লদাখকী লেফতনেন্ত গবর্নর শ্রী আর.কে.মাথুরনা য়ুনিয়ন মিনিস্তর দা. জিতেন্দ্রগা উনদুনা নৌনা শেমখিবা য়ুনিয়ন তেরিতোরী অসি অমুক হান্নগী ফীভমদা হঞ্জিল্লক্নবা পায়খৎপা থবকশিং য়াওনা কোবিদ-১৯গী ওইরিবা ফীভম অমসুং চাওখৎ-থৌরাংগী থবকশিংগী মতাংদা খন্নখ্রে। নুমীৎ কাংদনা পীরিবা মতেং অমসুং তমথিরবা লায়চৎ অসিগী মতমদা কেন্দ্রদগী তেংবাংশিংগীদমক্তা মহাক্না মন্ত্রীবু থাগৎপা ফোংদোকখি।

দা. জিতেন্দ্র সিংহনা নিংথিজবা মওংদা লেফতনেন্ত গবর্নরদা হায়খি মদুদি লেপ্তনা কন্না হোৎনবদগী লদাখকী লৈঙাক্না তমথিরবা কোবিদ লায়চৎ অসি মায়োক্নখি অমসুং মসিবু লাকশিন্নবদা মায় পাকখি, মসিগীদমক্তা কেন্দ্র সরকারনা লৈঙাক অসিবু থাগৎলি। ইরান্দগী হল্লকখিবা তীর্থ চৎপশিংগী মরক্তগী খংহৌদনা কোরোনা পোজিতিব ওইবগী কেসশিংগী মতাংদা রিপোর্ত তৌরক্তুনা লৈবাক পুম্বদা অহৌবা এলার্ম পীদুনা খংহল্লকখিবা অদু লদাখনি অদুবু মসিগী তৌবিরকপগী মহৈ অসি লৈঙাক্ননি অমসুং কোরোনানা মথং-মথং চৈথেং ফংহনখিবশিংগী মরক্তা লদাখনা অহানবনি হায়না থোইদোকপা ৱাফম ফোংদোকখি।

দা. জিতেন্দ্রনা প্রধান মন্ত্রী নরেন্দ্র মোদীবু লদাখ অমসুং অৱাং-নোংপোক্কী মফমশিংদা অহানবা ওইনা য়েংশিন্ননবা ময়েক শেংনা খংহনখিবদুগী মহৈনা লোকদাউন লাক্ত্রিঙৈগী মমাংদা এয়র কার্গোশিং ফংহনবা ঙমখিবা অদুগীদমক্তা থাগৎপা ফোংদোকখি ঙসিফাওবদা, লদাখতা রেসন, এঞ্জাং-নাপীশিং অমসুং উহৈশিং পৈশিনবা অসি মফম অদুদা হান্না পৈরম্বা মওং অদুগী য়াম্না শাথিনা হেল্লি হায়না মহাক্না হায়খি।

মন্ত্রীনা লেহ অমসুং কার্গীলগী নহা ওইরিবা দিপুতী কম্মিস্নর অনী অমসুং দিস্ত্রিক্ত অসিদগী এস.এস.পী. অনীনা নুমীৎ খুদিংগী পাও ফাওনখি অমসুং তোঙান-তোঙানবা ৱাফমশিং মতম চানা খংহল্লক্তুনা মেদিকেল ইক্বীপ্মেন্তশিং ফংহনবদা অমসুং মদুগী মথংদা লৈবাক অসিগী তোঙান-তোঙানবা মফমশিংদগী মীশিং হোল্লকপদা মতেং পাংবিখিবগীদমক থাগৎখি।

শ্রী মাথুরনা দা. জিতেন্দ্রদা হৌজিক্কী ওইরিবা ফীভম অদুগী মতাংদা হায়খি অমসুং হান্নগী ফীভমদা হঞ্জিল্লক্নবা থবকশিং কন্না হোৎনরি হায়বা ৱাফম থমখি। মহাক্না তমথিরবা লায়চৎ অসিনা মরম ওইদুনা পাৱর অমসুং কন্সত্রক্সনগী থবক্কা মরি লৈনবা থবকশিং খরা থেংথহনখিবা অদু য়াম্না থুনা অমুক থবক হৌরনি হায়বগী মতাংদসু হায়খি।

মখল-মখাগী পাইপলাইনগী প্রোজেকশিংগী মনুংদগী দা.জিতেন্দ্রনা কাওন্সিল ওফ সাইন্তিক অমসুং ইন্দস্ত্রিএল রিসর্স(সি.এস.আই.আর.)কী থৌরাং অমা শেমখ্রবা “লেহগী জাম” গী থবক-থৌওংগী মতাংদসু পনখি।

*****