কোবিদ-১৯ লাইচৎকী অৱাবা থেংননবা ৱা খন্ননবা ২০২০, মে ৪গী নুমিদাংদা পাংথোকখিবা নন এলাইন মুবমেন্ত (নাম) কন্তেক গ্রুপকী ওনলাইন সমিৎতা প্রধান মন্ত্রী নরেন্দ্র মোদী শরুক য়াখ্রে ।

নামগী হৌজিক চেয়রমেন ওইরিবা , অজরবাইজানগী প্রসিদেন্ত ইলহাম অলিয়েবনা য়ুম্বু ওইদুনা পাংথোকখিবা ওনলাইন নাম কন্তেক গ্রুপ সমিৎকী পান্দমদি “কোবিদ-১৯গী মায়োক্তা পুনশিনবা”নি । মীফম অসিগী পান্দমদি কোবিদ-১৯ লাইচৎ থেংননবা মালেমগী লৈবাকশিং অমত্তা ওইবা হেনগৎহনবা অমসুং লাইচৎ অসি লাকশিন্নবা লৈবাকশিং অমসুং মালেমগী লুপশিংগী থবকশিং শিন্দোক-শিঞ্জিন তৌবনি । মীফম অসিদা ইন্তর্নেসনেল দে ওফ মল্তিলেতেরেলিজম এন্দ দিপ্লোমেসী ফোর পিসকী থৌরমসু পাংথোকখি ।

লুপ অসি শেমগৎপদা মাংজিল থাবা লৈবাক অমা ওইনা নামগী অচুম্বা ৱাখল্লোনশিং অমসুং মগুনশিংদা ভারতনা মতম কয়াগী মমাংদগী থাজদুনা লাকখিবা অদু প্রধান মন্ত্রীনা মীফম শরুক য়াখিবা অসিনা মশক থোকহল্লে । প্রধান মন্ত্রীনা মহাক্কী ৱারোলদা মালেমগী অৱাবা অসিদা মতেং পাংনবা, পুম্নমক কোনশিনবা অমসুং মরম চাবা থবক পায়খৎপগী মরুওইবা থমখি । ভারতনা লৈবাক মনুংদা অমসুং মালেমগী ওইনা পায়খৎলিবা থবকশিং, ইহৌ অসিদা শৌগৎপা উৎতুনা পাংবা য়াবা মতেং পাংনবা ভারতনা থৌরাং তৌরিবা অদু অমুক হন্না প্রধান মন্ত্রীনা নিংশিংখি । তেরোরিজম অমসুং শেমজিনবা পাউশিংগী মহিকশিংদগী ঙাকথোক্নবা মালেম্না মখা তানা হোৎনবগী মরুওইবা অদু প্রধান মন্ত্রীনা তকশিনখি ।

মীফম অদুদা প্রধান মন্ত্রীগা লোয়ননা এসিয়া, অফ্রিকা, লেতিন অমেরিকা অমসুং কেরিব্বিয়নগী মেম্বর লৈবাকশিং অমসুং য়ুরোপকী লৈবাক অমসুং সরকারগী মকোক ৩০ হেন্না শরুক য়াখি । মীফম অদুদা য়ু এন জেনেরেল এশেমব্লিগী প্রসিদেন্ত প্রোফেসার তিজজানি মুহমদ বান্দে, য়ু এনগী সেক্রেতরি জেনেরেল এন্তোনিও গুতেরেস, অফ্রিকান য়ুনিয়নগী চেয়রপর্সন মুসা ফাকি মহামত, ই য়ু হাই রিপ্রসেন্তেতিব জোসেপ বোরেল অমসুং ৱার্ল্দ হেল্থ ওর্গনাইজেসনগী দাইরেক্তর জেনেরেল দোক্তর তেদ্রোস গেব্রেয়েসুস ৱা ঙাংখি ।

পুম্নমক্কী মথক্ত, নামগী লুচিংবশিংনা কোবি-১৯না পীরিবা চৈথেং নৈনখি, লায়েংনবা দরকার ওইবশিং মশক খঙদোকখি অমসুং মখা তাবা থবকশিং পাংথোক্নবা তকশিনখি । মীফম মতুংদা, কোবিদ-১৯ থেংননবা মালেম অমতা ওইনা পুনশিনবগী মরুওইবা খঙদুনা লুচিংবশিংনা দিক্লারেসন অমা চৎনবা হৌখি । কোবিদ-১৯ থেংননবা লৈবাকশিংগী লৈফম থোকপা মেদিকেল, খু্ন্নাই অমসুং মীওইবগী দরকার ওইবশিং মশক খঙবা ঙম্বা মান্নবা দেতাবেজ শেমগৎতুনা মেম্বর লৈবাকশিংগী দরকার ওইবশিং থিদোক্নবা ‘তাক্স ফোর্স’ অমা শেম্বা হায়না লুচিংবশিংনা লাউথোকখি ।

****