ଆୟୁଷ ମନ୍ତ୍ରୀ ଶ୍ରୀ ଶ୍ରୀପଦ ୟଶୋ ନାଏକ ଏବଂ ସ୍ୱାସ୍ଥ୍ୟ ମନ୍ତ୍ରୀ ଡ. ହର୍ଷ ବର୍ଦ୍ଧନ ମିଳିତ ଭାବେ ଆସନ୍ତାକାଲି ନୂଆଦିଲ୍ଲୀ ଠାରେ ତିନୋଟି ଆୟୁଷ ଆଧାରିତ ଗବେଷଣାର ଶୁଭାରମ୍ଭ କରିବେ ।

ଦେଶରେ କୋଭିଡ-19 ମହାମାରୀ ସମସ୍ୟାର ମୁକାବିଲା ନିମନ୍ତେ ଆୟୁଷ ମନ୍ତ୍ରଣାଳୟ ପକ୍ଷରୁ ଆୟୁଷ ବ୍ୟବସ୍ଥାର ଡାକ୍ତରୀ ଗବେଷଣା (ରୋଗନିରୋଧୀ ଏବଂ ଅତିରିକ୍ତ ହସ୍ତକ୍ଷେପ) ଜରିଆରେ ବିଭିନ୍ନ ପଦକ୍ଷେପ ଗ୍ରହଣ କରାଯାଇଛି । ଅଧିକ ସଂକ୍ରମଣ ଆଶଙ୍କା ଥିବା ଜନସଂଖ୍ୟାରେ ଆୟୁଷ ଆଧାରିତ ରୋଗ ନିରୋଧୀ ହସ୍ତକ୍ଷେପର ପ୍ରଭାବ ବିଷୟରେ ମଧ୍ୟ ମନ୍ତ୍ରଣାଳୟ ପକ୍ଷରୁ ଅଧ୍ୟୟନ କରାଯାଉଛି । ଏହାବ୍ୟତୀତ କୋଭିଡ-19 ସଂକ୍ରମଣର ନିରାକରଣ ଲାଗି ଆୟୁଷ ଉପାୟ ଏବଂ ପଦକ୍ଷେପ ସମ୍ପର୍କରେ ବିଚାର କରାଯାଉଛି ।

ଏହି ପ୍ରୟାସ ପାଇଁ ରଣନୀତି ପ୍ରସ୍ତୁତି ଓ ବିକାଶ ପାଇଁ ମନ୍ତ୍ରଣାଳୟ ପକ୍ଷରୁ ଏକ ଆନ୍ତଃବିଭାଗୀୟ ଆୟୁଷ ଗବେଷଣା ଓ ବିକାଶ ଟାସ୍କ ଫୋର୍ସ ଗଠନ କରାଯାଇଛି । ବିଶ୍ୱବିଦ୍ୟାଳୟ ମଞ୍ଜୁରି ଆୟୋଗ (ୟୁଜିସି) ଉପାଧ୍ୟକ୍ଷ ଡ. ଭୂଷଣ ପଟୱର୍ଦ୍ଧନଙ୍କ ଅଧ୍ୟକ୍ଷାରେ ଏହି ଗୋଷ୍ଠୀରେ ବହୁସଂଖ୍ୟକ ବିଶେଷଜ୍ଞ ରହିଛନ୍ତି ।

7 ମେ, 2020ରେ ନିମ୍ନୋକ୍ତ ଅଧ୍ୟୟନର ବିଧିବଦ୍ଧ ଶୁଭାରମ୍ଭ ଆରମ୍ଭ କରାଯାଇଛି:

• କୋଭିଡ-19ଚିକିତ୍ସା ଲାଗି ରୋଗନିରୋଧୀ ଏବଂ ଅତିରିକ୍ତ ହସ୍ତକ୍ଷେପ ପାଇଁ ଆୟୁର୍ବେଦ ଉପରେ ଚିକିତ୍ସା ଗବେଷଣା : ଆଇସିଏମଆରର ବୈଷୟିକ ସହଯୋଗରେ ଭାରତୀୟ ବିଜ୍ଞାନ ଓ ଔଦ୍ୟୋଗିକ ଗବେଷଣା ପରିଷଦ ଜରିଆରେ ଆୟୁଷ ମନ୍ତ୍ରଣାଳୟ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଏବଂ ବିଜ୍ଞାନ ଓ ପ୍ରଯୁକ୍ତି ମନ୍ତ୍ରଣାଳୟର ମିଳିତ ଉଦ୍ୟମରେ ଏହି ଅଧ୍ୟୟନ କରାଯାଉଛି ।
• କୋଭିଡ-19ରୋଗୀଙ୍କ ଉପରେ ରୋଗନିରୋଧୀ ଏବଂ ଅତିରିକ୍ତ ଅଧ୍ୟୟନ ନିମନ୍ତେ ଏକ ଆୟୁଷ ଗବେଷଣା ଓ ବିକାଶ ଟାସ୍କଫୋର୍ସ ଗଠନ କରାଯାଇଛି । ଏଥିରେ ବିଭିନ୍ନ ସଂସ୍ଥାର ଉଚ୍ଚସ୍ତରର ବିଶେଷଜ୍ଞମାନେ ଚାରିଟି ଚିକିତ୍ସା ପଦ୍ଧତି ଉପରେ ସମୀକ୍ଷା ଏବଂ ପରାମର୍ଶ ପ୍ରକ୍ରିୟା ଆରମ୍ଭ କରିଛନ୍ତି । ଅଶ୍ୱଗନ୍ଧା, ଯଷ୍ଟିମଧୁ, ଗୁଡ଼ୁଚି+ପିପ୍ପଳି ଏବଂ ଏକ ପଲ ହର୍ବାଲ ମିଶ୍ରଣ (ଆୟୁଷ-64) ପ୍ରସ୍ତୁତ କରାଯାଇ ରୋଗୀଙ୍କ ଠାରେ ଏହାର ପ୍ରୟୋଗକୁ ଅଧ୍ୟୟନ କରାଯାଉଛି ।
• ସାର୍ସ-କୋଭ-2 ଚିକିତ୍ସା ପାଇଁ ଉଦ୍ଦିଷ୍ଟ ଅଶ୍ୱଗନ୍ଧାକୁ କୋଭିଡ-19ମହାମାରୀର ଅଧିକ ଗୁରୁତର ମାମଲାରେ ପ୍ରୟୋଗ : ଏହାକୁ ସ୍ୱାସ୍ଥ୍ୟସେବା ପ୍ରଦାନକାରୀଙ୍କ ଦ୍ୱାରା ହାଇଡ୍ରୋକ୍ଲୋରୋକୁଇନ ସହ ତୁଳନା କରାଯାଉଛି ।
• ଅଧିକ ବିପଦ ଥିବା ଜନସଂଖ୍ୟା ମଧ୍ୟରେ କୋଭିଡ-19ମହାମାରୀ ନିରାକରଣ ଲାଗି ଆୟୁର୍ବେଦିକ ହସ୍ତକ୍ଷେପର ଜନସଂଖ୍ୟା ଉପରେ ପ୍ରଭାବକୁ ଆୟୁଷ ମନ୍ତ୍ରଣାଳୟ ପକ୍ଷରୁ ଅଧ୍ୟୟନ କରାଯାଉଛି । ଏହାର ମୂଳ ଉଦେ୍ଦଶ୍ୟ ହେଉଛି, କୋଭିଡ-19 ନିଦାନ ପାଇଁ ଆୟୁଷ ହସ୍ତକ୍ଷେପର ସମ୍ଭାବନା ଏବଂ ଅଧିକ ବିପଦ ଥିବା ଅଞ୍ଚଳରେ ଜନସାଧାରଣଙ୍କ ଜୀବନ ଧାରଣ ମାନ ବୃଦ୍ଧି କରିବା । ଏହି ଅଧ୍ୟୟନ ଆୟୁଷ ମନ୍ତ୍ରଣାଳୟର ଚାରିଟି ଗବେଷଣା ପରିଷଦ ଏବଂ 25ଟି ରାଜ୍ୟରେ ଥିବା ଜାତୀୟ ସଂସ୍ଥାନ ଏବଂ ବିଭିନ୍ନ ରାଜ୍ୟ ସରକାରଙ୍କ ଦ୍ୱାରା 5 ଲକ୍ଷ ଲୋକଙ୍କ ଉପରେ କରାଯାଉଛି ।

ଏହି ଅଧ୍ୟୟନର ଫଳାଫଳ ନିଶ୍ଚିତ ଭାବେ କୋଭିଡ-19ନିରାକରଣ ଦିଗରେ ଆୟୁଷ ହସ୍ତକ୍ଷେପର ସମ୍ଭାବନାକୁ ବୈଜ୍ଞାନିକ ପ୍ରାମାଣିକତାର ସହିତ ଉଜାଗର କରିବ ।

ଆୟୁଷ ମନ୍ତ୍ରଣାଳୟ ପକ୍ଷରୁ ଆୟୁଷ ସଞ୍ଜିବନୀ ମୋବାଇଲ ଆପ ବିକଶିତ କରାଯାଇଛି । 50 ଲକ୍ଷ ଲୋକଙ୍କୁ ନେଇ ବହୁସଂଖ୍ୟକ ଲୋକଙ୍କ ଠାରୁ ତଥ୍ୟ ସଂଗ୍ରହ ଉଦ୍ଦେଶ୍ୟରେ ଏହି ଆପର ବ୍ୟବହାର କରାଯିବ । କୋଭିଡ-19ପ୍ରତିରୋଧ କରିବା ଲାଗି ଆୟୁଷ ହସ୍ତକ୍ଷେପର ପ୍ରଭାବ ଅଧ୍ୟୟନ କରିବା ସଂକ୍ରାନ୍ତରେ ଏହି ଲୋକମାନଙ୍କ ଠାରୁ ତଥ୍ୟ ସଂଗ୍ରହ କରାଯିବ ।

**********