কেন্দ্রগী দি.ও.এন.ই.আর.গী রাজ্যগী মন্ত্রী (আই/সি) দা. জিতেন্দ্র সিংনা ঙসি হায়খ্রে মদুদি ইকোনোমী, লাল্লোন-ঈতিক, সাইন্তিফিক রিসর্চ অমসুং অতোপ্পা মখল মখা কয়াগী হিরমশিংদা অনৌবা অহোংবা পুরকপগী ওইথোকপা য়াবগা লোইননা  কোবিদকী মতুংদা অনৌবা খুদম-চাংদমশিং থোরকপা য়াবা লৈ।

এ.এস.ও.সি.ঐচ.এ.এম. (এসোসিয়েতেদ চেম্বর ওফ কমর্স এন্দ ইন্দস্ত্রী)না শিনবা ইন্দো-বঙ্গলাদেশ “ভর্চুয়েল কনফরেন্স”তা ৱা ঙাংলদুনা অমসুং বঙ্গলাদেশকী কমর্সকী মন্ত্রী তিপু মুশি, মেঘালয়গী চীফ সেক্রেতরী কোনরাদ সাংমা অমসুং বংগলাদেশকী হাই কমিস্নর সুকুমারী রিভা গাঙ্গুলী দাসনা শরুক য়াখি, দা.জিতেন্দ্র সিংনা হায়খি, হৌখিবা চহি তরুক অসিদা অৱাং-নোংপোক্কী মফমশিং অসিনা মমাংদা হৌখিবা মতমশিংদা অহাংবা লৈখিবশিং অদুগী অৱাৎপা অদু মেনখৎখি মরমদি অহানবা ওইনা লৈবাক অসিগী অতোপ্পা মফমশিংগা মান্ননা মিৎয়েং চংলক্লি। মসিনা মীয়ামগী মরক্তা থাজবা পুরকপদা নত্তনা তোঙান তোঙানবা থাক্তা, নোংপোক্কী ঙমখৈশিংদা লৈরিবা লৈবাকশিং য়াওনা ভারতকী অতোপ্পা মফমশিংগা মায়োক্নবা ঙমবগী কেপাসিতী হেনগৎহনখি।

বঙ্গলাদেশকী ওইনদি, দা. জিতেন্দ্র সিংনা হায়খি, প্রধান মন্ত্রী নরেন্দ্র মোদিগী লুচিং মখাদা মাইপাক্না লৈবাক্কী মফমশিং ওন্থোক্নবগীদমক্তা ওইবা ইন্দো-বঙ্গলাদেশ ত্রিতীনা কর্বার তৌবদা কোমহনবা, চত্থোক-চৎশিন তৌবদা কোমহনবা অমসুং লান্থোক-লানশিন্দা কোমহন্নবগীদমক্তা হান্না য়াম্না অৱাবা থবকা অমা ওইরম্বা অদু হৌজিক্তি য়াম্না কোম্না পাংথোকপা য়াহনখ্রে।

মহৌশাদগী লৈবাক অনি অসিগী মরক্তা নুংশি-চান্ননা লৈরকপা মরী অদুবু পল্লদুনা, দা. জিতেন্দ্রনা হায়খি মদুদি অতোপ্পা লৈবাকশিংগা কর্বার তৌবদগী বঙ্গলাদেশকা তৌবনা হেন্না লাই। মসিগী মথক্তা মহাক্না হায়খি মদুইদি লৈবাক অনি অসিগী মরক্তা লাল্লোন-ঈতিক অমসুং কর্বার তৌবদা চাউখৎহনবদা অৱাং-নোংপোক্কী মফমশিং অসিনা মরু ওইবা থৌদাং লৌগদৌরিবনি।

হৌজিক থোরক্লিবা ফিভম অসিদা দা. জিতেন্দ্র সিংনা হায়খি মদুদি অৱাং-নোংপোক্তগী ৱা অসিনা ভারত খক্তগী নত্তনা সবকন্তিনেন্ত পুম্বগী ওইনা, মরু ওইনা নোংপোক থংবা লৈবাকশিং খুদম ওইনা বঙ্গলাদেশকা লাল্লোন-ঈতিক তৌবদা মরু ওইবা পাম্বৈ অমা ওইগদৌরিবনি। মহাক্না লৈবাক অনি অসিগী মরক্তা লাল্লোন-ঈতিক তৌনবগীদমক্তা পূথোকপা য়াবা পোৎলম কয়ামরুম অমা পনখি। হায়রিবশিং অদুদি খুদম ওইনা, কোয়লা, শিং, চমপ্রা-কোম্লানচিংবা মতম মতমগী হৈশিং অসিনচিংবশিং অসি থাদোকখিনবগীদমক অমসুং সিমেন্ত, প্লাস্তিক, পি.ভি.সি. পাইপ অসিনচিংবশিং অসিনা পুশিল্লক্নবগীদমক ওইবা পোৎলমশিংনি হায়না মহাক্না মখা তাখি।

অৱাং-নোংপোক লমদমশিংগী চাউখৎ-থৌরাংগী মনত্রালয় (দি.ও.এন.ই.আর.)গী মাইকৈদগী অঙম্বা মতেং পীগনি হায়না পল্লদুনা দা. জিতেন্দ্র সিংনা এ.এস.এস.ও.সি.ঐচ.এ.এম.গুম্বা লাল্লোন-ঈতিক অমসুং করবারগী সংস্থানশিং অসিনা চোংথোরক্তুনা অমসুং মাইকৈ অনিমক্তা কান্নবা ফংবা অনৌবা ইন্দস্ত্রীশিং অমসুং কর্বারগী য়ুনিৎশিংগী চাউখৎনবগীদমক্তা ওইবা পি.পি.পি. (পব্লিক প্রাইবেৎ পার্তিসিপেসন) মোদেল অসিবু শৌগৎপীনবা হায়খ্রে।

দা. জিতেন্দ্র সিংনা হায়খি, সরকারনা মতেং পীবগী থৌদাং ওইনা লৌবা মতমদা লাল্লোন-ঈতিক অমসুং ইন্দস্ত্রীগী সংস্থানশিংনা রিসোর্স অমসুং শেলগী অৱাৎপা অদু মেনখৎনবা চোংথোরকপা য়াই।

এ.এস.এস.ও.সি.ঐচ.এ.এম. ৱিনীৎ অগর্ৱাল অমসুং দীপক শুদসু থৌরম অদুদা ৱা ঙাংখি।

****