কেন্দ্রগী এম.এস.এম.ই.শিং অঞসুং রোদ ত্রান্সপোর্ৎ অমসুং হাইৱেজগী মন্ত্রী শ্রী নীতিন গরকরীনা ফাইনান্স মন্ত্রীনা ঙসি লাউথোকখিবা এম.এস.এম.ই. সেক্তরগীদমক ওইবা রিলিফ পেকেজ অদুবু তরাম্না ওকখি। নাগপুরদগী ভিদিও মেসেজ অমদা মহাক্না হায়খি, মসিগী পেকেজ অসিনা লমদম অসিদা লৈরিবা লমদম অসিগী ওইবা ইন্দস্ত্রীদা অনৌবা পুন্সি অমগা লোইননা মপাঙ্গল কনখৎহল্লগনি।

শ্রী গরকরীনা হায়খি,  খুঙ্গংগী ইন্দস্ত্রীগী তর্নওভর অসি চাউরাক্না লুপা কোতি লিশিং ৮৮নি,  মসিনা লাক্কদৌরিবা মথংগী চহি ২ অসিদা লুপা কোতি লাখ ৫দা হেনগৎহন্নবগী পান্দম থম্লি। মহাক্না হায়খি,  ঙসি লাউথোকখিবা স্তিম্যুলস পেকেজ অসিনা থম্লিবা পান্দম অসিবু ফংহনবদা য়াম্না চাউনা মতেং পাংগনি। খাদিগী সেক্তরনা মসিদা য়াম্না চাউরবা থৌদাং লৌগদৌরি মরমদি খাদিসু মপান লমদা থাদোকপশিংগী মরক্তা য়াওরগনি।

মন্ত্রীনা এম.এস.এম.ই. সেক্তরগী ৱাহন্থোক্তা অহোংবা লাকপা অসিগী মতাংদা  য়াম্না ফনা উখি। সেক্তর অসিদা ইনভেস্তমেন্ত তৌবগী অকক্নবা ঙমখৈ অসি লুপা কোতি ১০০দা ওইহনখিবা অসিনা ইন্দস্ত্রী অসিদা হেন্না মপাঙ্গল কনখৎহনগনি,  মসিনা হৌজিক্তি বেঙ্কশিংদগী শেল কোম্না লৌবা য়ারগনি। সেক্তর অসিনা মসিগী রিভিজন অসি তৌবিনবা হায়রকখিবা কুইরে হায়না মহাক্না হায়খি। লুপা কোতি লিশিং ১০গী কোর্পস লৈবা শেন্থংশিংগী শেন্থং অসিনা অৱাবা তারবা এম.এস.এম.ই. লাখ ২৫গী মথক্তা খুদোংচাবা ফংগনি। মসিগা চপ মান্ননা মালেমগী ওইবা তেন্দর থোকপগী চৎনবীদা কোমথোরকপা অসিসু শিংথানীঙাই ওইবা খোংথাংনি হায়না মহাক্না হায়খি। শ্রী গরকরীনা  থাজবা থম্লি মদুদি  য়ুনিফোর্ম অসিনচিংবশিংগীদমক্তা দিফেন্স অমসুং পুলিসকী মাইকৈদগী হৌজিক্তি অনৌবা য়াথংশিং থোরক্লনি হায়না ফোংদোরকখি।

মহাক্না হায়খি,  মী কোতি ১১গী মথক্তা থবক পীরিবা অমসুং জি.দি.পি.গী চাউরাক্না চাদা ২৯ শরুক য়ারিবা সেক্তর অসিদা শেল-থুমগী মতেং পীবদা সেক্তর অসিগী স্তেকহোল্দরশিংনা কৈদৌনুংদসু কাওরোই। মসিগী পেকেজ অসিগী মতেংনা এম.এস.এম.ই.,  ভিলেজ অমসুং কোতেজ ইন্দস্ত্রী সেক্তর অসি অনৌবা অৱাংবা থাক্তা চাউখৎলক্কনি হায়না মহাক্না থাজবগা লোইননা ফোংদোরকখি।

****