“ওপরেসন সমুদ্র সেতু”গীদমক্তা শিজিন্নখিবা আই.এন.এস.জালাশ্বা মে ১০গী অয়ুক্কী পুং ১০ তাবা মতমদা নুপী, অঙাং অমসুং অহল ওইরবশিং কয়া য়াওনা মালদিবতা পন্দুনা লৈরুরবা ভারত মচা পুন্না ৬৯৮ পুদুনা কোচী হিথাংফমদা থুংলরে। জহাজতা কাবগী চৎনবি পুম্নমক লোইরবা মতুংদা মে ৮গী নুংথিল অথেংবদা মালদিব থাদোরকখিবনি। মরী লৈনবা মীওইশিংনা সোসিএল কন্তেক্ত য়াম্না লৈহন্দনা মীওইশিং অসি জহাজদা তেক্ত কাইদনা কাহন্নবা হায়দুনা তঙাই ফদবা চেকশিন থৌরাং পুম্বা লৌখৎখি। খোংচৎ মনুং অসিদা অহল ওইরবা মীওইশিং, মীরোনবী নুপীশিং অমসুং পাক্লিবা অঙাং মচাশিংসু নীংথিনা য়েংশিনবীখি। পর্সনেল প্রোতেক্তিব ইক্বুইপমেন্ত উপ্পা ত্রেন তৌরবা নেভীগী মীওইশিংনা পেসেঞ্জরশিং অসিবু য়েংশিনখি। মখোইবু লৌথোকউবগী থবক অসিদা স্তেন্দর্দ ওপরেতিং প্রোতোকোল (এস.ও.পি.) অমসুং ভারত সরকারনা পীবা চৎন-কাংলোন পুম্নমক ইন্দুনা পাংথোকখি।   

পেসেঞ্জরশিং অসি কোচীন পোর্ত ত্রস্তকী ক্রুস তর্মিনেলদা লৈবা হিথাফমদা লৈবা নেভেল অমসুং মীয়ামগী লৈঙাক্লোইশিংনা ওকখি। ক্রু তর্মিনেলদা কোবিদ স্ক্রীনিং তৌবদা মতম য়াম্না চংদনবা অমসুং ইমিগ্রেসনগী থবকশিং পাংথোক্নবা হায়দুনা রাজ্য সরকারনা নীংথিবা মওংদা শিল-লাংদুনা থমখি। তর্মিনেলশিংদা মেদিকেল প্রোতোকোলগী মতুং ইন্না মিংশেল খাবা কাউন্তরশিং কস্তমস, ইমিগ্রেসন, পুলিস, হকশেল বিভাগ, বি.এস.এন.এল. অমসুং জিলাগী লৈঙাক্লোইশিংগীদমক্তা থমখি। মসিগী মথক্তা, জহাজতগী কুমথরকপদা মতম চংদনবা, মী খাইদোকপদা থুনবা অমসুং হেলথ অমসুং মেদিকেলগী থবকশিং কাংলোন চুম্না পাংথোক্নবা হায়দুনা কোচীন ইন্তর্নেস্নেল এয়রপোর্ত লিমিতেদ (সি.আই.এ.এল.)দগী বেগেজ ত্রোল্লীশিংসু লৌরুদুনা থমখি। 

বিশাখাপত্নমদা লৈবা আই.এন.এস. জালাশ্বানা ইন্দিয়ন নেভীগী অসিগুম্লবা ভারত মচাশিংবু ইবাক্বেসন তৌবগী অমসুং মরু ওইবা হ্যুমেনিতরিয়ন এসিস্তেন্স এন্দ দিজাস্তর রিলিফ (ঐচ.এ.দি.আর.)কী থবক থৌরমশিংদা মাং থানা পাংথোক্তুনা লাক্লি। জহাজ অসি লান্মী পুনবা শেম শাখিবনি অমসুং হৌজিক চত্থরিবা ইবাক্বেসন অসিগীদমক্তা জহাজ মনুংদা লৈবা ফেসিলিতী খরা শেমদোক শাদোকখি। হৌজিক চত্থরিবা থবক অসিগীদমক্তা খনগৎলবা ইন্দিয়ন নেভীগী ত্রেন তৌরবা মেদিকেল তীম্না জহাজ অসি চলাইখি।

ঙসি ভারত মচা ময়াম অমা য়ুমদা পুরক্লিবা অসি ওপরেসন অসিগী অহানবা শরুক্নি অমসুং মখা তারকপা ওইনা অতোপ্পা জহাজ অমা, কোচীদা লৈবা আই.এন.এস.মগরসু ভারত মচা ২০২ পুদুনা মালে থাদোকখ্রবনি। চত্থরিবা থবকশিং অসি কোবিদ-১৯গী লাইচৎ অসি য়েংলদুনা ভারত সরকারনা মিদল ইস্ত অমসুং মালদিবতা পন্দুনা লৈরিবা ভারত মচাশিংবু য়ুমদা পুরক্না থৌদাং, বন্দে ভারত মিশনগী শরুক অমনি।

****