కైలాష్-మానససరోవర్ యాత్రకు, సరిహద్దు ప్రాంత అనుసంధాన మార్గానికి కొత్త శకం ప్రారంభం అయింది. ధార్చుల (ఉత్తరఖండ్) నుండి లిపులేఖ్ (చైనా సరిహద్దు) ను కలుపుతూ రహదారి మార్గాన్ని ఒక ప్రత్యేక కార్యక్రమంలో రక్షణ మంత్రి శ్రీ రాజనాధ్ సింగ్ ప్రారంభించారు. పితోర్ఘర్ నుండి గుంజి కి వాహనాల రాకపోకలను జెండా ఊపి ప్రారంభించారు. మారుమూల ప్రాంతాల అభివృద్ధికి ప్రధాన మంత్రి శ్రీ నరేంద్ర మోడీ కి ఒక ప్రత్యేక దార్శనికత ఉందని శ్రీ రాజనాధ్ సింగ్ ఈ సందర్బంగా మాట్లాడుతూ అన్నారు. ఈ కీలకమైన మార్గం పూర్తి కావడంతో స్థానికలు, యాత్రికుల దశాబ్దాల కల సాకారమైందని శ్రీ రాజనాధ్ సింగ్ తెలిపారు. ఈ రహదారి మార్గం ఏర్పాటు కావడం వల్ల స్థానిక వ్యాపారాలు పెరిగి ఆర్థిక కార్యకలాపాలు మరింత పెరుగుతాయని ఆయన అన్నారు. 

హిందూ, బుద్ధ, జైనులకు పవిత్రమైన కైలాష్-మానససరోవర్ మార్గం పూర్తి కావడం వల్ల ఇక నుండి ఈ యాత్రను  2-3 వారాల కాకుండా ఒక వారానికే పూర్తి చేయవచ్చని శ్రీ రాజనాధ్ సింగ్ వెల్లడించారు. ఈ రహదారి ఘటిభగర్ నుండి ప్రారంభమై కైలాష్-మానససరోవర్ ప్రవేశ ద్వారమైన లిపులేఖ్ పాస్ వరకు ఉంటుంది. ఇది 80 కిలోమీటర్ల రహదారి, సముద్ర మట్టానికి 6,000 నుండి 17,060 అడుగుల ఎత్తులో ఉంటుంది. ఈ ప్రాజెక్ట్ పూర్తవడంతో, కఠినతరమైన ఎత్తైన భూభాగం గుండా కష్టతరమైన పర్వతారోహణను ఇప్పుడు కైలాష్-మానససరోవర్ యాత్ర యాత్రికులు నివారించవచ్చు. సిక్కిం లేదా నేపాల్ మార్గాల వెంబడి కైలాష్-మానససరోవర్ యాత్ర రెండు మూడు వరాల పాటు సాగేది. 90 కిలోమీటర్ల నడవాల్సి వచ్చేది, దీని వల్ల వయోవృద్దులకు ఇబ్బందులు ఎదురయ్యేవి.  ఇప్పటి వరకు ఉన్న మార్గాల వల్ల భారత భూభాగం లో 20 శాతం, చైనా భూభాగంలో 80 శాతం యాత్ర చేయాల్సి ఉండేది. ఇపుడు ఘటిభగర్-లిపులేఖ్ మార్గం వల్ల యాత్ర అటుదిటు అయింది, మానససరోవర్ యాత్ర ఇక నుండి 84 శాతం భారత భూభాగం, 16 శాతం చైనా భూభాగం నుండి చేయవచ్చు. ఇది నిజంగా ఒక చారిత్రకమని రక్షణ మంత్రి వ్యాఖ్యానించారు. సరిహద్దు రహదారుల సంస్థ (బిఆర్ఓ) ఇంజినీర్లు, సిబ్బంది అంకితభావమే ఈ విజయానికి కారణమని రక్షణ మంత్రి ప్రశంసించారు. రహదారి నిర్మాణం  సందర్బంగా అసువులు బాసిన వారికి ఆయన శ్రద్ధాంజలి ఘటించారు. కోవిడ్-19 సమయంలో కూడా తమ కుటుంబాలకు దూరంగా ఈ కార్యాన్ని పూర్తి చేసిన బిఆర్ఓ సిబ్బందిని రక్షణ మంత్రి అభినందించారు.