অৱাংনোংপোক রাজ্য নিপানগী মনুংদা মঙাদি কোরোনা লৈত্রে অমসুং রাজ্য অহুমসিগী ওইনসু হৌখিবা নুমিৎ খরনি অসিদা অনৌবা কোরোনাগী পোজিতীব কেস অমত্তা হেনগৎলক্ত্রে। হায়রিবা অসি দিবেলপমেন্ত ওফ নোর্থ ইস্তর্ন রীজন (দি.ও.এন.ই.আর.), এম.ও.এস. পি.এম.ও., থবক শুবা মী, মীয়ামগী ৱাকৎ অমসুং পেন্সন, এতোমীক ইনর্জী অমসুং স্পেস মন্ত্রালয়গী কেন্দ্রগী রাজ্যগী মন্ত্রী (ইন্দিপেন্দেন্ত চার্জ) দাক্তর জিতেন্দ্র সিংহনা ভিদিও কনফরেন্সকী খুত্থাংদা পাংথোকখিবা হঙ্গৎনা য়েংবগী মীফম অমদা হায়খিবনি। মীফম অদুদা নোর্থ ইস্তর্ন কাউন্সিল (এন.ই.সি.)গী সেনিয়র ওফিসিএলশিংগা লোইননা নোর্থ ইস্তর্ন রীজনেল এগ্রিকলচরেল মার্কেতিং কোর্পোরেসন (এন.ই.আর.এ.এম.সি.), নোর্থ ইস্ত হেন্দিক্রাফত এন্দ হেন্দলুম দিবেলপমেন্ত কোর্পোরেসন (এন.ই.ঐচ.ঐচ.দি.সি.), নোর্থ ইস্ত দিবেলপমেন্ত ফাইনান্স কোর্পোরেসন লিমিতেদ (এন.ই.দি.এফ.আই.), কেন এন্দ বেম্বু তেক্নোলোজী সেন্তর (সি.বি.তি.সি.)নচিংবা য়াওনা তোঙান তোঙানবা সরকারগী লোইশঙশিং অমসুং পি.এস.য়ু.শিংনা শরুক য়াখি।

দাক্তর জিতেন্দ্র সিংহনা হৌখিবা চহী তরুক অসিদা অৱাং নোংপোক্কী লমদম অসিনা প্রধান মন্ত্রী শ্রী নরেন্দ্র মোদীগী লুচিং মখাদা চাউখৎলক্তুনা অহোংবা অমা লাকপগী খুদম অমা ওইরকপা অমসুং হৌজিক ওইরিবা কোবিদকী ইরাং মরক অসিদসু হেল্থ মেনেজমেন্ত তৌবদা কান্নবা, চেকশিনবা অমসুং কাংলোন চুম্বগী খুদম অমা ওইরকপা অসিদা নুংঙাইবা ফাওই হায়না মহাক্না মীদিয়াদা ৱা ঙাংবদা ফোংদোকখি।

অৱাং নোংপোক্কী রাজ্য ৫, সিক্কিম, নাগালেন্দ, অরুনাচল প্রদেশ, মনিপুর অমসুং ত্রিপুরা অসিদা হৌজিক কোরোনা লৈত্রে অমসুং রাজ্য ৩, অসম, মেঘালয় অমসুং মিজোরমদা কোরোনাগী পোজিতীব ওইবা কেস মথংশিৎনা ৮, ১১ অমসুং ১ লৈরিবা অসিসু নেগেতীব ওইরগনি অমসুং ঙরাং অহিং ফাওবদা অনৌবা কেস অমত্তা লাক্ত্রি হায়না দাক্তর জিতেন্দ্র সিংহনা মখা তানা কুপথনা হায়খি। মহাক্না অৱাং নোংপোক্কী রাজ্যগী সরকারশিং অমসুং দিবেলপমেন্ত ওফ নোর্থ ইস্তর্ন রীজন (দি.ও.এন.ই.আর.) মন্ত্রালয় অমসুং নোর্থ ইস্তর্ন কাউন্সিল (এন.ই.সি.)গী লোইশঙগী মীওইশিংবু অমনা অমবু নীংথিনা মতেং পাংনদুনা হায়রিবশিং অসিবু ওইথোকহনবগীদমক থাগৎপা ফোঙদোকখি।

তোঙান তোঙানবা অৱাং নোংপোক্কী রাজ্যশিং, হায়বদি মিজোরম, মেঘালয়, অরুনাচল প্রদেশ অমসুং মনিপুরদগী লাকপা কোরোনা শন্দোক্লকপা শেন্ননবা অমসুং চেকশিন্ননবা, অরুবা ফিভম ওইরকপদা চেকশিন্ননবা অমসুং হেল্থকেয়র ফগৎহন্নবগীদমক্তা ওইবা খোঙথাং কয়া অমা হৌদোক্লকপশিংসু ফংলবা মতুংদা খন্নরি হায়না দাক্তর জিতেন্দ্র সিংহনা খঙহনখি। হায়রিবা খোংথাংশিং অসিদা মরু ওইবা পীদুনা থেংনগনি হায়না মহাক্না হায়খি। মসিগী মথক্তা দি.ও.এন.ই.আর.গী মন্ত্রালয়না অঙনবদগী হৌনা, লোকদাউন হৌদ্রিঙৈগী মমাংদগী, অৱাং নোংপোক্কী রাজ্যশিংগী ওইনা কোরোনাগা মরী লৈনবা থবক থৌরমশিংদা শিজিন্ননবা হায়দুনা লুপা কোতি ২৫ কাইথোক্তুনা থমখ্রবনি হায়না হায়খি।

মীফম অসিগী মনুংদা হোম এফিয়র্স মন্ত্রালয়গী চৎন কাংলোনগী মতুং ইন্না কোমথোকপা মফমশিংদগী ৱাগা মরী লৈনবা থবকশিংনা মপুং ওইবা শেনমিৎলোনগী থবক কয়া হৌখিবা নুমিৎ খরনি অসিদা চত্থখিবগী অনৌবা পাউ কয়াসু দাক্তর জিতেন্দ্র সিংহনা ফংখি।