প্রধান মন্ত্রী শ্রী নরেন্দ্র মোদীনা ঙসি রাজ্যশিংগী মুখ্য মন্ত্রীশিংগা লোইননা  ভিদিও কনফরেন্সিংগী খুথাংদা হৌজিক ওইরিবা ফিবম অমসুং কোবিদ-১৯ লাইচৎ থেংননবা থৌরাংশিং য়াৎথোক্নবা খন্ন-নৈনখ্রে। মসি প্রধান মন্ত্রী অমসুং মুখ্য মন্ত্রীশিংগী মরক্তা পাংথোকপা মরিশুবা মীফম্নি, মমাংগী মীফমশিংনা ২০২০গী মার্চ ২০, এপ্রিল ২ অমসুং এপ্রিল ১১দা ফমখি।

হৌখিবা থা অমগা মখাইরোম অসিদা লৈবাক অসিনা মীওই লীশিং কয়া কনবা ঙমখিবসি লোকদাউন অসিগী অফবা ফলনি হায়না প্রধান মন্ত্রীনা ফোংদোকখি। মহাক্না মখা তাখি মদুদি, ভারতকী মী মশিং অসি অতোপ্পা লৈবাক কয়াগা পুনশিন্নরগা চাংদম্নবা য়ারিবনি। ভারত য়াওনা লৈবাক কয়াগী ফিবম অসি মার্চ থা হৌরকপা ফাওবদদি মান্নরম্মি। অদুম ওইনমক, মতম চানা লৌখৎহৌবা খোংথাংশিংনা, ভারতনা মীওই কয়াবুদি ঙাকথোকপা ঙম্লক্লি। মহাক্না মাংজৌননা চেকশিনৱা থমখি মদুদি, ভাইরস অসিনা থোকহল্লিবা খুদোংথিবদি লোইগদবা য়াম্না ৱাৎলি অমসুং লেপ্পা লৈতনা মিৎকুপ নাহুম শিংনা লৈবা হায়বসি য়াম্নমক মথৌ তারি।

প্রধান মন্ত্রীনা হায়খি মদুদি, হৌজিক ফাওবদা লৈবাক অসিদা লোকদাউন অনী উখ্রে, হায়রিবা অনী অসিমক হীরম খরদা খেন্নবা লৈ, হৌজিক্তি, ঐখোয়গী মাংদা লৈরিবশিং অমুক য়েংবা তারে। খঙ-হৈরবশিংগী ৱাখল্লোন্দগী, লাক্লিবা থা খরসিদা ঐখোয়না কোরোনাভাইরসকী শাফু অসি উবা ফংলগনি হায়না মহাক্না মখা তাখি। ‘দো গজ দুরী’গী মন্ত্রবু নৌহৌননা পল্লদুনা, মহাক্না হায়, মাস্ক অমসুং মাইখুম ফিশিং অসি ঐখোয়গী লাক্কদৌরিবা নুমিৎশিং অসিদা পুন্সিগী শরুক অমা ওইরগনি। মহাক্না মখা তাখি মদুদি, ফিবম অসিদদি, মীপুম খুদিংমক্কী পান্দম অসি খুদক্তা পাউখুম পীবনি। হৌজিক্তি মী অয়াম্বা মখোয়দা লোক খুবা অমসুং লোক থুংবা নত্ত্রগা লাইওং অমা হেক লাকপদা মশানা তাকথোকচরক্লে, অমসুং হায়রিবসি অফবা খুদম অমনি হায়না মহাক্না পুখৎখি।

প্রধান মন্ত্রীনা হায়খি, ঐখোয়না কোবিদ-১৯ থেংনরিঙৈ চৈরক্তা শেন্মিৎলোন্দসু মরুওইবা মিৎয়েং থমগদবনি। মহাক্না তেক্নোলোজীবু ঙম্লিবমখৈ শিজিন্নবগী মরুওইবশিংবুসু থমখি অমসুং অনৌবা অহোংবা পুরক্নবা খোংথাংশিং কোনশিন্নবা মতম লৌনবসু পুক্নিং চিংশিনখি। লৈবাক অসিনা কোবিদ-১৯ থেংননবা হোৎনরিবশিং অসিদা মতেং ওইননবা মীয়াম পুম্নমক্না আরোগ্য সেতু এপ দাউনলোদ তৌননবা হোৎনবগী তঙাইফদবসু থমখি। মহাক্না হায়খি, “ঐখোয় থৌনা ফবা তাই অমসুং অচম্বা প্রজাশিংগী পুন্সি মহিংদা ফগৎনবা অহোংবা পুরকপা মথৌ তাই।” মহাক্না মখা তানা হায়খিবদা, য়ুনিবর্সিতীশিংগা শম্নরিবা মীওইশিংনা পুনশিন্নদুনা লাইচৎ অসিবু থেংননবা পাম্বৈ পুথোকপা অমসুং রিসর্স অমসুং ইনোবেসনগী মপাঙ্গল কলহনবা মথৌ তাই হায়খি।

হোৎস্পোৎশিংদা হায়বদি রেদ জোনশিংদা রাজ্যশিংনা চৎন-কাংলোনশিং হকচিন্না ইলহনবগী তঙাইফদবসু পুখৎখি। রাজ্যশিংনা হোৎনরিবশিংসি রেদ জোনশিংবু ওরেঞ্জ অমসুং মথংদা গ্রীন জোন ওইহনবদা পান্দম থমগদবনি হায়খি।

মপান লৈবাকশিংদা লৈরিবা ভারত মচাশিং পুরকপগী মতাংদা, মখোয়দা খুদোংচাদবা অমত্তা লৈহন্দবা অমসুং মখোয়গী ইমুং মনুংদু রিস্ক অমত্তা লৈহন্দনবা হোৎনরবা মতুংদা পাংথোক্কদবনি হায়খি। প্রধান মন্ত্রীনা মুখ্য মন্ত্রীশিংদা, কালেনথা অমসুং মোন্সুনগী লোন্নবা মতমগী ঈশিং নুংশিৎ হোংলকপদা লাক্কদবা লাইনাশিংবুসু য়েংদুনা থৌরাং লৌখৎকদবনি হায়না পুক্নিং চিংশিনখি।

কেন্দ্রগী য়ুমলৈ-কৈরৈ মন্ত্রীনা অহেনবা পুন্সি কন্নবগীদমক লোকদাউন চৎনহনবা মথৌ তারিবসিগী মতাংদা থমখি।

হৌজিক ওইরিবা খুদোংথিবা মতম অসিদা লুচিংবীবগীদমক প্রধান মন্ত্রীবু মুখ্য মন্ত্রীশিংনা থাগৎপা ফোংদোকখি অমসুং ভাইরস অসিবু লাকশিন্নবা হোৎনবদা মখোয়না লৌখৎলিবা থৌরাংশিংগী মতাংদা থমখি। য়ুম্লোন্নবা লৈবাকশিংগী মরক্তা লৈবা ঙমখৈশিংদা চেকশিনবা মথৌ তারিবশিংগী মতাংদা মখোয়না পুখৎখি, অমসুং শেন্মিৎলোন্দা শিংনবা লাক্কদবশিং অমসুং হকশেলগী ইনফ্রাস্ত্রকচরশিং ফগৎহনবা মথৌ তারিবশিংগী মতাংদা পুখৎখি। লুচিংবশিং অসিনা পুলিস ফোর্সশিং, মেদিকেল স্তাফশিংনা কোবিদ-১৯ থেংননবা হোৎনবদা লৌরিবা থৌদাংশিং অসিগীদমক তৌবীমল খঙবা উৎপগা লোইননা থাগৎপা ফোংদোকখি।