২০১৮-১৯দা মেত্রিক তন লাখ ১৩৭.৫৮ পুথোকপদগী চহিদা চাদা ৯ হেনগৎহন্দুনা ২০২৪-২৫ ফাওবদা ঙাগী পোৎথোক মেত্রিক তন লাখ ২২০ পুথোক্নবা প্রধান মন্ত্রী মতস্যা সম্পদা য়োজনা (পি.এম.এম.এস.ৱাই.)না পান্দম থম্লি। ফিসরি, এনিমেল হসবেন্দরি অমসুং দাইরিইংগী য়ুনিয়ন মিনিস্তর গিরীরাজ সিংহনা ঙসি হায়খি থাজবা য়াম্না থম্লিবা স্কিম অসিনা মপান্দা য়োনবদগী লুপা ক্রোর ১,০০,০০০ তানবা ঙমগনি অমসুং মথং চহি ৫দা ঙা ফাবগী হিরমদা হকথেংননা অমসুং নাকোইননা থবক লাখ ৫৫ ফংহনবা ঙমগনি। ঙামীশিং, ঙা য়োনবা মীওইশিং অমসুং ঙা ফাবগা মরী লৈনবশিংদা স্কিম অসি কৎথোক্লদুনা মিনিস্তর গিরীরাজনা হায়খি অহানবা ওইনা ঙা ফাবা জহাজশিংগী ইন্সুরেন্স স্কিম হৌদোক্লগনি।

২০২০গী মে ২০দা প্রধান মন্ত্রী নরেন্দ্র মোদীনা অয়াবা পীখিবা প্রধান মন্ত্রী মতস্যা সম্পদা য়োজনা (পি.এম.এম.এস.ৱাই.)গী মতাংদা পাংথোকপা প্রেস কনফরেন্স অমদা য়ুনিয়ন মিনিস্তর গিরীরাজনা হায়খি কেন্দ্রগী চাকথুং লুপা ক্রোর ৯,৪০৭, রাজ্যগী চাকথুং লুপা ক্রোর ৪,৮৮০ অমসুং বেনিফিসরিশিংনা পুথোকপা লুপা ক্রোর ৫,৭৬৩ য়াওনা স্কিম অসিদা চাউরাক্না লুপা ক্রোর ২০,০৫০ থাদগনি। শেনবা চহি ২০২০-২১গী হৌরগা শেনবা চহি ২০২৪-২৫ ফাওবা স্কিম অসি রাজ্যশিং/য়ুতিশিংদা চহি ৫ চংনা পায়খৎকনি।

য়ুনিয়ন মিনিস্তরনা হায়খি স্কিম অসিগী মখাদা ঙাগী পোৎথোক, মগুন, তুংকোইনা চৎনগদবা থৌরাং, তেক্নোলোজি শীজিন্নবা, মতমগা চুনবা মওংদা শেমগৎনবা, য়োনফম ফগৎহনবা, অশীন-অরাংগী থবক ফগৎহনবা, ঙামীগী য়াইফ-থৌরাং অমসুং মপান্দা ঙা থাদোকপা হেনগৎহন্নবা থবক পায়খৎকনি। পি.এম.এম.এস.ৱাই.না লনাই মীওইশিং শরুক য়ানবা, ওন্ত্রেপ্রেনিউয়রশিপ শেমগৎনবা, ললোন-ইতিক্কী নমুনা শেমগৎনবা, ললোন-ইতিক লাইহন্নবা, অনৌবা থবকশিং পায়খৎনবা, স্তার্দ-অপশিং অমসুং ইনকুবেতরশিং ফগৎনবা থবকশিং পায়খৎকনি। পি এম এম এস ৱাই অসি ঙামীশিংদা য়ুম্ফম ওইবা স্কিম অমনি, ঙামীশিং, ঙা য়োনবশিংগী শেন-থুমগী ফিবম ফগৎহনবা অসি স্কিম অসিগী মরুওইবা পান্দমশিংগী মনুংদা অমনি।

ফিসরিস মিনিস্তরনা হায়খি স্কিম অসিদা থাদগদৌরিবা অপুনবা শেনফমগী চাদা ৪২ ঙা ফাবগী মচাক-মথুমশিং শেমগৎপদা শীজিন্ননবা খাক্লে। মসিদা য়াওরিবা থবকশিংদি ঙা ফানবা হিথাংফমশিং অমসুং থুংলনবা মফমশিং শেমগৎপা, কোল্ড চেন শেমগৎপা, ঙাগী কৈথেল , মোদেল কোস্তেল ফিসিং ভিলেজ অমসুং দিব-সি ফিসিং শেমগৎপা য়াওরি। মসিগী মথক্তা লনাই মীওইশিং শেন থাদহন্দুনা মরুওইবা ঙা ফাবগী মচাক-মথুমশিং শেমগৎপা, ঙা ফারবা মতুংদা হৌজিক চাদা ২৫ মাংলিবা অসি চাদা ১০দা হন্থনবা ভেলু চেনশিং মতমগা চুনবা মওংদা শেমগৎনবা হোৎনগনি। স্বাথ সাগরগী মখাদা বাইও-তোইলেতশিং শীজিন্নবা হেনগৎহনবা, ঙা ফাবগী জহাজশিং ইন্সুরেন্স য়াওহনবা, ফিসিরি মেনেজমেন্ত প্লান, ই-ত্রেদিং, ঙা লৈবা মফমশিং থিদোকপা অমসুং নেসনেল আই-তি দেতাবেজ শেম্বা য়াওনা ঙা ফাবগী থবক অসি মতমগা চুনবা মওংদা শেমগৎনবা মিৎয়েং চংগনি।

হকচাং ফনবা লৈবাক অসিদা ঙা চাবা হেনগৎহনবগী মরুওইবা পল্লদুনা মিনিস্তরনা হায়খি স্কিম অসিগী পান্দমশিং ফংবা ঙম্নবা সরকারনা “সাগর মিত্র”শিং রেজিস্তার তৌরগনি আমসুং ফিস ফার্মরস প্রদুসর ওর্গনাইজেসন(এফ.এফ.পি.ও.)শিং শেম্বদা পুক্নিং থৌগৎলি। সাগর মিত্র ৩৪৭৭ শেমগৎতুনা সমুদ্র মপানগী ঙা ফাবা খুঙ্গংশিংদা ঙা ফাবগী লৌশিং তাকপী তম্বীনবা নহারোলশিং শীজিন্নগনি। নহারোল কয়া থবক পীনবা লনাই লমশিংদা মশিং য়াম্লবা ফিসরিস এক্সতেন্সন সর্বিস সেন্তরশিং লিংখৎকনি।

স্কিম অসিনা অনৌবা থবকশিং অমসুং অনৌবা হিরমশিং হায়বদি ত্রেসএবিলিতি, সর্তিফিকেসন, এক্রিদিতেসন, থুমহি চেনবা মফমদা ঙা য়োকপা, জিনেতিক অমসুং নিউক্লিয়স ব্রিদিং সেন্তরশিং, ঙা য়োকপগী স্তার্দ-অপশিং, ঙা চাবা হেনগৎহন্নবা থবকশিং, ব্রান্দ শেমগৎপা, ঙাগী জি আই, এক্বা পার্কশিং, সমুদ্র মপানগী ঙা ফাবা খুঙ্গংশিংগী শেমগৎপা, ঙাগী হোলসেল কৈথেল শেমগৎপা, এক্বাতিক রিফরেল লেবশিং, এক্বাকলচর এক্সতেন্সন সর্বিস, বাইওফ্লোক, ঙা ফানবা অনৌবা হি পুথোকপা, লায়না মশক খঙদোকপা, ক্বালিতি তেস্ত তৌনবা লেবশিং, ওর্গনিক ওইনা ঙা য়োকপা অমসুং পোতেন্সিয়েল ফিসিং জোন(পি.এফ.জেৎ.) খুৎলায়শিংদা মিৎয়েং চংগনি।

মিনিস্তরনা হায়খি মদুদি স্কিম অসিনা পোৎথোক হেনগৎহন্নবা অমসুং ঙা য়োক্নবা হাংদুনা লৈরিবা মফমশিং শীজিন্ননবা অনৌবা তেক্নোলোজিশিং হায়বদি রি-সর্কুলেতরি এক্বাকলচর সিস্তেমশিং, বাইওফ্লোক, এক্বাপোনিক্স, কেজ কলতিবেসনদা মিৎয়েং চংগনি। মেরিকলচর, সিৱিদ থাবা অমসুং লৈতেংগী ঙা য়োকপা অসিনা মরুওইনা খুঙ্গংগী নুপীশিংদা থবক ফংহনগনি।

অফবা ঙা মচা অহোংবা মমলদা মরাংকাইনা ফংহনবগী মতাংদা মিনিস্তরনা হায়খি স্কিম অসিনা হৌজিক লৈবাক অসিদা হেক্তর অমদা তন ৩গী চাংদা পুথোকলিবা অসিদগী হেক্তর অমদা তন ৫ পুথোকপা ঙমহনগনি। শেন্দোং য়াম্না লৈবা ঙা মখলশিং পুথোক্নবা ব্রুদ বেঙ্কশিংগী নেসনেল নেতৱার্ক অমা লিংখৎকনি। স্কিম অসিনা ঙামীশিংগী পোৎথোক হেনগৎহনবা অমসুং মপান্দা থাদোকপগী চাংদম্নবদা শরুক য়াবা অমসুং ঙামীশিংনা অৱাংবা মমলদা ঙা য়োনবা ঙমহনগনি।

হৌজিক ভারতনা মালেমগী ওইনা ঙা পুথোকপগী চাদা ৭.৭৩ ওইরি অমসুং ২০১৮-১৯দা মপান্দা ঙা য়োনবদা লুপা ক্রোর ৪৬,৫৮৯ তানবা ঙমখি অমসুং হৌজিক ভারত অসি মালেমদা ঙা য়োকপদা অনিশুবদা অমসুং মপান্দা ঙা য়োনবা খ্বাইদগী চাউবা মরিসুবা লৈবাক ওইরি। ঙা পুথোকপা অমসুং মপান্দা থাদোকপদা খ্বাইদগী চাউবা লৈবাক ওইনবা মহাক্কী মিনিস্ত্রিনা ঙা য়োকপগী থবক অসি অৱাংবা থাক অমদা পুখৎকনি। সেক্তর অসি চহিগী গ্রোথ অসি ২০১৪-১৫দগী ২০১৮-১৯ ফাওবদা চাদা ১০.৮৮ হেনগৎখি। লৌউ-শিংউগী পোৎথোক মপান্দা য়োনবগী চাদা ১৮ ঙাগী পোৎথোক্না ওইখি।

ফিসরি, এনিমেল হসবেন্দরি অমসুং দাইরিইংগী রাজ্য মন্ত্রী সঞ্জিব কুমার বালিয়ান অমসুং প্রতাব চন্দ্র সারাঙ্গি অমসুং ফিসরিস দিপার্তমেন্তগী সেক্রেতরি দোক্তর রজিব রঞ্জন প্রেস কনফরেন্স অদুদা শরুক য়াখি। থৌরম অদুদা শক্নাইরিবশিংনা পি এম এম এস ৱাইগী লাইরিক মচা অমা ফোংখি।

***