প্রধান মন্ত্রী নরেন্দ্র মোদীনা হৌদোকখিবা দিজিতেল ইন্দিয়া থৌরম্না মাই পাকপা অসিবু হন্দক্তা কমনৱেল্থকী সেক্রেতরী জেনরেলনা হায়নীংঙাই লৈতনা থাগৎখ্রে। মহাক্না, ভারতনা দিজিতেল তেক্নোলোজীগী পাম্বৈনা মীচম মীয়ামগী পুন্সিদা পুরক্লিবা অহোংবশিং অসিবু লাইরবা অমসুং চাউখৎলক্লিবা লৈবাকশিংগী আশাগী অনৌবা মৈরানি হায়খ্রে।

হন্দক্তা প্রাইবেৎ চেনেল অমদা পীখিবা ইন্তর্ভ্যু অমদা কমনৱেল্থকী সেক্রেতরী জেনরেল পৈত্রিশিয়া স্কোতলেন্দনা হায়খি মদুদি মতৌ অসুম্না ভারতনা দিজিতেল সর্বিসশিং শিজিন্নদুনা ইনোবেসন অমসুং ওপর্চ্যুনিতীশিংগা লোইননা মীয়ামদা অনীংবা অপাম্বশিং ফংহন্নবা হোৎনরিবা অসি থাগৎনীংঙাইনি। মহাক্না মখা তানা হায়, “ঐখোয়গী লাইরবা লৈবাকশিংনা, ঐখোয়গী অপীকপা লৈবাকশিং অমসুং ঐখোয়গী চাউখৎলক্লিবা লৈবাকশিংনা চাউখৎলবা লৈবাকশিংগী মাই পাকপা অদু আশা অমগা লোইননা য়েংবা করিগুম্বা অদোম্না উরবসু, অদুগুম্বা মাই পাকপা অদু মশাগী লৈবাক্তা মতৌ তম্বদি কিনৈ মরমদি মদুগী মমল অদুক্কী মতিক ৱাংই। অদুবু মখোয়না ভারতকী মাইকৈদা হেক য়েংলুবদা অমসুং ভারতনা অদুগুম্বা মাই পাকপশিং অদুবু মমল য়ামদবা তেক্নোলোজীগা লোইননা ফংবা উরুবদা মখোয়সু আশাগী মৈরা অমা উবা হৌরকই। মসিনা আশা য়েল্লি।”

মহাক্না মসিসু পনখি মদুদি জনুৱরী ২০২০দা মহাক্কী ভারত খোংচৎকী মতমদা মহাক্না ভারত সরকারগী মন্ত্রীশিং অমসুং তেক্নোলোজীগা মরী লৈনবা অখঙ-অহৈশিংগী ৱারী শানখি। মতম অদুদা মহাক্না খঙখি মদুদি ভারত লাইরবা অমসুং মপাঙ্গল শোল্লবা মীয়ামগী মতেং পাংনবগীদমক হোৎনদুনতা লৈ। মহাক্না হায়খি, “ঐনা অসিগুম্বা হোৎনবা পুম্নমক অসিবু তরাম্না ওকচরি।”

কেন্দ্রগী ইলেক্ত্রোনিক্স অমসুং আই.তি. মন্ত্রী শ্রী রবি শঙ্কর প্রসাদকী দিজিতেল ইন্দিয়াবু মাই পাকহনবদা য়াখিবা থৌদাং অদুগীদমক থাগৎপা ফোংদোক্লদুনা মহাক্না হায়খি মদুদি মসিদা শ্রী প্রসাদকী থৌদাং চাউনা য়াওই। মহাক্না মসিসু হায়খি মদুদি শ্রী প্রসাদনা হোৎনখিবশিং অদুনা কমনৱেল্থকী লৈবাকশিংদা অনৌবা থৌনা অমা য়েল্লি।

*****