কেন্দ্রগী মন্ত্রী দোক্তর জিতেন্দ্র সিংহনা ঙসি ফোঙদোকখ্রে মদুদি কোবিদ মতুংগী ভারত অসি অহেনবা কনফিদেন্ত ফংলগনি অমসুং মালেমগী ফম্বাক্তা ময়াম্না পাম্নবা হেল্লগনি। লনাইগী তি.ভি. চেনেল অমগী ইন্তর্ভ্যু অমদা দোক্তর জিতেন্দ্র সিংহনা হায় মসিগী অৱাবা অসিগী মীপাইবা পাখৎপা মরক অসিদা ঙসিদগী থা তরুক্কী মতুংদা মালেম পুম্বনা ভারত্তা মিৎয়েং চংলগনি অমসুং ঐখোয়গা এঙ্গেজ তৌনবা অপাম্বা লৈরগনি হায়না মহাক্না থাজবা থম্মি। মসি খক্তা নত্তনা ভারত অসি ললোল ইতিক্কী শাফগদবা মফম অমা ওইরগনি।
দোক্তর জিতেন্দ্র সিংহনা প্রধান মন্ত্রী শ্রী নরেন্দ্র মোদীনা হান্না লাউথোকখিবা লোকদাউন অসিনা ভারত অসি কোবিদ মতুংগী তাইবঙপানগী মশানা অনৌবা নোর্মশিংগী শেম শাবা উবা ফংলে হায়না ফোঙদোকখি।  

মহাক্না মহৌশানা তুরিজমদা মখা পোনবা অৱাং-নোংপোক লমদমগী ইন-চার্জ ওইরপদগী কোবিদ লাইচৎকী চৈথেং করি ওইরগনি হায়না অখন্ননা হংবা মতমদা দোক্তর জিতেন্দ্র সিংহনা পাউখুম পীরদুনা হায় অৱাং নোংপোক লমদমদা তুরিজম হেগৎলগনি অমসুং য়ুরোপ অমসুং অতোপ্পা নোংচুপ লৈবাকশিংদগী লমকোয়বশিং পুক্নিং চিংশিনবসু হেনগৎলগনি মরমদি হায়রিবা লৈবাকশিং অদুগী তুরিস্ত রিজোর্ত অয়াম্বা কোরোনা অঙকপা ফংনা শোকহনখ্রবনিনা মসিগা য়েংনবদা কোরোনা লৈতবা মফম হায়রগদি ভারতকী অৱাং নোংপোক লমদম ওইরি অমসুং সিক্কিমগুম্বা লমকোয়বশিংনা খ্বাইদগী পাম্নবা মফম খরদা হৌজিক ফাওবদা কোরোনা পোজিতিব অমা ফাওবা লৈত্রি। 

ললোল ইতিক্কী ওইনা দোক্তর জিতেন্দ্রনা হায় মদুদি মসি ভারতকী “মেক ইন ইন্দিয়া’’ মিশন্দা অহেনবা মিৎয়েং পীগদবা খুদোংচাবা অমনি। মসিগা মরী লৈননা মহাক্না চহী খুদিংগী লুপা করোর ৫০০০ দগী ৬০০০ ফাওবগী ললোল ইতিক তৌরিবা ৱাগী খুদম পীরদুনা অগর্বতিগী শরুক ময়াম অমা অমসুং অতোপ্পা ৱা পোৎথোক ময়াম অমা  হৌজিক ফাওবদা অতোপ্পা লৈবাকশিংদগী পুশিল্লকই। মহাক্না হায় মসিগা চপ মান্ননা ঐখোয়গী ফার্মা ইন্দস্ত্রি হান্নদগী হীদাক পোথোকপা হেনগৎখ্রে কোবিদ-১৯গী কোন্তেক্সতা ফাওবা মপান্দা থাদোকপদা খুদোংচাগদবা হীদাক লাংথকশিং শাবদা ঐখোয় খুমাং চাউশিল্লি।

জম্মু & কাশ্মির য়ুনিয়ন তেরিতোরিগী দোমিসাইল পীবগী হন্দক্তা থোকখিবা নোতিফিকেসনগী মতাংদা হংবদা পাউখুম পীরদুনা দোক্তর জিতেন্দ্রনা হায় মসি অগস্ত ৫, ২০১৯দা  হৌখিবা প্রোসেস অমগী মখা চত্থরকপনি অমসুং হৌজিক মসি লোজিকল ওইবা ৱারোইশিন্দা লৈরে। মহাক্না হায় হৌরক্লিবা মীরোলনা মসিগী ফীরেপ অসিগী কান্নবা অদু উবা ফংগনি। 

****