‌ ଲିଙ୍କ୍‌ (www.texmin.nic.in) ଜରିଆରେ ସାର୍ଟିଫିକେଟ୍‌ପ୍ରାପ୍ତ ଉତ୍ପାଦନକାରୀମାନଙ୍କ ସଠିକତା ଯାଞ୍ଚ କରିବା ଆବଶ୍ୟକ । ଅଧିକନ୍ତୁ ସଂଗ୍ରହକାରୀ ଏଜେନ୍ସିମାନେ ସମୟାନ୍ତରେ ତାହାର ରାଣ୍ଡମ୍‌ ନମୁନା ସଂଗ୍ରହ କରି ସେସବୁକୁ ଏହି ନଅଟି ସ୍ୱୀକୃତ ପରୀକ୍ଷାଗାରରେ ପରୀକ୍ଷା କରାଇବା ଉଚିତ । ସରକାରଙ୍କ ଦ୍ୱାରା ସ୍ୱୀକୃତ ପରୀକ୍ଷାଗାରଗୁଡ଼ିକର ବିସ୍ତୃତ ବିବରଣୀ  (www.texmin.nic.in) ୱେବସାଇଟରେ ଉପଲବ୍ଧ ।

***************