ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ
ନାମ କଣ୍ଟାକ୍ଟ ଗ୍ରୁପ ଅନଲାଇନ୍ ସମ୍ମିଳନୀରେ ଅଂଶଗ୍ରହଣ କଲେ ପ୍ରଧାନମନ୍ତ୍ରୀ
प्रविष्टि तिथि:
04 MAY 2020 9:57PM by PIB Bhubaneshwar
କୋଭିଡ-19 ମହାମାରୀ ସଙ୍କଟର ମୁକାବିଲା ସମ୍ପର୍କରେ ଉଦ୍ଦେଶ୍ୟରେ ଆଲୋଚନା କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ 2020 ମେ’ 4 ସନ୍ଧ୍ୟାରେ ଅନୁଷ୍ଠିତ ନନ୍ ଆଲାଇନଡ ମୁଭମେଂଟ (ନାମ) କଣ୍ଟାକ୍ଟ ଗ୍ରୁପ ଅନଲାଇନ୍ ସମ୍ମିଳନୀରେ ଅଂଶଗ୍ରହଣ କରିଥିଲେ ।
‘ୟୁନାଇଟେଡ୍ ଏଗେନଷ୍ଟ କୋଭିଡ-19’ ବିଷୟବସ୍ତୁ ଉପରେ ହୋଇଥିବା ଏହି ଅନଲାଇନ୍ ନାମ୍ କଣ୍ଟାକ୍ଟ ଗ୍ରୁପ୍ ସମ୍ମିଳନୀକୁ ବର୍ତ୍ତମାନର ନାମ ଅଧ୍ୟକ୍ଷ ରିପବ୍ଲିକ୍ ଅଫ୍ ଆଜେରବୈଜାନ୍ ରାଷ୍ଟ୍ରପତି ମାନ୍ୟବର ଇଲହାମ୍ ଅଲିୟେଭ୍ ଆୟୋଜନ କରିଥିଲେ । କୋଭିଡ-19 ବିରୋଧୀ ଲଢ଼େଇରେ ଆନ୍ତର୍ଜାତିକ ସଂହତିକୁ ପ୍ରୋତ୍ସାହିତ କରିବା ଓ ମହାମାରୀର ମୁକାବିଲା ପାଇଁ ରାଷ୍ଟ୍ରୀୟ ଓ ଆନ୍ତର୍ଜାତିକ ସଂସ୍ଥାଗୁଡ଼ିକର ପଦକ୍ଷେପକୁ ପରିଚାଳନା କରାଇବା ଏହି ସମ୍ମିଳନୀର ମୁଖ୍ୟ ଉଦ୍ଦେଶ୍ୟ ଥିଲା । ଏହି କାର୍ଯ୍ୟକ୍ରମରେ ଇଣ୍ଟରନ୍ୟାସନାଲ ଡେ’ ଅଫ୍ ମଲ୍ଟିଲାଟେରାଲିଜମ ଆଣ୍ଡ ଡିପ୍ଲୋମାସି ଫର୍ ପିସକୁ ମଧ୍ୟ ପାଳନ କରାଯାଇଥିଲା ।
ଏଥିରେ ପ୍ରଧାନମନ୍ତ୍ରୀ ମୋଦୀଙ୍କ ଅଂଶଗ୍ରହଣ ଏକ ପ୍ରମୁଖ ପ୍ରତିଷ୍ଠାତା ସଦସ୍ୟ ଭାବେ ନାମ ର ସିଦ୍ଧାନ୍ତ ଓ ମୂଲ୍ୟବୋଧ ପ୍ରତି ଭାରତର ଦୀର୍ଘଦିନର ପ୍ରତିଶ୍ରୁତିବଦ୍ଧତାକୁ ଦର୍ଶାଉଛି । ନିଜ ବକ୍ତବ୍ୟରେ ପ୍ରଧାନମନ୍ତ୍ରୀ ସଙ୍କଟର ମୁକାବିଲା ଉଦ୍ଦେଶ୍ୟରେ ବିଶ୍ୱ ସମୁଦାୟ ଦ୍ୱାରା ସମନ୍ୱିତ, ସାମଗ୍ରିକ ଓ ନ୍ୟାୟିକ ପ୍ରତିକ୍ରିୟା ପାଇଁ ଗୁରୁତ୍ୱାରୋପ କରିଥିଲେ । ଘରୋଇ ତଥା ଆନ୍ତର୍ଜାତିକ ସ୍ତରରେ ଭାରତ ନେଇଥିବା ପଦକ୍ଷେପ ସମ୍ପର୍କରେ ଦର୍ଶାଇ ପ୍ରଧାନମନ୍ତ୍ରୀ କହିଥିଲେ, ଏହି ଆନ୍ଦୋଳନ ପାଇଁ ଆବଶ୍ୟକ ଯଥାସମ୍ଭବ ସହାୟତା ଯୋଗାଇବାକୁ ଭାରତ ପ୍ରସ୍ତୁତ । ସେହିପରି ଆତଙ୍କବାଦ ଓ ମିଥ୍ୟା ଖବର ବିରୋଧରେ ମଧ୍ୟ ବିଶ୍ୱକୁ ଲଗାତାର ପଦକ୍ଷେପ ଗ୍ରହଣ କରିବାର ଆବଶ୍ୟକତା ରହିଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ।
ଏହି ସମ୍ମିଳନୀରେ ପ୍ରଧାନମନ୍ତ୍ରୀ ମୋଦୀଙ୍କ ସମେତ ଏସିଆ, ଆଫ୍ରିକା, ଲାଟିନ୍ ଆମେରିକା, ୟୁରୋପ ଓ କାରବିଆନ୍ କ୍ଷେତ୍ରର 30ରୁ ଉର୍ଦ୍ଧ ରାଷ୍ଟ୍ର ମୁଖ୍ୟ ଅଂଶଗ୍ରହଣ କରିଥିଲେ । ସମ୍ମିଳନୀକୁ ଜାତିସଂଘ ଜେନେରାଲ ଆସେମ୍ବ୍ଲିର ସଭାପତି ପ୍ରଫେସର ଟିଜାନି ମହମ୍ମଦ ବନ୍ଦେ, ଜାତିସଂଘ ମହାସଚିବ ଶ୍ରୀ ଆଂଟୋନିଓ ଗୁଟେରସ୍, ଆଫ୍ରିକୀୟ ୟୁନିଅନ୍ ଅଧ୍ୟକ୍ଷ ମୁସା ଫକି ମହମତ୍, ୟୁରୋପୀୟ ୟୁନିଅନ୍ ହାଇ ରିପ୍ରେଜେଂଟେଟିଭ୍ ଜୋସେଫ୍ ବୋରେଲ ଓ ବିଶ୍ୱ ସ୍ୱାସ୍ଥ୍ୟ ସଂଗଠନର ମହାନିର୍ଦ୍ଦେଶକ ଡ. ଟେଡ୍ରୋସ୍ ଘେବ୍ରେୟେସସ୍ ପ୍ରମୁଖ ସମ୍ବୋଧିତ କରିଥିଲେ ।
ନାମ ନେତୃବୃନ୍ଦ କୋଭିଡ୍-19ର ପ୍ରଭାବ ସମ୍ପର୍କରେ ଆକଳନ କରିଥିଲେ ଏବଂ ଆବଶ୍ୟକ ସମ୍ଭାବ୍ୟ ପ୍ରତିକାର ଚିହ୍ନଟ କରିବା ସହ ତତ୍କାଳ କାର୍ଯ୍ୟାନୁଷ୍ଠାନ ପାଇଁ ଅନୁରୋଧ କରିଥିଲେ । ସମ୍ମିଳନୀ ପରେ ନେତୃବୃନ୍ଦ କୋଭିଡ୍-19 ବିରୋଧୀ ଲଢ଼େଇ ପାଇଁ ଆନ୍ତର୍ଜାତିକ ସଂହତିକୁ ଗୁରୁତ୍ୱ ଦେଇ ପ୍ରସ୍ତୁତ ଘୋଷଣାନାମାକୁ ଗ୍ରହଣ କରିଥିଲେ । ଏହାସହ ନେତୃବୃନ୍ଦ କୋଭିଡ୍-19 ବିରୋଧୀ ଲଢ଼େଇ ପାଇଁ ସେମାନଙ୍କର ମୌଳିକ ଔଷଧ, ସାମାଜିକ ଓ ମାନବୀୟତା ଚାହିଦାକୁ ପ୍ରତିପାଦନ କରୁଥିବା ଏକ ସାଧାରଣ ଡାଟାବେସ୍ ସ୍ଥାପନ କରି ସଦସ୍ୟ ରାଷ୍ଟ୍ରଗୁଡ଼ିକର ଚାହିଦା ଓ ଆବଶ୍ୟକତା ଚିହ୍ନଟ କରିବାକୁ ଏକ ‘ଟାସ୍କଫୋର୍ସ’ ଗଠନ ପାଇଁ ଘୋଷଣା କରିଥିଲେ ।
**************
(रिलीज़ आईडी: 1621187)
आगंतुक पटल : 304
इस विज्ञप्ति को इन भाषाओं में पढ़ें:
English
,
Urdu
,
Marathi
,
हिन्दी
,
Assamese
,
Manipuri
,
Bengali
,
Punjabi
,
Gujarati
,
Tamil
,
Telugu
,
Kannada
,
Malayalam